1 Moto omɔti na kombe e Ladjalo apekaka. Adaka moto o ngando e Betania, ngando edaka Malia ngɛnɛ e nde mwali na Malata. 2 Malia adaka mwali yona osopeaka Kumu mosoloa moso e itindi ta mako ko ahakoaka na swe i nde. Adaka pongono ngɛnɛ e Ladjalo yona opekaka. 3 Bangɛnɛ ba Ladjalo balomaka moto akatɔndea Yesu: «Kumu, mopalani o wɛ adi na epeko.» 4 Ehole eokaka Yesu gala emina, abalaka: «Epeko e Ladjalo etamolomake ta bogwa; edi bɛngi einedje ekumu e Ndjakomba ko ta boinedja pongono ekumu e Mwana o Ndjakomba.» 5 Yesu apalaka Malata ko ngɛnɛ e nde Malia, na pongono Ladjalo. 6 Ehole eokaka yo Ladjalo apeka, ayeyoaka naikina masu mabae ta polo edaka yo. 7 Ngɔngɔ abalaka na batingami ba nde: «Losɔmbeni ta ngando e Yuda.» 8 Batingami bamosɔmbedjaka: «Labi, ekɔiti baasu bakondji ba bayuda bahombaki bowoe na mabanga ko wapalaka osɔmbe naikina oho?» 9 Yesu abasɔmbedjaka: «Busa bomɔti bodi na ngonga domi na ibae, editi bea? Ekada moto adali na moi, atakwa, tine boo aenɛkɛ bohu bo ngondo. 10 Endolo moto akadala na bulu, abwani bokwa tine boo bohu boditi adi yo.» 11 Ngɔngɔ i bobala bea, Yesu abalaka naikina: «Mopalani o biso Ladjalo ahwɛli, endolo nakɛi amosisodja.» 12 Batingami basɔmbedjaka: «Kumu, ahwɛli, ahelake.» 13 Ta soti Yesu abalaka tine bogwa bo Ladjalo, enakobea batingami balɛdjɛkɛ boo Yesu abalaka tine hiyɔ ikahwɛe so. 14 Yesu abalaka na bu bohu: «Ladjalo agwi. 15 Nadi nasepi tine nadakiti oho, bɛngi odimenini. Endolo lokɛni adi yo.» 16 Na bea Toma obeakabo ipasa abalaka na batingami bakina: «Lokɛni, lokagwa na nde engbanga!»

17 Ehole eimeaka Yesu, aokaka boo bapusei Ladjalo ko akɔi masu manɛi ta ikila. 18 Ngando e Betania edaka mbuti na Yelusalɛmɛ, bohali bo kilomɛtɛlɛ mbuti na isato, 19 ko bayuda banɛnɛ baduaka adi Malata na Malia tine bobagɔmbedja milema ta tina e bogwa bo mwange e bobo. 20 Ehole eokaka Malata boo Yesu adalake, akɛkɛ bosakana na nde; enakobea Malia adikaka ta ndako. 21 Malata abalaka na Yesu: «Kumu, osoda ya, ka ngɛnɛ mbi agwiti. 22 Endolo nadjebi edɛdi mɛnɛ boo Ndjakomba aopake losusu lahɔdjɔke wɛ.» 23 Yesu abalaka na nde: «Mwange e wɛ asisoake ta bogwa.» 24 Malata asɔmbedjaka: «Nadjebaka boo asisoabi ehole esisoabi bago ta isu i suka*.» 25 Yesu abalaka na nde naikina: «Mbi nadi bopusoa ko bɔmɔ. Moto yona odimeakeni adake na mohelo, nongo akagwa. 26 Na bea moto yona odi mɔ ko akadimeani, agwɛtebi. Odimi bea?» 27 Asɔmbedjaka: «Okobea, Kumu, nadimi boo odi Kilito Mwana o Ndjakomba, yona odaka bodua ta ngondo.»

28 Ngɔngɔ i bobala bea, akɛkɛ. Na bea abeaka Malia ngɛnɛ e nde ko abalaka na nde na popoli: «Molehi adi ya ko aobeaka.» 29 Aoka Malia bea, angɔ pɛpɛlɛ ko akɛ adi Yesu. 30 Enakobea, Yesu aipakakwea ta ngando, endolo edaka oko ta polo esakanaka yo na Malata. 31 Ehole edaka bayuda na Malia ta ndako tine bomogɔmbedja, bamoenɛkɛ angɔi ko aimaka pɛpɛlɛ, bamokimanaka; tengasa balɛdjɛkɛ boo akɛi ta ikila tine boeya. 32 Malia aimeaka ta polo edaka Yesu; ehole enɛkɛ yo Yesu, akwaka ta mako ma nde ko abalaka na nde: «Kumu, osoda ya, ka ngɛnɛ e mbi agwiti.» 33 Ehole emoenɛkɛ Yesu boeya, engbanga na bayuda bia ibadaka na nde, Yesu aimeaka na ndjokwa ko asatungeaka ta molema, 34 ko abahɔdjɔkɔ: «Amopuseino djɔ?» Bamosɔmbedjaka: «Kumu, duwa aendje.» 35 Yesu aeya. 36 Na bea bayuda babalaka: «Endja moda momopalaki yo!» 37 Endolo bato bakina ta tei e bobo babalaka: «Yo aheledja miso ma bato ibagwa miso*, abwanakiti bokɔ boo Ladjalo adae pɛ bogwa?»

38 Yesu alumaka na ndjokwa mɛnɛ, akɛkɛ ta ikila. Ikila imina idaka ibanga inɛnɛ itɔmɔkɔ ipose, ko idipamaka ta monɔkɔ na ibanga. 39 Yesu abalaka: «Dongedjani ibanga di.» Malata, ngɛnɛ e mowei, abalaka na nde: «Kumu, abwani bokɔso; tengasa enɔi ehele masu manɛi donga amopusei so.» 40 Yesu amosɔmbedjaka: «Nabalakiti na wɛ boo okadima wenɛke ekumu e Ndjakomba?» 41 Badongedjaka ibanga. Yesu angɔdjɔkɔ miso ta busa ko abalaka: «Sesa, naopi misakowa na moda mosɔmbedjini wɛ. 42 Nadjebi boo okasɔmbedjeni seko, endolo nabali tine bato ibi bahikini, bɛngi badime boo wɛ olomini.» 43 Ngɔngɔ i bobala bea, agamaka na ngulu: «Ladjalo, ima!» 44 Mowei aimaka, mɔmɔ na mako manangake na yale esendja boso bohuamake na esendja. Yesu abalaka: «Molodjani ko mokinani akɛ.»

45 Bayuda banɛnɛ ibaduaka adi Malia ko aenɛkɛbo meako imikɔ Yesu, bamodimeaka. 46 Endolo bakina ta tei e bobo bakɛkɛ adi bapalusai ko babatɔndeaka meako imikɔ Yesu. 47 Bakondji ba banganga ba Ndjakomba ko na bapalusai babongowanaka ta ibolea inɛnɛ i basuku ba bayuda ko babalaka: «Ebwani so bokɔ nde? Tengasa moto iyo akɔkɔ bimbete bi ngindola binɛnɛ! 48 Lokamokina akɔke okobea, bato basusu bamodimeake; na bea bakondji ba Loma baduake abuka tepelo ko na bato ba biso!» 49 Omɔti ta tei e bobo, kombe e nde Kaipa, yona odaka nganga monɛnɛ o Ndjakomba ta bianga bia, abalaka na bu: «Otasipoakani eka! 50 Otasipoakani edi bopele boo moto omɔti agwɛ tine bato basusu ko ekomi esusu edae pɛ bobeha?» 51 Enakobea, aibalaka meako midongaka ta malɛno ma nde yo mɛnɛ; endolo elenge adaka yo nganga monɛnɛ o Ndjakomba ta yanga yena, atɛlɛkɛ boo Yesu agwake tine ekomi e bayuda, 52 eidaka nongo tine ekomi e bayuda, endolo pongono tine bobaimedja ekomi emɔti bana basusu ba Ndjakomba ibananganaka ta ngando isusu.

53 Donga ta masu mia, bakondji ba bayuda badimanaka bowa Yesu. 54 Na tina emina Yesu aidalaka naikina ta bhuda ta tei e bayuda. Akɛkɛ ta ngando emɔti mbuti na etengelenge, ta ngando ebeaka bo Epalaima*, adikamaka oho yo na batingami ba nde. 55 Tɛkɛ e Pasika e bayuda ebatamaka ko bato bakɛkɛ ta ngando e Yelusalɛmɛ tine bosasɛnodja boso bo tɛkɛ. 56 Badaka bohomba Yesu ko basabaleanaka ta tepelo: «Olɛdjini bo? Aduake ta tɛkɛ kaoko ngasa?» 57 Enakobea bakondji ba banganga Ndjakomba ko na bapalusai bapaka mobeko bomoto akadjeba polo edi Yesu, abatɔnde, bɛngi bamopee.