1 Bambu Chapanga avapelili Musa na Aloni malagizu aga, 2 "Vaisilaeli yati vivika kambi zavi, kila mmonga itama pepavi na Bendela yaki, pepavi na ulangisu wa vandu va munyumba yaki. Yati vitama penapo kulitindila Lindanda la Musopi."

3 Vala vevivika kambi upandi kwe lihumila lilanga kulola kwelihumila lilanga yati vivya va chikundi cha vandu vevavi pahi ya bendela ya Yuda na chilongosi wavi yati ivya Nashoni mwana wa Aminadabu, 4 Likundi laki lina vandu vevavalangiwi vagosi elufu sabini na mcheche na miya sita. 5 Vala vevigelekela kujenga kambi ndi vandu va likabila la Yuda yati vivya va likabila la Isakali, chilongosi wavi yati ivya Netaneli mwana wa Suali, 6 Likundi laki yati livya na vandu vevavalangiwi vagosi elufu hamusini na mcheche na miya mcheche. 7 Yati ligelekela likabila la Zebuluni, chilongosi wavi yati ivya Eliabu mwana wa Heloni, 8 Likundi laki yati livya na vandu vevavalangiwi vagosi elufu hamusini na saba na miya mcheche. 9 Jumula ya vandu voha vevivya pakambi ya Yuda kuwanangana na misambi yavi ndi vandu laki yimonga na elufu semanini na sita na miya mcheche. Venavo ndi vevilongolela mulugendu.

10 Upandi wa kusini, vala vevavi pahi ya bendela ya chikundi cha Leubeni kuwanangana na misambi yavi, chilongosi wavi avi Elisuli mwana wa Shedeuli, 11 likundi laki lavili na vandu vevavalangiwi vagosi elufu alobaini na sita na miya mhanu. 12 Kangi vala vevibwela kutama pamuhana na kambi ya vandu va Lubeni vene ndi vandu va likabila la Simeoni, chilongosi wavi yati ivya Shelumieli mwana wa Suli Shadai, 13 likundi laki lavii na vandu vevavalangiwi vagosi elufu amusini na tisa na miya zidatu. 14 Likabila la Gadi yati ligelekela. Chilongosi wa vandu va Gadi ndi Eliasafu mwana wa Deueli. 15 Likundi laki lavili na vandu vevavalangiwi vagosi elufu alobaini na mhanu na miya sita na hamusini. 16 Vagosi veviva pa Lindanda la Leubeni kuwanangana na hikundi yavi ndi vandu laki yimonga na hamusini na yimonga na miya mcheche na hamusini. Venava ndi vevagelakili mulugendu lwa pili.

17 Kangi kambi ya Valawi na pa Lindanda la Musopi, lavi pagati ya kambi zoha, na kuni vagegili Lindanda lenilo la kukonganekela, yati viwuka, kila chikundi yati chigenda kulanda fwasi yaki pahi ya bendela yavi.

18 Kwa upandi welitipama lilanga, vala vevavi pahi ya bendela ya likundi la Efulaimu yati vitama kuwanangana na hikundi yavi, chilongosi wavi yati ivya Elishama mwana wa Amihudi, 19 likundi lavi lavii na vandu vevavalangiwi vagosi elufu alubaini na miya muhanu. 20 Likabila la Manase yati ligelekelea mumbele ya Efulaimu. Chilongosi wa vandu va Manase ndi Gamalieli mwana wa Pedasuli. 21 Likundi laki lavii na vandu vevavalangiwi vagosi elufu selasini na zivili na miya zivili. 22 likabila la Benyamini yati ligelekela mumbele ya Manase. Chilongosi wa vandu va Benyamini ndi Abidani mwana wa Gideoni, 23 Likundi laki lavii na vandu vevavalangiwi vagosi elufu selasini na mhanu na miya mcheche. 24 Jumula ya vandu vevivya pa kambi ya Efulaimu kuwanangana na hikundi yavi ndi vandu laki yimonga na elufu nane na miya yimonga. Likundi lenilo la Efulaimu yati livvya likundi la datu mukugenda.

25 Kwa upandi wa kaskazini, yati kuvya ma misambi ya kambi ya Dani, chilongosi wavi yati ivya Ahiezeli, mwana wa Amishadai, 26 Likundi laki lavii na vevavalangiwi vagosi elufu sitini na zivili na miya saba. 27 Kangi vala vevigelekelela pahali pavi ndi vandu va likabila la Asheli, chilongosi wavi ndi Pagieli mwana wa Okilani. 28 Likundi laki lavii na vevavalangiwi vagosi elufu alobaini na yimonga na miya mhanu. 29 Likabila la Nafutali yati ligelekela. Chilongosi wa vandu va Nafutali ndi Ahila mwana wa Enani, 30 Likundi laki lavii na vevavalangiwi vagosi elufu hamusini na zidatu na miya mcheche. 31 Jumula ya vandu vevivya pa kambi ya Dani kuwanangana na hikundi yavi ndi vandu laki yimonga na elufu hamusini na saba na miya sita. Chikundi chenichi cha Dani yati chivya mulugendu lwa mwisho mulugendu.

32 Venavo ndi Vaisilaeli vevavalangiwi kuwanangana na vandu va mnyumba zavi, pakambi na hikundi hyavi, voha vavi vandu laki sita na elufu zidatu na miya mhanu na hamusini. 33 Nambu Valawi vavalangiwi lepi pamonga na Vaisilaeli vayavi ngati Bambu Chapanga cheamlagizili Musa.

34 Chenichi ndi Vaisilaeli chevakitili kila chindu ngati Bambu Chapanga cheamlagazili Musa. Vavikili kambi zavi kulandana na bendela zavi na vawukili kila mmonga kulongosana na lukolo lwaki na vandu vaki.