1 Bambu Chapanga akamjovela Musa, 2 "Vatuma vandu chilongosi monga kuhuma mukila likabila vahamba vakakita umang'omesi kumulima wa Kaanani wenikuvapela vana va Isilaeli." 3 Hinu, kwa malagizu la Chapanga, Musa akatuma vandu kuhuma lugangatu lwa Palami. Vandu voha vevatumwili ndi vavi vachilongosi va makabila ndalindali ga va Isilaeli; 4 Genaga ndi mahina ga vandu venavo, kuhuma likabila la Leubeni, Shamua mwana wa Zakuli. 5 Kuhuma likabila la Simioni, Shafati mwana wa Holi. 6 Kuhuma likabila la Yuda, Kalebu mwana wa Yefune. 7 Kuhuma likabila la Isakali, Igali mwana wa Yosefu. 8 Kuhuma likabila la Efulaimu, Hoshea mwana wa Nuni. 9 Kuhuma likabila la Benyamini, Paliti mwana wa Lafu. 10 Kuhuma likabila la Zebuluni, Gadieli mwana wa Sodi. 11 Kuhuma likabila la Yosefu ndi mewa likabila la Manase, Gadi mwana wa Susi. 12 Kuhuma likabila la Dani, Amieli mwana wa Gemali. 13 Kuhuma likabila la Asheli, Setuli mwana wa Mikaeli.

14 Kuhuma likabila la Nafutali, Nabi mwana wa Wofisi.

15 Kuhuma likabila la Gadi, Geueli mwana wa Maki.

16 Genago ndi mahina ga vandu Musa veavatumili kuhamba kukita umang'omesi ku mulima wa Kanaani. Musa ampelili Hoshea mwana wa Nuni lihina lingi Yoshua. 17 Lukumbi peavatumili kuung'omesa mulima wa Kaanani, Musa avajovili, "Kuhuma penapa muhamaba kukasikazini na kuhika Negebu ndi upandi wa kusini wa Kanaani na kuyendelela mbaka ku mulima wa hitumbi, 18 mkaung'omesa mulima cheuvili. Mewa mkotekesa ngati vandu vevitama penapo wu, vakekesi amala vayutiyuti, vadebedebe amala vamahele. 19 Vitama pamulima wa namuna yoki? Wu, mulima wabwina amala uhakau? Wu, miji yevitama vatindisili luwumba amala ngomi? 20 Mlolokesa mewa ngati ndima yeniyo yabwina kwa kulima amla lepi, wu, kuvi na mikongo amala kawaka? Mkangamala chemwihotola kuleta matunda kuhuma mulima wenuo." Lwenulo lwavi lukumbi lwa kuhunda zabibu za kutumbula.

21 Hinu, vandu avo vakahamba kuung'omesa mulima kuhuma kulugangatu la ku Sini mbaka Lehobu, papipi na pandu pa kuyingilila ku Hamati. 22 Vahambili mbaka ku Negebu ndi upandi wa kusini vakahika mbaka ku muji wa Hebuloni. Kwenuko vavakolili Vaahimani na Vasheshai na Vatalimai, chiveleku cha Anaki. Muji wa Hebuloni wamali kujengewa miaka saba kwakona muji wa Soani wewavili mulima wa Misili. 23 Pevahikili palikemba la Eshikoli, vandu avo vadumwili lipanyu la mzabibu lelitopa na matunda gamahele, lela gegiwi mzega. Vagegili mewa makomamanga na tini. 24 Pandu penapo pakemelewi likemba la Eshikoli ndava ya lipanyu Vaisilaeli vadenyili kuhuma pandu penapo.

25 Pevamalili kuying'omesa mulima wenuwo kwa magono alobaini, vandu vala vawuyili. 26 Vawuyili kwa Musa, Aloni na vandu voha va Isilaeli kwenuko Kadeshi kulugangatu la Palani. Penapo ndi pevavajovili mambu gala gevagawene na kuvalangisa matunda gevagaletili. 27 Vamjovili Musa, "Tahikili pamulima wewatutumili tiying'omesa, mulima wabwina kwa kulimba na kuyunga mifuya, na lenili ndi lipanyu laki. 28 Nambu, vakolonjinji va kwenuko vavii na makakala neju, na miji yavi ndi yivaha na yitindisiwi ngomi. Neju ya genago, kwenuko tawene vachiveleku va Anaki. 29 Vaamaleki vitama ku Negebu, Vahiti na Vayebusi na Vaamoli vitama ku mulima wa hitumbi, na Vakaanani vitama papipi na nyanja Meditelenia na pamuhana ya mfuleni Yoludani."

30 Kangi Kalebu avagunisi vandu palongolo ya Musa akajova, "Yikutigana tihamba kanyata na kuutola mulima wenuo kuvya yitu. Ndava muni tivii na uhotola wa kukita chenicho."

31 Nambu vandu vala veaalandini nawu kuung'omesi mulima vakajova, "Tihotola lepi kutovana na vandu avo, vene vana makakala neju kuliko tete." 32 Vakatumbula kudandasa malovi ga udesi pagati ya Vaisilaeli kuuvala mulima wevaung'omisi. Vakajova, "Mulima wula ukuvakoma vandu vaki. Mewa vandu vetivawene kwenuko mavandu. 33 Tivawene mavandu, vachiveleku va Anaki. Tete tajiweni ngati mambalanguli palongolo yavi, na ndi chevatiwene tete."