1 Nsáa yaŋ yi shɛ́ŋ, keefɛ sege muh duu lɛ fiɛɛ fì wu jɛme ja nyu fɛ Kiyo ki Nyo le, bɛŋ mo bɛŋ bɛɛŋ lo gɛ. Bɛŋ môŋ kiyo kiyu bɛŋ yɛ̂ŋ laa le ki Nyo la. Njɛme nɛ nje bamii ba mbiane lɛ bo le bamii ba ntuŋ wu Nyo le bo bu wa bo gɛɛŋ yi woŋ kfunɛ le wesee. 2 Fiɛɛ fì taŋlo fi ge bɛŋ kɛɛ Kiyo kì le ki Nyo ye yi muh le le finɛ: Muh wuchii wù jɛme bɛ jwe we lɛ Jiso Kletu gɛ̀ be wu to fɛkuu fɛnɛ njɛ muh wu wuŋ, le wɛɛ wù kɛme Kiyo ki Nyo. 3 Muh wuchii wù jɛme gɛ noo kune Jiso gɛ, le wù kɛme kiyo nyu gɛ ki Nyo gɛ. Kinɛ kiyo le ki muh wu kimbanɛ wu Kletu wù bɛŋ gɛ̀ yu wa lɛ wu lé wu gê wu tô, mɛɛse wu le wa yi woŋ kfunɛ le. 4 Booŋ baŋ, bɛŋ le bamii ba Nyo, bɛŋ le bɛŋ so wa bamii bayu. Bɛŋ so nje Kiyo kì le yi ye yene le, ki fede ki yi woŋ kfunɛ le. 5 Bobaa bamii le ba yi woŋ kfunɛ le. Noo mwɛɛ mù bo jɛme le mu yi woŋ kfunɛ le, bamii ba le ba yi woŋ kfunɛ le yuge bo le. 6 Besabɛŋ le fiesa bamii ba Nyo. Muh wuchii wù kee Nyo yuge bee le, wù le gɛ muh wu Nyo gɛ, gɛ wu yuge fie bee le gɛ. Finɛ le fiɛɛ fì gee fɛ besabɛŋ kee kiyo kì le ki muh wù nchiɛɛŋ bɛ ki muh wu chimbiaŋ.

7 Nsáa yaŋ yi shɛ́ŋ, besabɛŋ kôŋe muh lɛ muh, nje kiŋkoŋɛ le fiɛɛ fi Nyo. Muh wù koŋe muh mu, le mboyɛ wu Nyo, wu kee Nyo. 8 Muh wù koŋe gɛ muh mu gɛ, le wu kee gɛ Nyo gɛ. Fi le noo nje Nyo le Nyo wu kiŋkoŋɛ. 9 Yinɛ le je yì Nyo gɛ̀ dunyɛ kiŋkoŋɛ ke fɛ besabɛŋ le yu: Wu gɛ̀ bee wu tuŋ Mwa ye kagɛ wu yi woŋ kfunɛ le, wu lɛ besabɛŋ taŋlo be kɛme kinche fede yi ye ye le. 10 Fi finɛ le fiɛɛ fì ba tɛŋe lɛ kiŋkoŋɛ. Gɛ nyu lɛ gɛ̀ koŋ besabɛŋ Nyo gɛ. Gɛ̀ koŋ Nyo bee, wu tuŋ Mwa ye lɛ wu tô wu gê kimaaŋ fɛ bimbefɛ biɛsa besabɛŋ le.

11 Nsáa yaŋ yi shɛ́ŋ, no Nyo gɛ̀ koŋ besabɛŋ yinɛ je le nɛ, besabɛŋ tɛ kɛme ki be kôŋe muh lɛ muh. 12 Gɛ muh nyu yu wù gɛ̀ yu wa wu yɛŋ Nyo le gɛ. Besabɛŋ nɛ koŋe lo, Nyo nyume segechii yi ye yese besabɛŋ le, kiŋkoŋɛ ke nyu yi ye yese besabɛŋ le gɛɛne mɛɛse.

13 Besabɛŋ kêe lɛ bee le yi ye ye le segechii wu nyu yi ye yese besabɛŋ le, nje wu le wu nya bee bɛ Kiyo ke. 14 Bee gɛ̀ yɛŋ bee mo bee sɛŋe bamii le lɛ Nyo wu Chii gɛ̀ bee wu tuŋ Mwa ye lɛ wu to wu nyume Mbvusɛ wu woŋ kfunɛ. 15 Mo nyu yɛɛŋ wù duu bɛ jwe we lɛ Jiso le Mwa Nyo, tu Nyo le yi mwɛdɛ le, wu nyu tɛ yi Nyo le. 16 No fi le noo, bee mo be kɛɛ bee bɛɛŋ kiŋkoŋɛ kì Nyo kɛme fɛ besabɛŋ le.

Nyo le Nyo wu kiŋkoŋɛ, muh wù chee yi kiŋkoŋɛ le, wu chee nyu yi Nyo le, Nyo tɛ chee yi ye ye le. 17 Fiɛɛ fì duunyi lɛ kiŋkoŋɛ le fɛ besabɛŋ le ki yisɛ ki gɛɛŋ ki mɛsɛ le finɛ fi lɛ, gɛ besabɛŋ kɛme nfaaŋ kune juu chi nsa wù fɛkimɛsɛ gɛ. Gɛ besabɛŋ kɛme nfaaŋ gɛ, nje besabɛŋ chee yi woŋ kfunɛ le njɛ Kletu. 18 Gɛ nfaaŋ to wu nyu antɛnɛɛ a kiŋkoŋɛ gɛ. Kiŋkoŋɛ ki yisɛ ki gɛɛŋ ki mɛsɛ to ki bvuuse lo nfaaŋ, nje nfaaŋ kɛme fiɛɛ fì wu ge nyu bɛ ŋgɛ wù taŋlo ba nya muh le. Gɛ muh wù kɛme nfaaŋ nyu wu lee wa antɛnɛɛ a kiŋkoŋɛ wu gɛɛŋ wu mɛsɛ gɛ. 19 Besabɛŋ kôŋe, nje le Nyo wù gɛ̀ ya wu koŋ besabɛŋ. 20 Nɛ muh jɛme lɛ wu koŋe Nyo, geenɛ wu ka banɛ mwa bwee, tu wu le muh wu chimbiaŋ, nje muh nɛ le njɛ wu koŋe mwa bwee wù wu yɛde wu le sɛŋ, wu ge nɛɛ fɛ wu koŋ Nyo wù wu yɛde gɛ wu le gɛ. 21 Nchi wù besabɛŋ gɛ̀ kɛmɛ a wu le, le wunɛ wu lɛ, muh wù koŋe Nyo kɛme ki wu kôŋe mwa bwee tɛ.