1 Yesu kakiyanda kughomba nabho kwa mandambulo, pakibhaghombela, "Mundu yumo kakikanda nng'unda ghwa misabibu, kakichenga lubhigho kughutindila ghula ng'unda, na kakitendekeha pa kukama sabibu, hilahila kakichenga kilingo na kakiapegha bhandu bhanpeghe sumu, ywombe kakibhuka kughenda kunnima ghungi.Bhandu abhili bhangukama sabibu pa kukamila difwai 2 Mumanjubha gha mabeno kakinlaghila nndumitumi ghwake kwa bhala akulima bhake kakatole lusumulo lwake. 3 Bhala akandakanda bhakinkamula yula nndumitumi, bhakintuta na bhakinbhuyiha mabhoko gha yaghi kya nga kilibhi. 4 Kangi yula nkola nngunda kakinlaghila nndumitumi yungi kwa bhombe, bhala akandakanda bhakintuta mumutwe na kuntendela mihalo ya honi. 5 Kangi yula nkola nng'unda kakinlaghila nndumitumi yungi, aywo bhakinkoma. Kakialaghila andumitumi bhangi atangalo, bhala akandakanda bhakiatuta bhala andumitumi na amoo bhangi bhakiakoma. 6 Nkolang'unda kakihighala na mundu yumo ndundundu ghwa kunlaghiha, aywo ndo mwana ywakanpaliti. Muuhiko kakinlaghila pakaghomba, ‘Bhatanhokamila mwana ghwangu.’ 7 Peni bhala akandakanda bhakighombana, paakighomba, ‘Aywo ndo yunakuhala, nhiki tunkome, na lipala lyake lya bhegha lyetu.’ 8 Ndo bhakinkamula, bhakinkoma na kuntagha panje ya ghula ng'unda ghwa misabibu."

9 Yesu kakiakonya "Munguhwacha yula nkolang'unda katatenda niki? Katahika na kubhakoma bhala akandakanda, mbole katabhapegha akandakanda bhangi ghula ng'unda ghwa misabibu. 10 Mukisoma ng'obhe Matyeko agha,

‘Liganga bhalilemite bhana utendehi ghwa kuchenga

hinu libhegha liganga likulu lya pambwegha;

11 Bambo kaghutenda nhalu aghu

nayo ndo ngangahyo mumehu ghetu!’ "

12 Akulu bha mandundame, ahunda bha malaghilo na aghohi pabhamanyite kukita kakighomba ndambulo yila kwa kya bhombe bhakipala kunkamula, peni bhakiluyoghopa lula lumati lwa bhandu. Bhakinneka na bhakibhuka.

13 Mbole, bhakialaghila Akaafalisayo na kimati kya Helode ngati bhanhikile Yesu bhantyeghe kwa mihalo yake. 14 Bhaking'endela Yesu bhakinng'ombela, "Nhunda, tungumanya kukita ghwenga ghu mundu ghwa kuyubhalilwa ghunakulongela hoto. Ghunguayoghopa ng'obhe ukulu ghwa bhene, peni ghwenga ghunguhunda hoto ya Chapanga telatela. Hinu yinguteghekwa kunpegha mutwa nkulu ghwa Akaaloma kodi ebu ng'obhe? Hinu tunpeghe ebu tukotoo kunpegha?"

15 Peni Yesu kakimanya ufyangu ghwa bhombe na kakiakonya, "Bhuli mukupala kuntyegha? Munyeghele ayo ngalabha niyilole."

16 Bhakinnyeghela ngalabha na mwene kakiakonya, "Kibhungi aki na lihina lityekitwe ali lya ghani?" Bhene akinnyanga "Ndi lya Mutwa nkulu ghwa Akaaloma."

17 Ndo Yesu kakiaghombela, "Munmpeghe Mutwa nkulu ghwa Akaaloma hya kya mwene na Chapanga hya kya Chapanga." Na bhene bhakibhughanikwa muno naywo.

18 Mbole, Akaasadukayu, bhala bhanakughomba kahone uhyuko bhakinhikila Yesu na bhakinkonya, 19 "Nhunda, Musa kakitutyekela kukita handa mundu pakahwegha na kunleka nndala kya nga mwana, ndo nlongo ghwake katantolela yula nndala nnekwa ngati kakanpapile nnongo ghwake bhana. 20 Ndo bhakibhegha alongo nhano na abhili. Yula ghwa ulongohi kakitolela nndala na kakihwegha kya nga mwana ywohele. 21 Ghwa ubhili kakinhala yula nnekwa peni naywo kakihwegha kya nga kunneka mwana ywoheli, yikibhegha ubhwabhu abhu kwa yula ghwa ndatu. 22 Ndo bhoha nhano na abhili muulongo ghula bhakighwegha kya nga kunneka mwana na muuhiko ghwa hyoha na yula nndala kakihwegha. 23 Ngati hino, palisiku lya bhandu kuhyuka, nndala yula katabhegha ghwa ghani kiyaha kakitolelwa na alongo bhoha nhano na abhili?"

24 Yesu kakiayanga, "Mwenga munguhokela kiyaha mungumanya ng'obhe Matyeko Mang'anyimo ebu ngwiliho ya Chapanga. 25 Bhaahweghite paalonda kuhyuka, kahone kutolela ebu kutolelwa kiyaha bhatabhegha handa mahoka bha Chapanga. 26 Na kwa mihalo ya kya uhyuko ghwa bha aghweghite, nde nsoma ng'obhe mu kitabho kya Musa akwo Chapanga pakalongilite na Musa kuhuma mukiputila kiyakiteghe mwoto pakaghomba, ‘Nenga ndo Chapanga ghwa Ibulahimu, na Chapanga ghwa Isaka na Chapanga ghwa Yakobu.’ 27 Hinu, mwene ndo Chapanga ghwa aghweghite ng'obhe ngati ndo Chapanga ghwa bhanakukeka. Mwenga nhokela muno!"

28 Nhunda yumu ghwa malaghilo kakihika na kakiyihwa paaghombaniti. Kakibhona kukita Yesu kakiayanga tela bhala Akaasadukayo, naywo kakinkonya, "Mungwilikiho hyoha yibheghite ngulu ndo yoki?"

29 Yesu kakinnyanga. "Nnyihwanile mwenga bhandu bha Isilaeli, ngwiliho ngulu ndo ayi, Bambo Chapanga ghwetu, ndo Bambo yumo. 30 Ghunpale Bambo Chapanga ghwako kwa mwoyo ghwako ghwoha na kwa nhuki ghwako ghwoha na kwa mahala ghako ghoha na kwa makakala ghako ghoha. 31 Na ya kabhili ndi ayi, ghunpale nng'eghela ghwako handa mughulipala ghumwene, kahone ngwilikiho yingi ngulu kupitingana kwa ahi."

32 Yula nhunda ghwa malaghilo kaking'ombela Yesu, "Kulyaghila nhunda ghuyanga maha kukita Chapanga ndo yumu kahone yungi ngati nga ywombe. 33 Kunpala Chapanga kwa mwoyo ghwoha na kwa mahala ghoha na makakala ghoha na kunpala nng'eghela ghwako handa mughulipala ghumwene ndi tela kya na lumu kulandana ng'obhe na kuyambika nyambi ya kuyocholela na matulo."

34 Naywo Yesu pakabhonite kukita kakiyanga kwa mahala, kaking'ombela, "Ghwenga ghubhegha kutali ng'obhe na Ghubhutwa ghwa Chapanga." Kuyandila pala kahone mundu ywakayighite kunkonya Yesu nkonyo kangi.

35 Yesu pakabheghite mukuhunda akwo ku Kitutubhi kya Chapanga kakikonya, "Yibha bhuli ahunda bha malaghilo angulongela kukita Kilisto ywakahaghulitwe na Chapanga ndo Mwana ghwa Daudi? 36 Mana Daudi mwene kakikambuka pakalonguhitwe na Nhuki ghwa Chapanga pakighomba.

‘Bambo kaking'ombela Bambo ghwangu,

ghutame mu kibhoko kyangu kya nnilo,

mbaka panonda kubhabhika amyanja bhako pahi ya ngwiliho yako.’

37 Daudi mwene kangunkema Kilisto ywakahaghulitwe na Chapanga, ‘Bambo’ yabhegha bhuli hino ywombe kabhe mwana ghwake?"

Lula lumati lwoha lwa nbhandu bhakinnyihwa kwa uyelelo 38 Yesu pakabheghiteghe mu kuahunda, kakilongela, "Mulindakile na ahunda bha malaghilo. Bhombe apalagha kutyanga paahwala mapinda matandamaho na kulamuhwa kwa kuhokamilwa mu hindandabhanji, 39 na kutama muhitebho hya kuulongolo mu Kitutbhi kya kukonganila Akaayahudi na muhitebho hya ulongolo mu chekwa. 40 Anguapugha ahumbu alekwa kunu bhangulikupukiha kulandulila malandulo matandamaho lisiku lya uhiko kyabhabhona kimbamanda kikulu!"

41 Mbole Yesu kakitama ugheghela na kipalamande kya abhikiteghe matulo, kakilulolekeha lumati lwa bhandu pa abheghite mukubhika ngalabha mulijamanda lya kitutubhi kya Chapanga. Na bhana utopelo atangalo bhakiyingiha ngalabha nyoloho. 42 Peni nndala nlekwa yumo kapukwa, kakihika na kakibhika ngalabha ibhili njoko hya lihabha. 43 Yesu kakiakema ahundwa bhake kakiaghombela, "Kulyaghila nunguaghombela nndala nlekwa ayu kapukwa kabhika ngalabha nyoloho mulijamanda lya nyambi kupitingana kwa bhangi bhoha bhabhikiti. 44 Kiyaha bhangi bhoha bhakibhika uyonjokeho ghwa mota hyabhe, peni ayu nhumbu nlekwa mu ukapukwa ghwake kakitola hyoha hyakabheghite nahyo hata kila kyakakipalite nde kya kulama."