1 Yesu abalaka na bu: «Kina milema mi bino midae pɛ bosatungea. Dani na edimeli* adi Ndjakomba ko dimani mbi pongono. 2 Bisika bidi binɛnɛ ta ndako e Sesa; emitida bea nakɔki odjebedjani boo nakɛkɛ aobɔngedjeani bisika? 3 Ko ngɔngɔ i bokɛ aobɔngedjeani bisika, naduake ko naotombakeni mbuti na mbi, bɛngi ino pongono odaeni ta dɔngɔ idake mbi. 4 Wadjebakani ndjea ekɛkɛ mbi.» 5 Toma abalaka na nde: «Kumu, lotadjebaka polo ekɛke wɛ. Lodi bodjeba ndjea emina moda nda?» 6 Yesu amosɔmbedjaka: «Mbi nadi ndjea, soti ko bomɔ. Moto aboaniti bokɛ adi Sesa emiti da oko na mbi. 7 Ekadabo odjebinini, okɔkidjebani pongono Sesa. Ko donga edɛdi omodjebini ko omoenini.» 8 Pilipo abalaka na nde: «Kumu, loinedja Sesa ko ladake nasepi.» 9 Yesu amosɔmbedjaka: «Pilipo, ehole eyai edi mbi na nu ko wɛ otadjebakani? Yona oenini, aeni Sesa. Tina abalaka wɛ: "Loinedja Sesa?" 10 Otadimaka mbi nadi ta tei e Sesa ko Sesa ta tei e mbi? Mibalo miobaleakani mbi miidonga adi mbi. Edi Sesa yona odi ta tei e mbi, akokedjaka misala mi nde mɛnɛ. 11 Dimeanini ehole abalaka mbi: nadi ta tei e Sesa ko Sesa ta tei e mbi. Emitikoda bea, dimani nongo tine misala mieni no mbi bosala. 12 Okobea, nabalaka na nu, edi soti: yona adimeakani akɔke pongono misala makɔkɔ mbi. Amikɔke minɛnɛ bonɔ, tine boo nakɛkɛ adi Sesa. 13 Ko nakɔke misusu misɛngɛkɛbi bino ta kombe e mbi, bɛngi Mwana ainedje ekumu e Sange e nde. 14 Eka esusu* esɛngɛkɛbi no ta kombe e mbi, naekɔkɔbi.»

15 «Okapalanini, osumabini mobeko mi mbi. 16 Nasɛngɛkɛbi na Sesa aopɛni mobaeli okina, tine aokamoakeni ko adae na nu tina e seko. 17 Adi Mwembo mosoti. Ngondo ebwaniti amoasɔe, tine eboaniti nongo amoenɛ ko amodjebe. Endolo ino, wamodjebakeni, tine ayeyoabi na nu ko adakabi* seko na nu. 18 Natokinabini no bɛnɛ elenge bana ba madinda; nasɔmbɔbi adi no. 19 Mooehole mokɛkɛ ngondo etaenɛkeni naikina, endolo no, wenɛkenini, tine boo mbi nadi na bomɔ ko ino wadakeni na bomɔ pongono. 20 Ta busa bomina, osipoabini boo nahelaka iputo na Sesa ko ino odini iputo na mbi ko mbi na nu.

21 «Moto yona abaneake mibeko mi mbi ko amisumaka, adi yona apalakani. Sange e mbi apalakabi yona opalini; mbi pongono namopalabi ko nasinedjabi na nde.» 22 Yuda, te Yudasi Isikaliota, abalaka na nde: «Kumu, moda ndani moboani wɛ bosinedja na su endolo te na ngondo?» 23 Yesu amosɔmbedjaka: «Moto yona opalini, asumake mibalo mabalaka mbi. Sange e mbi amopalabi; Sange e mbi ko mbi loduabi bodikama ta tei e nde. 24 Moto yona adaka pɛ bopalani, tasumake mibalo mi mbi. Mibalo miokaka no mbi bobala mitadongaka adi mbi, endolo adi Sange e mbi yona olomani. 25 Nabalaka mibalo imi misusu ehole edi mbi oko na nu. 26 Mobaeli yona oduabi bokamoani edi Mwembo Mosɛnɔke. Sesa amolomabi ta kombe e mbi, tine bolehani meako misusu ko bolɛdjɛni meako misusu mibalaka mbi na nu.

27 «Nokineini bogo ko nopini bogo bo mbi*. Natopakani bogo bomina elenge moda mo ngondo. Milema mi bino midae pɛ bosatungea ko pɛ bodani na bɔɔ. 28 Okani nabala na nu: "Nakɛke, endolo nasɔmbɔke adi no." Osopalanini, okɔki sepani bodjeba boo nakɛke adi Sesa, tine Sesa anɔini. 29 Nabalaka na nu meako imi edɛdi boso boo mimee, bɛngi ehole eimeabi mo odimeni. 30 Nabaletebi naikina na nu bobuke, tengasa kumu o ngondo ye adoi. Aditi na kpati diko i mbi, 31 endolo bato ba ngondo badjebake boo nakapale Sesa ko nakakɔe elenge akabale yo na mbi nakɔe. Angɔni, lodongeni iya!»