1 Makabila ga Lubeni na Gadi vavii na mifuya yamahele neju. Hinu, pevawene kuvya pandu pa Yezeli na pandu pa Gadi pabwina kwa mifuya, 2 Ndi vamhambili Musa na mteta Eliazali na vachilongosi va Vaisilaeli, vakavajovela, 3 "Miji ya Ataloni na Diboni na Yazeli na Nimla na Heshiboni na Eleale na Sebamu na Nebo pamonga na Beoni, 4 mulima wenuo Bambu Chapanga auhotwili ndava ya vandu va Isilaeli, ndi mulima wabwina kwa mifuya, tete tivi na mifuya yamahele neju. 5 Hinu ngati mukutiyidakila, tikuvayupa mulima uwu uvya witu, mkoto kutikupusa kumwambu ya mfuleni Yoludani."

6 Musa akavayangula vandu va makabila ga Lubeni na Gadi, "Wu, mwigana kusigalila bahapa kuni valongo vinu Vaisilaeli vihamba kungondo? 7 Ndava kyani mukuvatotokisa Vaisilaeli vakato kuhamba kumlima wula Bambu Chapanga avapelili? 8 Chenicho ndi chevakitili vagogo vinu pala penavatumili kuhuma Kadeshi Balinea kuhamba kuung'omesa mulima. 9 Vene vahambili mbaka kulikemba la Eshikoli, vauwene mulima nambu pevawuyili vavatotokisi wa Vaisilaeli, muni vakoto kuyingila ku mulima wevapewili na Bambu Chapanga. 10 Ligono lenilo Bambu Chapanga akamema ligoga, ndi akalapa akajova, 11 ‘Chakaka kawaka mundu yeyoha pagati ya vandu vevahumili ku Misili mweavi na miyaka ishilini na neju mweakuuwona mulima wenalapili kuvapela Ibulahimu na Isaka na Yakobo. Nambu vene vaniyuwanili lepi.’ 12 Voha vakuyilola lepi, nga Kalebu mwana wa Yefune mundu kuhuma lukolo lwa Kenizi, na Yoshua mwana wa Nuni, muni vene vaniyuwanili njwe. 13 Bambu Chapanga akamema ligoga ndava ya Vaisilaeli, ndi akavakita valyungalyunga kulugangatu kwa miyaka alobaini, mbaka chivelaku chila choha chechambudili palongolo yaki chafwili. 14 Ndi hinu nyenye cheveleku cha Leubeni na Gadi ndi mukita galagala gevakitili Vagogo vinu na kumkita Bambu Chapanga avayoma. 15 Ngati nyenye mwibela kumlanda, mwene yati akuvaleka kavili kulugangatu, na nyenye yati mwikita vandu ava voha voyongomela."

16 "Hinu vachilongosi vakamhambila Musa, vakamjovela, Utiyidakila hoti tivajengela mifuya yitu vivaya na miji yeyina ngomi ndava ya vana na vadala vitu. 17 Nambu tete tijitendelekili kutola vindu vitu vya kukomanila ngondo, kulongolela kulongolo ya Vaisilaeli mbaka petukuvahikisa pandu pevitama. Lukumbi ulo Vadala na vana vitu vitama pamiji yeyivi ngomi, ndava ya kujivikila ulonda kwa vakolonjinji va mulima. 18 Yati tiwuya lepi kunyumba mbaka kila Muisilaeli italalila pandu paki peagaviwi. 19 Yati titola lepi ndima yoyoha kumwambu ya mfuleni Yolodani, ndava tete tipatili pandu pitu kuni upandi welihumila lilanga."

20 Kangi Musa akavajovela, "Ngati chakaka yati mwikita ngati chamjovili, ndi bahapa palongolo ya Bambu Chapnga mtola vindu vunu vya ngondo na kuhamba kungondo. 21 Kila mundu winu wa ngondo yati ikupuka mfuleni Yoludani kuni muvi pahi ya ulongosi wa Bambu Chapanga, yati mukuvatova makoko vitu mbaka Bambu Chapanga avahotola, 22 na kutalali mulima. Mkamala kukita chenicho yati mwiwuya, muni yati mwivya mumali lihengu linu, kwa Bambu Chapanga na valongo vinu Vaisilaeli. Kangi Bambu Chapanga yati iyidakila mulima uwu wa kwelihumila lilanga wa ku Yoludani kuvya utalalila winu. 23 Nambu nikuvalangisa kuvya ngati mtikitili lepi gemukugajova, yati mukumbudili Bambu Chapanga, chakaka mmumanya kuvya yati mwibuniwa. 24 Hinu muvajengela miji vadala na vana vinu na vivaya mifuya yinu, nambu mkita ngati chemuahidi."

25 Kangi vandu va makabila ga Gadi na Lubeni vakamjovela Musa, "Tete tavatumisi vaku yati tikita ngati cheutilagizi. 26 Vadala vitu na vana vitu pamonga na misambi ya mene na mambelele na ngo'mbi zitu yati visigalila bahapa pamiji ya Gileadi. 27 Nambu tete tavatumisi vaku tijitendekili kuhamba kungondo pahi ya ulongosi wa Bambu Chapanga. Yati tikupuka mfuleni Yoludani na kutovana, ngati cheutijovili."

28 Kangi Musa akavalagiza mteta Eliazali na Yoshua mwana wa Nuni na vachilongosi va vandu va makabila ga Vaisilaeli kuvavala vandu va. 29 Musa akavajovela, "Ngati vandu va Gadi na Valubeni vakakupuka mfuleni Yolodani pamonga na nyenye kuni vagegi vindu vyavi vya kumanila ngondo, pahi ya ulongosi wa Bambu Chapanga, mukahotola na kutola mulima wenuwo, ndi yati mukuvapela mulima wa Vageleadi uvya wavi. 30 Nambu ngati vakupwiki lepi mfuleni Yoludani na kuwungana na nyenye kuhamba kutovana ngondo pamonga na nyenye, ndi yati vitalalila mulima wa Kanaani pamonga na nyenye."

31 Vandu va likabila la Gadi na Valubeni vakayangula, "Bambu, tete yati tikita ngati Bambu Chapanga cheatijovili tete tavatumisi vaku. 32 Pahi ya ulongosi waki Bambu Chapanga, yati tikupuka na vindu vya ngondo vitu mbaka mulima wa Kanaani, nambu mulima wetipewili penapa kwelihumila lilanga mwa mfuleni Yoludani yati yivya witu."

33 Hinu Musa akavapela vandu va makabila ga Gadi na Lubeni na yapinga ya likabila la Manase mwana wa Yosefu, mulima woha wa nkosi Sihoni wa Vaamoli na mulima wa nkosi Ogu wa Bashani pamonga na miji yeyivili mumuhana ya mulima yeniyo. 34 Vandu va likabila la Gadi vajengili miji ya Diboni na Ataloti na Aloeli, 35 pamonga na Atoti Shofani na Yazeli na Yogobeha, 36 na Beti Nimla na Beti Halani, miji yetindiwi luwumba ngangali, yeyina vivaya vya mene na mambelele. 37 Vandu va likabila la Lubeni vajengilli miji ya Heshiboni na Eleale na Kiliataimu, 38 Nebo na Baal Meoni, mahina ga miji yeniyo gabadilishwi, na Sibina. Miji yevajengili vayipeli mahina gangi.

39 Vachiveleku va Makili, mwana wa Manase, vauzangili mulima wa Gileadi, vakatola na kuvavinga Vaamoli vevatamayi penapo. 40 Ndava yeniyo, Musa akavapela vandu va lukolo lwa Makili mwana wa Manase, mulima wa Gileadi na vene vakatama penapo. 41 Yaili wa likabila la Manase, azangili na kuvitola hijiji ya Gileadi na kuvikemela liina Hawoti Yaili mana yaki hijiji ya Yaili. 42 Mwene Noba azangili na kuyitola Kenati na hijiji yaki, na mwene akaukemela mulima wenuwo Noba ndi liina laki mwene.