1 Hinu Bambu Chapanga akamjovela Aloni, "mabudilu goha kuvala lihengu la Lindanda lakukonganekela yati zivya kukuvala veve na vana vaku na lukolo lwaku, mewawa mabudanu gegilandana na uteta waku veve gakukuvala wamwene na vana vaku. 2 Valeta Valawi vayako kuhuma mu likabila la vadadi vaku muni vawunganayi na nyenye na kuvatangatila lukumbi veve na vana vaku na viveleku vyaku vyoha pemuhengela Lindanda la kukonganekela. 3 Vene yati vihenga lihengu leukuvapela na kutimilisa mahengu gavi kuvala Lindanda. Nambu viganikiwa lepi kupamisa vindu vya Lindanda, amala kuhegelela pandu pa kuwusila teta, muni vene na nyenye mkoto kufwa. 4 Vene yati vivya pamonga na veve palihengu na kutimilisa mahengu gavi chikamilifu kuvala mahengu goha ga Lindanda, ndi pakoto kuvya na mundu yungi mweihegelela mwenumo. 5 Veve na vana vaku ndu ndi yati mwikita mahengu ga pandu pa Msopi na pa pandu pa kuwusila teta, muni ligoga langu likoto kuvahumila kangi Vaisilaeli. 6 Ndi nene namwene nivahagwili valongo vinu Valawi pagati ya Vaisilaeli ngati njombi kwinu. Vene ndi vabaguliwi ndava yangu nene Bambu Chapanga, muni vahenga lihengu Pa Lindanda la Kukonganekela. 7 Nambu ndi veve na vana vaku ndu ndi yati mwihenga mahengu goha ga uteta ndava ya pandu pa kuwusila teta na goha gegavi pandu Pa Msopi neju. Genago ndi mahengu ginu, ndava nikuvapela chipanji cha uteta. Mundu yeyoha angaganikiwa kuhegelela vindu vya Lindanda, yati ikomiwa."

8 Kangi Bambu Chapanga akamjovela Aloni, "Nikukupela vindu vyoha vyevawusili Vaisilaeli kuvya luteta kwa nene, vindu vyoha vyevanipelili Vaisilaeli vivya vya nene ndi nikukupela veve na viveleku vyaku vivya vinu mu wumi winu woha. 9 Vindu vya Msopi neju vyeviwusiwa muni vikotoka kutinyiswa pamotu, vyenivi yati vivya vinu, Teta za uhembe, teta za kulekekesa kubuda na teta za kuwusa nazili na vilapu. Kila chindu vandu chevawusili ngati luteta lwa Msopi yati chivya chaku na vana vaku. 10 Yati mwilya vindu vyenivyo ngati vindu Vya Msopi neju, ndi vagosi ndu ndi vevilya, vindu vyenivyo vya Msopi yaani muvilola ngati vindu vyeviwusiwi kwa nene."

11 "Mewa vindu vingi vyoha vyevakunipela Vaisilaeli ngati teta za kuyinuliwa, yati vivya vyaku. Yati nikupela veve na vana vaku na vasikana vaku kuvya vinu magono goha. Mundu yoyoha mulukolo lwaku angali kuvya mhakasa ihotola kulya."

12 "Nikupela vindu vyoha vyabwina vyevihuma muluteta vya malimbuku vyevakuniwusila Vaisilaeli, Mahuta ga zeituni na divayi na uhembe. 13 Malimbuko goha ga pamulima ga migunda yavi gala gevakuniletela nene, yati givya gaku. Kila mundu angahakala mulukolo lwaku ihotola kulya."

14 Neju ya genago chindu chochoa chechivikiwi ndava ya Bambu Chapanga pamulima wa Isilaeli yati chivya chinu.

15 "Mvelekewa yoyoha wa kutumbula wa Vaisilaeli yikavya mundu amala wa chinyama mwevaniwusili Bambu yati ivya waku. Nambu Vaisilaeli viganikiwa kuvagombola kila mvelekewa wa kutumbula wa mundu na kila mvelekewa wa kutumbula wa chinyama mweangayidakiliwa kwa Bambu. 16 Vavelekewa venavo va kutumbula yati vigombolewa kuni vavi na ntanga ya mwehi umonga kwa kulipiwa mashonga shekeli mhanu, kuwanangana na vipimu vya Lindanda la kukonganekela. 17 Nambu vavelekewa va kutumbula va ng'ombi na limbelele na mene vakoto kugombolewa, vyenivyo ndi vya Chapanga. Ngasi yavi yati unyunyusila pandu pa kuwusila teta na mahuta gavi yati ukugayocha kuvya luteta lwa kutinyiswa genago givya unungalila wabwina weukuniganisa nene Bambu Chapanga. 18 Nyama zavi muhotola kulya, ngati chemuhotola kulya nganga na liwondo la chigendelu cha mumbele cha kulyela vyeviwusiwi ndava ya luteta lwa kuyinuliwa."

19 "Nikukupela veve na vasongolo vaku na vasikana vaku, vindu vyoha vila vandu va Isilaeli vakuniwusila, vyenivyo ndi vinu magono goha. Lenili ndi lilaganu langu la magono goha ngali na mwisu lenivika ndava yaku na vachiveleku vaku."

20 Bambu Chapanga amjovili Aloni, "Veve yati upewa lepi ndima yivya yaku pamulima wa Isilaeli, na ndi mwenikupela chewigana, nene ndi Bambu Chapanga."

21 "Bambu Chapanga akajova, ndava ya Valawi venevo nivapelili lilundu limonga pagati ya kumi goha gala Vaisilaeli vakuniwusila kuvya gavi. Genaga yati givya luhuna lwa mahengu gevihenga kuliyangalila Linanda langu la Mngonganu. 22 Tangia hinu, vandu va Isilaeli vakoto kulihegelela Lindanda ngati lepi yati vakunibudila na kujiletela lifwa. 23 Nambu Valawi vene ndi vevihenga lihengu ku Lindanda la kukonganekela, na kuliyangali bwina panani yaki na mambu gakahalibikayi vene yati vikotwa. lenili ndi lilagizu la magono goha muviveleku vyinu vyoha. Valawi yati vivya lepi na vindu vyevivya vyavi vene pamulima wa Isilaeli. 24 Ndava lilundu limonga pagati ya kumi zevakuniwusila Vaisilaeli nivapeli vene vivya vyavi. Ndi muni nijovili kuvya Valawi yati vya lepi na ndima yakwavi vene."

25 Kangi Bambu Chapanga amjovili Musa, 26 "Kangi yati ukuvajovela Valawi malagizu aga, lukumbi pemwipokela lilundu limonga pagati ya kumi gala Bambu Chapanga geavapeli kuhuma kw Vaisilaeli gavya gavi, yati mukuiniwusila nene Bambu Chapanga pandu pamonga palilundu limonga pagati ya kumi. 27 Teta yeniyo yati yiyidakiliwa kuvya yiwanangana na malimbuku ga mabenu amala zabibu zeakuniwusila mlimaji. 28 Hinu ndi chemukuniwusila nene Bambu Chapanga teta za lilundu limonga pagati ya kumi zemupokela kuhuma kwa Vaisilaeli. Lilundu limonga pagati ya kumi zemukuniwusila nene Bambu Chapanga yati mukumpela mteta wa Aloni. 29 Mganikiwa kuwusa pandu pa Bambu Chapanga pepavi pabwina neju kavili lilundu limonga pagati ya kumi mukila chamupewa. 30 Ndava yeniyo yati ukuvajovela, Mkamala kuniwusila lilundu limonga pagati ya kumi lelivibwina kuliku zoha, lilundu lelisigalila yati pivya pinu ngati cheyivi kwa mlimaji yula mweitola chechisigalila peamali kuwusa luteta lwaki lwa mabenu ga kutumbula uhembe na divayi. 31 Nyenye na vandu va kunyumba yinu muhotola kulya pepasigalili pandu popoha pala, lwenulu ndi luhuna lwinu ndava ya mahengu ginu pa Lindanda la mngonganu. 32 Yati mwivya lepi na uhakau wowoha mwakalya vindu vyenivyo, ngati mumuwusili Bambu Chapanga lilundu lelivii labwina kuliku poha, nyenye yati mukita vindu vyenivyo vya Vaisilaeli nivabela na yati mwifwa lepi."