1 Ta ehuma e busa bo eyenga, na mohindihindi, Malia e Magadala akɛkɛ ta ikila. Aenɛkɛ ibanga idongaka ta monɔkɔ mo ikila. 2 Na bea apotaka tine bokatɔndea Simo Piɛlɛ ko na motingami okina, yona opalaka Yesu. Abalaka na bu: «Badongedji Kumu ta ikila ko lotadjebaka polo emoisibo.» 3 Piɛlɛ na motingami okina bakɛkɛ ko baimeaka ta ikila. 4 Bapotaka bo basusu babae; endolo yona okina motingami apotaka bonɔ Piɛlɛ ko aimeaka boso ta ikila. 5 Asunamaka tine boendja ko aenɛkɛ bipasa bi bisendja bipu bisambi ena, endolo aikweaka. 6 Simo Piɛlɛ, yona omokimanaka, aimeaka ko akweaka ta tei e ikila. Aenɛkɛ bipasa bi bisendja bipu bisambi ena 7 na pongono esendja epu ehuwakabo molo mo Yesu. Esendja emina eidaka polo emɔti na bipasa bia, endolo edingamaka pamba ekina. 8 Na bea motingami yona okina, yona oimeaka boso ta ikila, akweaka pongono. Aenɛkɛ ko adimaka. 9 Tengasa batingami baipaka sipoa ikomi ibalaka boo Yesu apusuake ta ndanda e bago*. 10 Ngɔngɔ batingami babae basɔmbɔkɔ adi bo.

11 Malia aemaka mbuti na ikila, sokolu ko adaka boyea. Ehole eeyaka yo, asumanaka tine boindja ta tei e ikila; 12 aenɛkɛ babwɛndji babae balwali bisendja bipu badaka ta polo esambeakabo mokuku mo Yesu, omɔti ta molo, okina ta mako. 13 Babwɛndji bahɔdjɔkɔ Malia: «Tina aeyaka wɛ nda?» Abasɔmbedjaka: «Badongedji Kumu o mbi ko natadjebaka polo emosambei bo.» 14 Ngɔngɔ i bobala na bu, ahombanaka ko aenɛkɛ Yesu aemi ena, enakobea aidjebaka boo edaka Yesu. 15 Yesu amohɔdjɔkɔ: «Aeyaka wɛ nde, wahombaka nda?» Alɛdjekɛ boo edaka mobanei o gbie, na tina emina abalaka: «Tata, ekada wɛ moto omodongedji, tɔndeani polo emosambei wɛ ko nakɛke amotomba.» 16 Yesu abalaka na nde: «Malia!» Ahombanaka ko abalaka na nde na monɔkɔ mo baebele: «Labuni!» Etingodji «Molehi». 17 Yesu abalaka na nde: «Pɛ bopeani, tengasa naiweakini adi Sesa. Endolo kɛɛ atɔndea bange i mbi boo mbi nakɛi adi Sesa yona odi pongono Sange e bino, adi Ndjakomba o mbi odi pongono Ndjakomba o bino.» 18 Na bea, Malia e Magadala akɛkɛ adi batingami ko abatɔndeaka: «Naeni Kumu!» Ko abatɔndeaka misusu imibalaka yo na nde.

19 Oko ta mɔmɔkɔ momina mo busa bo eyenga, batingami baputoanaka ta ndako. Badipaka bikukɛ na pongola, tengasa badaka na bɔɔ bo bakondji ba Bayuda. Yesu aduaka ko aemaka ta ndanda e bobo. Abalaka na bu: «Bogo bodae na nu!» 20 Ehole ebalaka yo na bu bea, abainedjaka mɔmɔ ma nde ko na mopandje mo nde. Batingami balumaka na mongandi aboenɛ Kumu. 21 Yesu abalaka na bu naikina: «Bogo bodae na nu! Elenge Sesa alomani yo, mbi pongono nolomakani.» 22 Ngɔngɔ ibobala bea, abahuweya mohuli ko abalaka na bu: «Asɔni Mwembo Mosɛnɔke! 23 Adi bia bayɛkɛbi no mabe ma bobo, bayɛmɛbi; adi bia balonabi no boyɛ mabe ma bobo, mayɛmetebi*.»

24 Enakobea, omɔti o batingami domi na babae, Toma obeakabo ipasa, aidaka engbanga na bu, ehole esenɛmedjaka Yesu na bu. 25 Batingami bakina bamotɔndeaka: «Iso loeni Kumu!» Endolo Toma abasɔmbedjaka: «Namiti enɛ embete esɛtɛ ta mɔmɔ ma nde na miso ko namiti isa mosapi mo mbi ta polo esɛtɛ ko ebɔ e mbi ta mopandje mo nde, natadimake*!»

26 Ngɔngɔ i pɔsɛ emɔti, batingami ba Yesu badaka naikina ta ndako, ko Toma adaka engbanga yena na bu. Enakobea bikukɛ bikangamaka na pongola, Yesu akweaka ko aemaka ta ndanda e bobo. Abalaka: «Bogo bodae na nu!» 27 Ngɔngɔ abalaka na Toma: «Isa mosapi mo wɛ iya, endja mɔmɔ ma mbi; lindedja ebɔ ko isa mosapi ta mopandje mo mbi. Kina bokakoana endolo dima. Kina kitɛ!» 28 Toma amosɔmbedjaka: «Kumu o mbi ko Ndjakomba o mbi!» 29 Yesu amosɔmbedjaka: «Odimi tine oenini? Sepi adi bia badimake napɛ boenɛni!»

30 Yesu akɔkɔ naikina ta boso bo batingami ba nde bimbete binɛnɛ bi ngindola, ibidama pɛ bokomama ta buku iye. 31 Endolo imi mikomami, mikomama bɛngi odimeni boo Yesu adi Kilito, Mwana o Ndjakomba. Ko okamodimeani, odiabini bomɔ na kombe e nde.