1 Kangi Vaisilaeli vagendili munjila selede ya Moabu na kuvika kambi kuupandi welihumila lilanga wa mfuleni Yoludani, na kulolesana na Yeliko.

2 Nkosi Balaki wa ku Moabu mwana wa Sipoli, agayuwini mambu goha gala Vaisilaeli gevavakitili Vaamoli. 3 Mwene pamonga na Vamoabu vakavya na wogoyi uvaha kuvavala Vaisilaeli, vavayogwipi neju ndava vavi vamahele. 4 Hinu Vamoabu vavajovili vachilongosi va Midiani, "Vandu nyomi ava kanyata yati uhalabisa kila chindu mumuhana yitu ngati ng'ombi yigosi cheyilya manyayi kumgunda." Ndava yeniyo, Balaki mwana wa Sipoli, mweavi nkosi wa ku Moabu lukumbi lwenulo, 5 ndi akapeleka ujumbi kwa Balaamu, mwana wa Beoli, kula ku Peholi, papipi na mfuleni Eufulate, kumulima wa Amawi. Amujovili Balaamu naha, "Kuvi na vandu vamahele kuhumili ku Misili, wene udandasiki kila pandu pamulima, kavili viyogofya kutola mulima wangu. 6 Hinu ubwelayi uvapela likoto vandu ava ndava yangu muni vavi na makakala kuliku nene. Pangi yati nikuvahotola na kuvavinga vakotoka kuyingila pamulima wangu, ndava muni nimanyili kuvya veve wakamumotisa mundu imotisiwa na wakamupela likoto mundu ipata likoto."

7 Hinu vachilongosi va Moabu na Midiani vakagega mashonga ga luhuna lwa ulondola, vakawuka kuhamba kwa Balaamu. Pevahikili, vamjovili Balaamu ujumbi wa Balaki. 8 Balaamu avajovili, "Kilu yeniyi mgona kunikuni, nene yati nikuvamanyisa gala geakunijovela Bambu Chapanga." Hinu ndi vilongosi vala va Moabu vakagona kwa Balaamu.

9 Kangi Chapanga ambwelili Balaamu, akamkota, "Ndi vayani ava vevavii pamonga na veve?"

10 Balaamu amyangwili Chapanga, "Balaki mwana wa Sipoli aniletili ujumbi kuvya, 11 kuvi na vandu kuhuma ku mulima wa Misili, vene vadandasiki kila pandu pamulima. Aniyupili nihamba kuvapela likoto vandu venavo muni pangi ihotola kutovana nawu na kuvavinga."

12 Chapanga akamjovela Balaamu, "Kotoka kuhamba pamonga na vandu ava, mewa kotoka kuvapela likoto vandu venavo muni nivamotisiwi."

13 Ndi lukela lwaki Balaamu ayumwiki, akavajovela vachilongosi va Balaki, "Muwuya kumulima winu, ndava muni Bambu Chapanga aganili lepi kuniyidakila kuhamba pamonga na nyenye." 14 Ndi vachilongosi va Moabu vakawuka, kuwuya kwa Balaki, vakamjovela, "Balaamu abelili kubwela pamonga na tete."

15 Kangi Balaki avatumili vachilongosi vangi, vamahele neju na vakulu kuliku vala va kutumbula. 16 Hinu venavo vahikili kwa Balaamu, vakamjovela, "Balaki mwana wa Sipoli ijova kuvya, ‘Kotoka kuyidakila chindu chochoha chila chikudivalila hati uleka kubwela kwangu. 17 Yati nikupela utopesa uvaha, na chindu chochoha cheukuniyupa yati nikupela. Bwela uvapela likoto vandu ava.’"

18 Nambu Balaamu avayangwili vatumisi va Balaki, "Hati ngati Balaki akanipela nyumba yaki ya unkosi kuni yimemili mashonga na dhahabu, nene nakuhotola kudenya mihilu ya Bambu Chapanga wangu kuvala lijambu loloha, yivya lidebe amala livaha. 19 Nambu chondi mgona bahapa kilu iyi ngati vala vayinu, na nene nipata kumanya chila cheakunijovela Bambu Chapanga kavili."

20 Hinu kilu yila Bambu Chapanga ambwelili Balaamu akamjovela, "Ndava muni vandu ava vabwelili kukukemela, uhamba pamonga nawu, nambu ukita ndu chila chenikujovela." 21 Ndi lukela Balaamu ayumwiki, akatandika chindu cha kutamila panani ya lipunda laki, akahamba pamonga na vachilongosi vala.

22 Nambu Chapanga ayomili neju ndava muni Balaamu avi mulugendu kuhamba kwa Balaki, ndi mtumu wa Chapanga, akamdivalila munjila. Lukumbi lwenulo Balaamu akwelili palipunda laki kuni avi pamonga na vatumisi vaki vavili. 23 Hinu lipunda lila lamuwene mtumu wa Chapanga ayimili munjila, akamwili upanga weutendekiwi ndava ya kuutumila. Ndava yeniyo akayileka njila, akahamba pamuhana. Balaamu akamtova punda yula muni awuya munjila. 24 Kangi mtumu wa Chapanga mwenuyo akalongolela kulongolo, akayima pandu pepavi na njila ngalingasi, pagati ya migunda yivili ya mizabibu na pandu pa luwumba pandi zivili. 25 Punda peamuwene mtumu wa Bambu Chapanga, akajumbalila kuluwumba na kuchihinya chigendelu cha Balaamu penapo. Ndava yeniyo Balaamu amtovili kavili punda mwenuyo. 26 Kangi mtumu wa Chapanga yula akalongolela kavili, akayima pandu pangalingasi pangali fwasi ya kupita kulyela amala kumangeya. 27 Punda peamuwene yula mtumu wa kunani wa Chapanga, ndi akagona pahi. Balaamu akamema ligoga, akamtova kwa ndonga yaki. 28 Penapo Bambu Chapanga akagubukula mlomo wa punda, ndi punda yula akamjovela Balaamu, "Nikukitili kyani hati unitovili mala zidatu?"

29 Balaamu akamyangula punda, "Veve unikitili nivya muyimu! Kuvya nivya na upanga nga nikukomili hinu naha!"

30 Punda akamjovela Balaamu, "Wu, nene lepi yulayula punda waku mweakugegili wumi waku woha mbaka ligono la lelu? Wu, niyovalili kukukitila namuna yeniyi?" Balaamu akayangula "Lepi."

31 Bahapo Bambu Chapanga akagagubukula mihu ga Balaamu, mwene ndi akamulola mtumu wa kunani wa Bambu Chapanga, ayimili panjila, akamwili upanga weutendekiwi kwa kutumila. Ndi Balaamu akajitaga pahi chakukupama. 32 Mtumu wa Chapanga akamjovela Balaamu, "Ndava kyani umtovili punda waku mala zidatu? Nibwelili kukudivalila, ndava muni njila yaku yihakahu. 33 Punda waku aniweni na kuniyepa mala zoha zidatu. Ngaikotoka kuniyepa chakaka nganikukomili veve na kumleka mumi punda waku."

34 Balaamu akamjovela mtumu wa kunani wa Chapanga, "Nibudili muni namanyili lepi ngati uyimili panjila na kunidivalila. Hinu ngati yikukuganisa lepi nene kuyendelela na lugendu ulu yati niwuya kunyumba."

35 Nambu mtumu wa kunani wa Chapanga akamjovela Balaamu, "Hamba na vandu ava, nambu yati ujova gala ndu genikujovela." Hinu Balaamu ndi akayendelela na lugendu pamonga na vachilongosi va Balaki.

36 "Balaki peayuwini kuvya Balaamu ibwela, akawuka kuhamba kumpokela kumuji wa Ali wewavili mumihana ya mfuleni Alinoni kumbaka wa Moabu. 37 Balaki akamjovela, Balaamu, ndava kyani ubwelili lepi kanyata penakukemili? Wu, waholalili kuvya yati nikukupela lepi mashonga gamahele?"

38 Balaamu akamyangula Balaki, "Hinu nibwelili, hinu Balaamu akamyangula Balaki Hinu nibwelili! Nambu wu, nina uhotola wa kujova chocchoa ndu? Lijambu leakunijovela Chapanga ndi lenijova." 39 Hinu, Baalamu akahamba pamonga na Balaki mbaka kumuji wa Kiliati Husoti. 40 Kwenuko Balaki akahinja ng'ombi na limbelele kuvya luteta na nyama zingi akavagavila vilongosi vaki vevavii pamonga nayu na Balaamu.

41 Chikau yaki Balaki amtolili Balaamu, akahambayu mbaka Bamoti Baali kuhuma kwenuko Balaamu ahotwili kuvawona Vaisilaeli vangi.