1 Aghu ndo ulongohi ghwa Nhalo ghwa Maha ghwa Yesu Kilisto, Mwana ghwa Chapanga 2 Ghukiyanda handa payityekwite mukitabho kya mbuye ghwa Chapanga ywakakemitwe Isaya,

"Chapanga kakighomba ‘Nannlaghiha ndumitumi ghwangu muulongolo ghwako

katayitendekeha njila yako.’

3 Lilobhe lya mundu lingukema kukibhala;

‘Muyitendekhe njila ya Bambo,

muyighololehe ndyangilo yake.’ "

4 Yohana yunakubatisa kakibwitukila kukibhala, pakabatisa na kubhalandamiha bhandu pakighomba, "Mulipetule kyakya ulemwa ghwenu na mbatiswe na mwene Chapanga kataghulekekeha ulemwa ghwenu." 5 Bhandu atangalo bhakinng'endela kuhuma ku nnima ghwa Yudea na bhoha bha kitami kya Yelusalemu bhakinng'endela na bhakilipetula uhokelo ghwabhe naywo kakiabatisa mulukemba lwa Yoludani.

6 Yohana kakihwala lipinda litendekehitwe kwa mayuni gha nnyama ywakakemitwe ngamia na nkungi ghwa liyula mukibhuno kyake. Hilyo hyaki hikibhegha mapalala na bhuchi. 7 Naywo Yohane kakialandamiha bhandu pakaaghombela "Ywakapala kuhika mbole ya nenga kabhegha na makakala makulu kupitingana kwa nenga, nenga yiteghekwa ng'obhe hokame na kulegheha ngoyi gha makobasi ghake. 8 Nenga ndabhabatisa kwa machi, peni ywombe kataabatisa kwa Nhuki ghwa Chapanga."

9 Mumanjubha agho Yesu kakihika kuhuma Nasaleti kitami kya ku Galilaya naywo kakibatiswa na Yohana mulukemba lwa Yoludani. 10 Kamu Yesu pakahumite mumachi, kakibhona luhingu lukiyughuka na Nhuki ghwa Chapanga kakinhulukila unani ghwake handa ngunda. 11 Lilobhe likiyihwanika kuhuma kunani; "Ghwenga ndo! Mwana ghwangu yunughupala nungunoghelwa na ghwenga."

12 Pala pala! Nhuki ghwa Chapanga kakinlongoha kughenda kukibhala, 13 kakitama akwo manjubha alobaini kunu pakang'ehwa na Nchipila, kakibhegha papamu na anyama bha kunhitu, nabho mahoka bha Chapanga bhakihika kuntumikila.

14 Yohana pakabhopwite kukibhopo, Yesu kakighenda ku Galilaya, kakiyanda kulandamiha Nhalo ghwa Maha ghwa Chapanga, 15 kunu pakaghomba, "Uhiko uhika kala, na Ghubhutwa ghwa Chapanga ghunguheghelela; Mulipetule na kuhyubhalila Nhalo ghwa Maha ghwa Chapanga."

16 Yesu pakabheghite mukutyanga mumbwegha ya lihibha lya Galilaya, kakiabhona Simoni na Andelea nnongo ghwake paatagha njaho hyabhe mulihibha; mana bhakibhegha aghomeha homba.Mundu kangughomeha homba kwa njaho 17 Yesu kakiaghombela, "Munhikile, na nenga ndabhahunda kunnyeghela bhandu handa aghomeha homba paayegha homba." 18 Pala pala, bhakiyileka njaho hyabhe na bhakintughila.

19 Pakatyangite kya mandina, kakiabhona Yakobu na Yohana, bhoha bhana bha Sebedayo. Nabho bhubho bhakibhegha mubhwato, paatandambuha njaho hyabhe. 20 Pala pala, kakiakema, nabho bhakinleka tate ghwabhe Zebedayo mubhwato papamu na andumitumi bhabhe, bhakighenda na kuntughila Yesu.

21 Yesu na ahundwa bhake bhakilongohana mbaka ku Kapelinaumu, palihikite linjubha lya kupumulila Yesu kakiyingila mu kitutubhi kya kukonganila Akaayahudi, na kakiyanda kuhunda. 22 Bhandu bhakikangacha munu kya mahundo ghake, mana kakibha mukubhahunda handa mundu yuna makakala, kiyaha kakilihwana ng'obhe na ahunda bha malaghilo.

23 Peni apo, pakibhegha mundu yunamandilo mu kitutubhi kya ngonganilo yabhe, naywo kakikyota kyobho 24 "Ghuna niki na twenga Yesu ghwa Nasaleti? Ghuhika kutukanjaghana? Manya kukita ghwenga ndo! Ghani, Nng'anyimo ghwa Chapanga!"

25 Yesu kakinlakalila, pakighomba, "Ghunyamale, Na ghunneke mundu ayu."

26 Ghala mandilu ghakinnyukayuka kakikyota kyobho na kakinmuka. 27 Bhandu bhoha bhakikangacha na kukonyekehana, "Ayi ndo mihalo ghani? Ndo Mahundo gha hyono? Kangi ghana makakala gha utabhala kanguakwilikiha mandilo nabho bhangu nnyitikila!"

28 Mihalo yake yikikwila kanongola nongola mumilima hyoha ya Galilaya.

29 Bhakibhuka mu kitutubhi kya kukonganila bhakighenda papamu na Jakobu na Yohana mbaka kulubhagha lwa Simoni na Andelea. 30 Na ma ghwa nhumbu ghwa Simoni kakibha na nhehemela tepatepa paulili, bhakinkambukiha Yesu mihalo yake. 31 Ndo Yesu kakinng'endela, na kunkamula kibhoko na kunnyinula. Mbole nhehemela ghukinnekekeha, naywo kakiyanda kuakeyela.

32 Payihikite makimuhi, na luchubha palutipikiti, bhakinng'eghela Yesu bhandu bhananhehemela na bhaakwelitwe na mandilo. 33 Bhandu bhoha bha kitami kila bhakikwemukila paulongolo ghwa kitutubhi kya Simoni. 34 Yesu kakialamiha atamwa atangalo na bhana mihehemela nhanganganiko na kakiabhuha mandilo atangalo, peni kakibhaleka ng'obhe ghala mandilu bhaghombe kiyaha bhakimanya kukita ywombe ndo ghani.

35 Malabhila putiputi pangeha kukali na lubhindu, Yesu kakibhuka ngati kaghende panga bhandu kakan'tundamile Chapanga. 36 Simoni na ayake bhakighenda kunpalaha, 37 Paammonite, bhakinng'ombela "Bhandu bhoha angughupalaha!"

38 Yesu kakiayanga, "Tughende pamoo pangi pa hitami hya nng'eghela, ngalandamihe na akwo nakwo, kiyaha akyo ndo kinikihikilite."

39 Kakitindila Galilaya hyoha, kakilandamiha muhitutubhi ya kukonganikila Akaayahudi na kughabhuha mandilo.

40 Mundu yumu ywakabheghite na maloha kakinng'endela Yesu, kakinchutamila mayughwa na kunnyupa, na kung'ombela, "Paghupala, ghwahotola kunghulula!"

41 Yesu kakimmonela luhungu, kakigholoha kibhoko kyake kakinnyabhika kunu pakanng'ombela "Ningupala ghululika!" 42 Kamu maloha ghakinbhuka naywo kakighululika. 43 Mbole ya kunkanikiha, Yesu kakinlekekeha kaghende kunu pakanng'ombela 44 "Ghukotoo kunng'ombela mundu ywoheli yula mihalo ayi peni ghughende ghukalilahe kwa ndundame bha Chapanga na ghukatule matulo kya kughululikwa kwako handa pakakwilikihite Musa yibhe uyimiho kwa bhombe kukita ghulama."

45 Peni yula mundu kakibhuka kakiyanda kualubhulila bhandu mihalo ya kulamihwa kwa mwene kya nga uhiho. Hinu Yesu kakilepelwa kuyingila kangi mumilima kya nga uhiho, peni kakitama panje ya kitami mbande ya nga bhandu. Hata naha bhandu bhakintughila Yesu kuhuma mumbande hyoha.