1 Ngɔngɔ imina, Yesu asinedjaka naikina adi batingami, ta ibongu i ibeke i Tibelia. Endja moda mosinedjaka yo na bu: 2 Simo Piɛlɛ, Toma, obeakabo ipasa, Natanɛlɛ, odaka moto o Kanana, e ngando e Galilea, bana ba Djebede ko na batingami bakina babae ba Yesu, badaka na bu engbanga. 3 Simo Piɛlɛ amosɔmbedjaka: «Nakɛi aluba.» Bamosɔmbedjaka: «Iso pongono, lakɛkɛ na wɛ.» Bakɛkɛ ko batiteaka ta bwato. Endolo baitaedjaka nongo moswi emɔti ta bulu bua. 4 Ehuma mɛnɛ, Yesu aemaka ena, ta ibongu i ibeke, endolo batingami baisipoaka boo edaka Yesu. 5 Na bea Yesu abalaka na bu: «Bana, oditini nongo na moeka o boyaka?» Bamosɔmbedjaka: «Ngasa». 6 Abalaka na bu: «Dumbani modjanga ta dɔngɔ i ebɔ e bami e bwato ko wataedjakeni swi.» Na bea badumbaka modjanga ko baihɔnɔkɔ bomotuba ta madiba, tine boo molumaka na swi. 7 Motingami yona opalaka Yesu abalaka na Piɛlɛ: «Edi Kumu!» Ehole eoka Simo Piɛlɛ kɔpi emina: «Edi Kumu»; alwaka esendja e nde, tine boo ayeihwaka ehole elubaka yo ko asadumbaka ta madiba. 8 Batingami bakina balindaka bwato mbunoko ibongu ko batubaka modjanga molumake na swi: baidaka bohali na ngondo, mbuti na bamɛtɛlɛ mokama. 9 Ehole esɛmɛkɛ bo o ngondo, bataneaka mosa mo maalo na swi batumbake ko na mwɛmbɛ. 10 Yesu abalaka na bu: «Duani na ndambo e swi etaedji no.» 11 Simo Piɛlɛ atiteaka ta bwato ko atubaka modjanga o ngondo molumake na swi ba gbɔbgɔ: mokama na tuku itano na basato. Nongo bonɛnɛ boswi imina, mondjanga moiyaleanaka. 12 Yesu abalaka na bu: «Dua ayakeni.» Pɛ nongo motingami omohɔdjɔkɔ: «Wɛ nda?» Tengasa badjebaka boo edaka Kumu. 13 Yesu abatamaka, atombaka mwɛmbɛ ko abakabaneaka; akɔkɔ bea pongono na moswi. 14 Yena edaka mbala e basato e Yesu bosinedja na batingami ba nde, donga ta bopusoa bo nde ta tei e bago.

15 Ngɔngɔ iboyaka, Yesu ahɔdjɔkɔ Simo Piɛlɛ: «Simo, mwana o Yoane, wapalakani bonɔ iluu losusu?» Asɔmbedjaka: «Okobea Mokondji, odjebi bopele boo nakopale.» Yesu abalaka na nde: «Banea bhata ba mbi.» 16 Abalaka na nde mbala e babae: «Simo, mwana o Yoane, wapalakani?» Asombedjaka: «Okobea Kumu, odjebi bopele boo nakopale.» Yesu abalaka na nde: «Banea bhata ba mbi.» 17 Ngɔngɔ amohɔdjɔkɔ naikina mbala e basato: «Simo, mwana o Yoane, wapalakani?» Na bea Piɛlɛ alumaka na ndjokwa na mahɔdjɔ mamohɔdjɔkɔ Yesu mbala i sato: «Wapalakani?» Ko asɔmbedjaka: «Kumu okadjebe meako misusu; odjebi boo nakopale!» Yesu abalaka na nde: «Banea bhata ba mbi*. 18 Okobea, nabalaka na wɛ, edi soti: ehole edaka wɛ yɛngɛ, osanangaka mosenge wɛ mɛnɛ ko okɛkɛ ta polo ipalaka wɛ. Endolo ehole eimeake wɛ mobange, waninodjake mɔmɔ ma wɛ, okina moto aolwadjake mosenge ko akɛke na wɛ ta polo edi wɛ pɛ boda na posa e bokɛ.» 19 Abalaka bea tine boinedja moda mo bogwa bo Piɛlɛ agwake yo tine bokumedja Ndjakomba. Na bea Yesu abalaka na nde: «Kimanani!»

20 Piɛlɛ asahombedjaka ko aenɛkɛ ta sangɔngɔ i bobo, motingami opalaka Yesu ko oekɛmɛkɛ adi Yesu ta ehole e boyaka. Yo ahɔdjɔkɔ Yesu: «Kumu, yona wokabake nda*?» 21 Ehole emoenɛkɛ Piɛlɛ, abalaka na Yesu: «Kumu ibea yo, eka amoimeake nda?» 22 Yesu asɔmbedjaka: «Nakapala bo ayeyoe oko ta bodua bo mbi, mo wɛ nda? Wɛ, kimanani!» 23 Na bea gala enanganaka ta ndanda e badimi boo motingami omina agwɛtebi. Enakobea Yesu aibalaka na Piɛlɛ bea: «Agwɛtebi,» Endolo abalaka: «Nakapala ayeyoe mbunoko bodua bo mbi, edi na modjɔ*?»

24 Edi oko motingami yona opaka tati e meako imi misusu ko yo amikomaka. Ko iso lodjebi boo tati e nde idi soti*.

25 Yesu akɔkɔ meako mikina minɛnɛ. Basobamikoma momɔti na momɔti na meako mimina misusu, nalɛdjɛkɛ boo buku isusu ipalaka bo bokoma, ikɔkɔ koka bokwea ta ngondo esusu*.