1 Vandu vatumbwili kumng'ung'utila Bambu Chapanga ndava ya mtahu wavi. Bambu Chapanga peayuwini, akayoma akavapelekela motu. Motu wenuo wayakili pagati yavi na kuyocha upandi mmonga wa kambi. 2 Vandu vakamvembela Musa, na mwene akamuyupa Bambu Chapanga na motu wenuo ukajimika. 3 Ndava yeniyo pandu penapo pakemeliwi Tabela, ndava penapo motu wa Bambu Chapanga wayakili pagati yavi.

4 Pagati yavi vavii vayehe vangali kuvya Vaisilaeli vanogili neju chakulya chingi na Vaisilaeli mewa vatumbwili kuvemba kavili na kujova, "Mbanga nga tivya na nyofu tilye! 5 Tikumbuka, somba zetalili kula ku Misili changali malipu, matikiti na matangamanga na likolo na vitungulu na vitungulu swaumu! 6 Nambu hinu tivi lepi na makakala, tivi lepi na mnogu wa chakulya muni kawaka chakulya chingi nga yiyi mana ndu!"

7 Mana yawanangini ngati ngele za mapemba, langi yaki yavili ngati manjanu. 8 Mana yeniyo yagwili lukumbi kilu pakambi pamonga na mbetu. 9 Lukela vandu vahambili kuyola, kangi vayagili kwa maganga ga livala amala vapulili mulituli na kangi vakateleka muviviga. Mnogu waki wavili ngati mabumunda ga gegatelekwi kwa mahuta ga zeituni.

10 Musa ayuwini vandu ving'ung'uta mukila munyumba, kila mundu pamlyangu wa Lindanda laki. Hinu Bambu Chapanga akayoma neju, na mwene Musa akavayomela. 11 Akamkota, Bambu Chapanga, "Ndava kyani uletili mtahu wenuwu kwa mtumisi waku? Nikukitili kyani cha kukuyomesa hati unipeli lihegu lenili lelinonopa la kuvayangalila vandu ava voha? 12 Wu, nene ndi mwenivaveliki, hati ukanijovela nivagega panganga yangu ngati mweilela mwana mng'enya, na kuvapeleka mbaka pamulima yeulapili kuvapela vagogo vavi? 13 Yati nipata koki nyofu ya kuvapela vandu ava voha? Muni viyendelela kunivembela palongolo yangu vijova, ‘Tipela nyofu tilyayi!’ 14 Nihotola lepi kuvayangalila vandu ava voha, lenilo ndi lihengu livaha neju kwangu! 15 Ngati naha ndi cheukunikitila, mbaga unikoma, nambu ngati niganisiwi pamihu paku, ukoto kunileka nivya mumang'aiso."

16 Hinu, Bambu Chapanga akamjovela Musa, "Uvaleta vagogo sabini va Isilaeli, vala veve veukuvamanya vitopeswa na kuyidakiliwa na vandu ngati vachilongosi, uvaleta pa Lindanda la kukonganekela, vayima papipi na veve. 17 Yati nihelela kwenuko na kujova na veve, yati nitola pandu pa makakala ga mtima wangu, na kuvika makakala ago vandu venavo. Vene yati vivya na lihengu la kukutangatila kuvayangalila vandu ava muni ukoto kulikita lihengu lenili wamwene. 18 Hinu vajovela naha, mjinyambisa ndava ya chilau, yati mwilya nyama. Bambu Chapanga ayuwini mwiveba na kujova kuvya kawaka mundu wa kuvapela nyofu, na mwanekanili neju pamwavili ku Misili. Hinu Bambu Chapanga yati akuvapela nyama, na nyenye mganikiwa mlyayi. 19 Nyama yeniyo yati mwilya lepi kwa lukumbi wa ligono limonga ndu, amala zivili, amala mahanu, amala kumi amala ishilini, 20 ndi yati mwilya kwa lukumbi lwa mwehi woha! Yayi mwilya mbaka kukola na kuyivenga mnungalilu waki. Goha ago ni ndava mumbelili Bambu Chapanga mweavili bahapa pagati yinu, na kuvemba palongolo yaki mwijova, ‘Ndava kyani mwahumili ku Misili?’ "

21 Nambu Musa amjovili Bambu Chapanga, "Mvalangu wa vandu venikuvalongosa ndi laki sita vevigenda kwa magendelu, na veve wijova. Yati nikuvapela nyama ya kukola mwehi woha? 22 Wu, pihotola kuhinjwa mambelele na ng'ombi wa kuvakola? Wu, somba zoha za mnyanja valovayi ndava yavi?"

23 Bambu Chapanga akamyangula Musa, "Wu, uhotola wangu upungwili? Yati wilola hinu ngati linenu langu yati livya la uchakaka kwaku amala lepi."

24 Ndava yeniyo Musa akahamba kuvamanyisa vandu gala geajovili Bambu Chapanga. Kangi akavakemela pamonga vagogo sabini vachilongosi pagati ya vagogo na vene akavavika pamuhana kutindila pa Lindanda. 25 Kangi Bambu Chapanga akahelela mumahundi na kulongela na Musa. Ndi akatola pandu pa makakala ga mpungu weampeli Musa, akavapela kila mmonga wa vagogo vala sabini. Pevayingilwi na mpungu wenuwo, vagogo vala vakatumbula kuwusa ulota, nambu vawuyili lepi kuhenga chenicho.

26 Nambu vagogo vavili pagati ya vala sabini vevahaguliwi, Elidadi na Medadi, vasigalili pakambi vayavi pavahambili ku Lindanda. Mpungu wavabwelili mwenumo mukambi, vakatumbula kuwusa ulota pandu pevavivili. 27 Msongolo mmonga ajumbili kumjovela Musa, "Elidadi na Medadi viwusa ulota pakambi."

28 Penapo, Yoshua, mwana wa Nuni, mweavi mtangatila wa Musa kuhumila musongolo waki, akamjovela Musa, "Bambu wangu, uvabesa."

29 Nambu Musa akamyangula, "Wu, Uvii na wihu ndava yangu? Nganinogili vandu voha va Bambu Chapanga ngavavyai vamlota na kuvya Bambu Chapanga ngaaviki Mpungu waki panani yavi!" 30 Kangi Musa awuyili kukambi pamonga na vagogo vala va Isilaeli.

31 Kangi ukahumalila mpungu kuhuma kwa Bambu Chapanga na wene ukaleta ngwali kuhuma munyanja na kuzigwiha paluvanja lwoha kutindila kambi, vakalundana pahi utali wa ngati mita yimonga, utali wa kilomita zamahele pandi zoha kutindila kambi. 32 Hinu, ligono lenilo loha, muhi woha na kilu yoha, na chilau yaki vandu vavi mukuhenga kunonga ngwali, kawaka mundu mweanongili pahi ya kilo elufu yimonga. Vakaziyanika kutindila kambi yoha. 33 Kwepavili kwakona kuvii na nyama yamahele na kwakona vandu vangamala kulya, Bambu Chapanga akavayomela, akavatova vandu venavo kwa litovelu livaha neju. 34 Ndava yeniyo pandu penapo pakemiwi Kibiloti Hataava, ndava muni kwenuko ndi kwevazikili vandu vevavi vahutulu.

35 Kuhuma penapo Kibiloti Hataava vandu vagendili na kuvika kambi Heseloti.