1 Bambu Chapanga akamjovela Musa, 2 "Uvajovela vana va Isilaeli kuvya pemuyingila kumulima wenikuvapela muni mutamayi mwenumo, 3 mkaniwusila nene Bambu Chapanga luteta kuhuma mumifuya yinu, luteta lwa kutinyisa, zivya luteta lwa kukita unungalila bwina wa kuniganisa nene Bambu Chapanga. Muni mundu atimilisa nazili yaki amala kuwusa luteta kwa kugana mwene amala luteta lukumbi lwa miselebuko yinu yeyivikiwi, 4 hinu mweiwusa luteta lwaki, mewa yati akumletela luteta lwa uhembe nyilili kilo yimonga weuhangisinwi na yimonga lita yimonga ga zeituni. 5 Pamonga na divayi ya luteta lwa mnyweso lita yimonga, vindu vyenivyo yati viwusiwa pamonga na hinyama ya luteta lwa kutinyiswa, limbelele amala mene. 6 Lukumbi lwa kuwusa luteta lwa limbelele ligosi, kilo zivili za uhembe weukandiwi na lita yimonga na yapinga ya mahuta ga zeituni yati viwusiwa muni luvya luteta lwa uhembe, 7 pamonga na luteta lwa mnyweso lita yimonga na ya yapinga ya divayi, na kuvya unungalila wa bwina wa kumganisa Bambu Chapanga. 8 Lukumbi peukumuwusila Bambu Chapanga ng'ombi yigosi ndava ya luteta lwa kutinyiswa muni kutimilisa nazili amala ukumuwusa ndava ya luteta lwa uteke, 9 mundu yati akuyiwusa ng'ombi yigosi kuvya luteta pamonga na uhembe kilo zidatu weuvi bwina na lita zivili za mahuta ga zeituni, 10 pamonga na luteta lwa mnyweso lita zivili za divayi. Luteta lwenulo lwa kutinyiswa yati lukita unungalila wa bwina wa kumganisa Bambu Chapanga.

11 Vyenivyo ndi vyeviwusiwa pamonga na kila ng'ombi yigosi amala limbelele ligosi amala mene yigosi yati vitendekewa kwa namuna iyi. 12 Kila chinyama chechiwusiwa luteta, chiganikiwa chiwusiwayi pamonga na vindu vyenivyo vyevilagiswi. 13 Mkolonjinji yeyoha wa Isilaeli yati ilanda malagizu aga lukumbi peiwusa luteta lwa kutinyiswa kwa motu, kuvya unungalila wabwina lwelukumganisa Bambu Chapanga. 14 Kwa viveleku vyevibwela, lukumbi lwolwoha myehe amala mundu yoyoha mweitama pamonga na nyenye peileta luteta lwa kutinyisa kwa motu ngati unungalila bwina lwa kumganisa Bambu Chapanga, ndi iganikiwa akitayi chilachila chemwikita nyenye. 15 Vandu voha yati vivya na malagizu genago kwinu na kwa myehe mweitama pamonga na nyenye, yeniyi ndi muhilu ya kusindimala kwa viveleku vyevibwela. Palongolo ya Bambu Chapanga nyenye Vaisilaeli na vayehe yati mwilingana. 16 Mhilu yeniyo na malagizu genago, yati gakuvavala nyenye pamonga na myehe mweitama pagati yinu."

17 Bambu Chapanga amjovili Musa, 18 "Vajovela, Vaisilaeli pemwiyingila pamulima wenukuvapeleka, 19 kila pemwilya chakulya kuhuma mumlima wenuo, yati mwibagula lilundu la chakulya chenicho na kunipela nene Bambu Chapanga. 20 Pemwiyocha mabumunda, libumunda la kutumbula la uhembe winu wa kutumbula yati liwusiwa kuvya luteta kuhuma pandu pa kubulila mabenu. 21 Yati mukuniwusila nene Bambu Chapanga luteta ulu lwa kutumbula kwa viveleku vyinu vyoha vyevibwela."

22 Nambu ngati mmonga winu yati ihotola lepi kulanda goha nene Bambu Chapanga genimpelili Musa, 23 ngati magono gegibwela vandu yati vilanda lepi goha nene Bambu Chapanga genimlagizi Musa, 24 hinu ngati libudili lenilo likitiki changali kumanya, changali vandu voha kumanya, ndi vandu voha yati viwusa ng'ombi yigosi yeyangakangala neju kuvya luteta lwa kutinyiswa, kuvya unungalila wabwina wa kumganisa Bambu Chapanga, pamonga na luteta lwaki lwa uhembe na ya mnyweso kulandana na malagizu gaki. Mewawa vandu vawusa lipongo limonga kuvya luteta lwa kuwusa kubuda. 25 Mteta wa Chapanga yati ikita utepulanisa ndava ya vandu voha va Isilaeli na vene yati vilekekeswa ndava vamanyili lepi, na vene vamletili Bambu ndava ya kubuda kwavi luteta lwelutinyiswi kwa motu na luteta lwa kuwusa kubuda. 26 Vandu voha wa Vaisilaeli, pamonga na vayehe vevitama nawu, yati vilekekeswa ndava voha vavalangiwi libudilu lenilo.

27 "Nambu mundu mmonga akabuda changali kumanya, yati iwusa mene yidala ya mwaka umonga kuvya luteta lwa kulekekesa kubumbudila Chapanga. 28 Mteta wa Chapanga yati ikita utepulaniso palongolo ya Bambu Chapanga, ndava ya mundu mwenuyo mweabudili changali kumanya, mewa mwene yati ilekekeswa. 29 Yati mwilanda malagizu gamonga kila mmonga winu mweibuda changamanya, avya mkolonjinji wa Isilaeli amala myehe mweitama pamonga na nyenye."

30 "Nambu mundu yeyoha mweabudili kwa kugana mwene, avya mkolonjinji wa Isilaeli amala myehe, mwenuyo akumliga Bambu Chapanga, ndi yiganikiwa mundu mwenuyo akomiwa. 31 Ndava alivevisi linenu la Bambu Chapanga na kuleka kuliyidakila mihilu yaki, mundu mwenuyo chakaka yiganikiwa akomiwa na chechihumila chivya chaki."

32 Ligono limonga, lukumbi Vaisilaeli pevavili kulugangatu, vamuwene mundu mmonga itinya sagala Ligono la Kupumulila. 33 Vala vevamkolili itinya sagala vakamleta kwa Musa na Aloni na palongolo ya vandu voha, 34 vene vakamvika muchifungu, muni vamanyili lepi vamukitila kyani mundu mwenuyo. 35 Ndi Bambu Chapanga akamjovela Musa, "Mundu mwenuyo yiganikiwa akomiwa, mundu mwenuyo yati ikomiwa kwa maganga kuvala ya kambi. 36 Ndava ya chenicho vandu voha vakamuhumisa kuvala ya kambi na kumtova maganga mbaka kufwa."

37 Kangi Bambu Chapanga amjovili Musa, 38 "Uvajovela Vaisilaeli, vajikitila vifundu vya wuzi vyevilembela muvigunyilu vya yula zavi, kila chifundu chivya na wuzi wa buluu panani ya kila chifundu. Uvajovela vakita chenicho muviveleku vyavi vyoha vyevibwela. 39 Vifundu vya wuzi vyenivyo yati vivya ukumbuso kwinu. Pala pemwikuvilola, yati mkuyikumbuka mihilu yangu yoha na kuzilanda, muni mkoto kulanda gemukugagana mwavene na gala gemkugalola kwa mihu ginu. 40 Ndi yati mukuyikumbuka mihilu yangu yoha na nyenye yati mwivya vandu vangu njwee. 41 Nene ndi Bambu Chapanga winu, mwenavawusili kuhuma ku Misili nivya Chapanga winu. Nene ndi Bambu Chapanga winu."