1 Masu masamano boso bo tɛkɛ e Pasika, Yesu akɛkɛ ta ngando e Betania*, ta polo edaka Ladjalo, moto opusoa yo ta tei e bago. 2 Oho, ayaka mia ma mokɔmedjaka na Malata. Ladjalo adaka omɔti odaka ena ta mesa eyaka Yesu. 3 Na bea Malia atombaka molangi i modaka na ekenge e mosoloa moso e itindi, molumake na motuya monɛnɛ imokɔmɔkɔ na mole mokabebo nale. Amosuwoaka mosoloa momina ta mako, ngɔngɔ ahakoaka mako ma Yesu na swɛ i nde. Ndako esusu elumaka na so eitindi e mosoloa momina. 4 Omɔti o batingami ba Yesu, Yudasi Isikaliota, yona wamokabake, abalaka: 5 «Tina ndani otɛkitini mosoloa momina na mikama misato mi palanga*, tine bopa na batakeli?» 6 Aibalaka bea te tine aokeaka batakeli pɛhɛ, endolo tine adaka moubi. Elenge adaka yo mobanei o tɔmbi e iputo, adaka aiba palanga. 7 Endolo Yesu abalaka: «Mokinani bogo! Akɔi bea tine busa bopuseabinibo. 8 Odabini seko na batakeli, endolo otadabini na mbi seko.»

9 Emumu e bayuda baokaka gala boo Yesu adaka ta Betania. Baikɛkɛ oto ta tine Yesu, endolo pongono tina e boendja Ladjalo yona osisodjaka Yesu ta ndanda e bago. 10 Bakumu ba banganga ba Ndjakomba badimanaka pongono bowa Ladjalo, 11 tine bayuda banɛnɛ babatiaka ta tina e nde ko badimeaka Yesu.

12 Ngɔngɔ i isu imɔti, emumu e bato ekɛkɛ ta tɛkɛ e Pasika, baokaka boo Yesu adaka bokɛ ta Yelusalɛmɛ. 13 Na bea bato ibadaka boso bo yesu batombaka maango ma mabiya ko baimaka ta ngando enɛnɛ bɛngi bakasakana na nde. Badaka bogama: «Ekumu adi Ndjakomba! Kina boo Ndjakomba adjongoe yona aduake na kombe e Mokondji! Kina boo Ndjakomba andjongoe Kumu o Isalɛlɛ*!» 14 Yesu atombaka mwana o ane ko abakamaka diko i yu, elenge abalaka ikomi:

15 «Pɛ bobanga, ngando enɛnɛ e Siona!

Endja, Mokondji o wɛ adoi,

Adi ta diko i mwana o ane*.»

16 Boso mɛnɛ, batingami ba nde baisipoaka meako mimina; endolo ehole angɔndjɔmɔkɔ Yesu ta ekumu, balɛdjɛkɛ ikomi ibalamaka ta tina e nde ko meako mibalaka yo. 17 Bato basusu badaka engbanga na Yesu ta ehole ebeaka yo na Ladjalo ta ikila ko amosisodjaka ta tei e bago, badaka botɔndɔ gala e meako mienɛkɛbo. 18 Na tina emina emumu e bato baduaka bosakana na nde tine baokaka gala e bimbete bi ngindola bikɔkɔ yo. 19 Bapalusai basabaleanaka: «Wɛnɛkɛni, otakɔni naikina eka, tengasa bato basusu bamokimanaka!»

20 Enakobea, edaka pongono na ekenge e Bagɛlɛki ibakɛkɛ ta Yelusalɛmɛ tine bokumedja Ndjakomba ta ehole e tɛkɛ. 21 Babatamaka na Pilipo, yona odaka moto o ngando e Betesaida ta Galilea, ko bamohɔdjɔkɔ: «Tata, lapalaka loenɛ Yesu.» 22 Na bea Pilipo akɛkɛ atɔndea Andele, ibea bo babae bakɛkɛ bobala na Yesu meako mimina. 23 Yesu abasɔmbedjaka: «Ehole ebwani boo Mwana o moto akumedjame. 24 Okobea, nabali na nu, edi soti: mbuma e bule ekadike oko mbuma emɔti emiti pɔɔ ta kpɔtɔ, etagwa. Endolo ekakwa ta kpɔtɔ, ebotake mbuma inɛnɛ. 25 Iyona apalaka mohelo mo nde, amobungedjake; endolo yona alonaka bosapa ta ngondo ye, amobaneake tine bomɔ bo seko. 26 Moto akapala bosaleani, akimaneni; na bea mosali o mbi adake pongono ta dɔngɔ idabi mbi ko Sange e mbi akakumedje yona okasaleni.»

27 «Edɛdi mwembo mo mbi molengesani. Ebwani mbi bobala nde? Nabale: Sesa, heledjani ta ehole ye e saya? Enakobea edi mɛnɛ tine ehole ye enɔngi naimei ta ehole ye. 28 Sesa, pa ekumu ta kombe e wɛ!» Na bea kɔpi eokamaka donga ta busa: «Naekumedja ehele ko naekumedjakabi.» 29 Emumu e bato edaka ena ko baokaka kɔpi, babalaka: «Edi mogamo mo bɛi!» Bakina babalaka: «Obwɛndji abali na nde!» 30 Endolo Yesu abasɔmbedjaka: «Editi tina e mbi kɔpi emina eokame, endolo edi ta tina e bino. 31 Edɛdi edi ehole ebwani na ngondo bosambedjama; na bea mokondji o ngondo ye adoi adumbama sokolu. 32 Ko, ehole angɔdjɔmɔbi mbi ta ngondo, natubabi bato basusu adi mbi.» 33 Na ndjea e mibalo mimina, Yesu ainedjaka modumba mo yogo agwake yo. 34 Emumu e bato bamosɔmbedjaka: «Iso lokaka ta buku i mibeko mi biso boo Kilito adakabi na bomɔ tina e seko. Moda ndani obwani bobala boo mwana o moto adi boangɔdjɔmɔ? Mwana omina o moto nda?» 35 Yesu abalaka na bu naikina: «Bohu bodi oko ta tei e bino, endolo moo ehole mokɛkɛ. Dalani ehole edi no na bohu, bɛngi boo modidi mosaka ogbundumoani, tengasa yona adalaka ta modidi ta djebe polo akɛkɛ yo. 36 Dimeani bohu ehole edi no na bohu, bɛngi oimeni bato ba bohu.»

Ngɔngɔ i bobala bea, Yesu akɛkɛ ko abolamaka bohali na bu.

37 Nongo akɔkɔ yo bimbete bi ngindola binɛnɛ ta miso ma bobo, baimodimeaka. 38 Na bea ekokedjamaka elenge ebalaka mbaeli o Ndjakomba Isaya:

«Kumu, odimi bwɛndji bu nda?

Kumu aenɛmedji suwea e nde adi nda?»

39 Isaya abalaka pongono tina ndani bato bia baimodimeaka:

40 «Ndjakomba adipa miso ma bobo,

Adipa bowɛi bo bobo bɛngi miso ma bobo masakaenɛ,

Bowɛi bo bobo bodae pɛ bosipoama.

Endja pongono ta tina ebala Ndjakomba,

Milema mi bobo mitasɔmbɔ adi mbi

Tine boo nasabaheledja*.»

41 Isaya abalaka bea tine anɛkɛ ekumu e Yesu ko abalaka ta tina e nde. 42 Na bea, ta tei e bakondji ba bayuda, banɛnɛ ba bobo badimeaka Yesu. Endolo ta bɔɔ bo bapalusai, baimodimeaka ta bohu, basakababudjea ta Sinagoga.* 43 Tengasa bapalaka ekumu e bato bonɔ e ekumu Ndjakomba.

44 Yesu agamaka: «Soti, moto odimeini, adimeiti mbi, endolo adimei yona olomani. 45 Moto yona oenini, aeni yona olomani. 46 Mbi, naduaka boda bo bohu bo ngondo, na bea yona odimeini, abwaniti adae ta modidi. 47 Moto yona okaka mibalo mi mbi ko atamisaka ta mosala, editi mbi moto waesambedjake; tengasa mbi naduaka tine boheledja bato ba ngondo endolo te bobasambedja. 48 Moto adaka pɛ bodimeani ko atadimaka mibalo mi mbi, ataneake mosambedji o nde: edi mibalo mi balaka mbi mimosambedjabi ta isu i suka. 49 Na tina emina, mbi naibalaka na mbi mɛnɛ, endolo Sesa olomani apani yo mɛnɛ mibeko miboanaka na mbi bobala ko boleha. 50 Ko nadjebaka: mibeko mikapɛ yo boo lokɔe mikapɛ bomɔ bo seko. Na bea, mibalo mabalaka mbi, namibalaka oko elenge ebala Sesa na mbi.»