1 Ta masu madaledjaka bilombe Isalɛlɛ, ndja edaka enɛnɛ ta ngondo. Na bea momi omɔti o ngando e Bɛtɛlɛmɛ, ta mokpɔtɔ mo Yuda, akɛkɛ bodikama ta eliki e Moaba: yo, mwali o nde, engbanga na bana ba nde bami babae. 2 Kombe e momi omina edaka Elimelɛki, kombe e mwali o nde edaka Naomi ko kombe i bana ba nde babae bami idaka Maloni na Kilioni. Badaka bato ba itungu i Epalata, ta ngando e Bɛtɛlɛmɛ e mo kpɔtɔ mo Yuda. Bakɛkɛ ta eliki e Moaba ko badikamaka oho. 3 Na bea Elimelɛki, momi o Naomi, agwaka ena ko Naomi adikaka yo mɛnɛ na bana ba nde bami babae. 4 Bana bami babae bimina baosɔkɔ baseka ba eliki e Moaba ; o boso kombe e nde edaka Olopa ko o babae Luta. Ngɔngɔ i bobo boyeyoa oho mbuti na bianga domi, 5 Maloni na Kilioni bagwaka pongono. Naomi adikaka yo mɛnɛ: pɛ bana ko pɛ momi.

6 Kumu Yawɛ aokeaka bato ba nde ndjokwa: abapaka mia ma boyaka. Ehole eokaka Naomi bea, asalingoaka bɛngi akine eliki e Moaba, ayane ta mokpɔtɔ mo Yuda, engbanga na bakio ba nde. 7 Engbanga na bakio ba nde bali, Naomi adongaka ta polo edaka yo ko ayanaka ta mokpɔtɔ mo Yuda. 8 Naomi abalaka na bakio ba nde: «Edɛdi yanani, moto na moto ta ndako e nange e nde. Kina boo Kumu Yawɛ aokɔmeni bopele elenge akɔ no na bia ibagwa ko na mbi mɛnɛ! 9 Kina boo Yawɛ apɛ omɔti na omɔti o bino bogo ta ndako e momi okina!» Abhimbaka bakio ba nde babae bɛngi agbɔte na bu, endolo bayeaka mɛnɛ. 10 Babalaka na nde: «Ngasa! Lakɛke na wɛ engbanga adi pako e wɛ». 11 Endolo Naomi abasɔmbedjaka: «Bana ba mbi bali, yanani ta ndako i bino! Tina ndani wakimanakanini? Okani, naboani naikina bobota bana bami baboani boasɔni? 12 Bana ba mbi, yanani adi no. Tengasa naimei mobange mɛnɛ naboaniti bokɛ naikina moki. Nongo nakabala boo nadi oko na ngulu, nadi na ndingo boo nadi bobota ; na bea naimani na momi ta bulu bu ko ngɔngɔ naboti bana bami. 13 Ibea, wambakeni mbunoko bakandoe? Oboanitini bokɛni meki mikina? Ngasa, bana ba mbi bali! Ndjokwa e mbi enɔi ndjokwa e bino, tengasa ebɔ e Yawɛ ebenedjini mɛnɛ!»

14 Ehole eokaka bo bea, bayeaka naikina na ngulu mɛnɛ. Bea Olopa abhimbaka bokio bo nde ko amopaka ndese esuka, endolo Luta alonaka bogbɔtɔ na nde. 15 Naomi abalaka na Luta: «Endja, mbanda e wɛ ayani adi bato ba nde ko adi ba ndjakomba ba nde. Wɛ pongono yana!» 16 Endolo Luta amosɔmbedjaka: «Pɛ bolindedjani nokine bɛngi na yane.Tengasa polo esusu akɛke wɛ, mbi nakɛke ; polo esusu adake wɛ, mbi nadake. Bato ba wɛ badake bato ba mbi ; ko Ndjakomba o wɛ adake Ndjakomba o mbi; 17 oho agwake wɛ, mbi pongono nagwake; ko ena polo akundakenibo. Kina boo Yawɛ apɛni etumbo epipo emitida boo yogo elogbɔtodje!» 18 Ehole enɛkɛ Naomi boo Luta adaka oko atingi bokɛ na nde engbanga, akinaka bobala na nde. 19 Na tina emina, bakɛkɛ bo babae engbanga mbunoko baimeaka ta ngando e Bɛtɛlɛmɛ. Ehole eimeakabo ta Bɛtɛlɛmɛ, ngando e isusu eokaka ndjokwa tine bobo. Ko bali badaka bohɔdjɔ: «Iyo oko Naomi?» 20 Naomi abalaka na bu: «Pɛ bobeanini naikina Naomi*, endolo beanini Mala* tengasa Ndjakomba o ngulu isusu aokedjini ndjokwa enɛnɛ. 21 Nakɛkɛ mɔmɔ molumake, endolo Yawɛ ahuledjini mɔmɔ ngasa! Tina ebobeani naikina Naomi nda? Kumu Ndjakomba o ngulu isusu aokedjini ndjokwa.» 22 Edaka mondumba moyanaka Naomi ta mokpɔtɔ mo Yuda, donga ta eliki e Moaba engbanga na Luta, moto o Moaba, bokio bo nde mwali. Baimeaka ta ngando e Bɛtɛlɛmɛ, ta ehole ekabuke bo mbuma i ɔlɔge.