1 Ngɔngimina, Bayuda basepaka tɛkɛ ko Yesu akɛkɛ ta ngando enɛnɛ e Yelusalɛmɛ. 2 Ta ngando e mina, edaka na esoseli emɔti ebeakabo ta monɔkɔ mo baebele Beteseda. Edaka mbuti na ekukɛ e bhata ko ehikamaka na mbalasani imakwe matano *. 3 Nase i mbalasani imina, emumu e bato ba bipeko, bagwa miso, bitumbɛ, na bato ba mitɛngu badaka basambi ena. [Bambaka bokumana bo madiba; 4 tengasa obwɛndji o Kumu adaka atita bihole na bihole bokumana madiba ma esoseli. Moto o boso o epeko osadumbaka ehole ekumanaka madiba, ahelaka na yogo e nde, nongo edaka moda ndani.]* 5 Edaka na momi omɔti o epeko ayeyoaka ena bianga tuku isato na bomwambe. 6 Ehole emoenɛkɛ Yesu asambi ta kpɔtɔ ko aoka gala bo ayeyoaka ena na epeko donga ehele, amohɔdjɔkɔ: «Wapalaka ohele?» 7 Moto o epeko amosɔmbedjaka: «Kumu, naditi na moto obosabani ta esoseli ehole ekakumane madiba. Ehole ehombi mbi na kɛ, okina asasabi boso bo mbi.» 8 Yesu abalaka na nde: «Angɔ, tomba itɔkɔ i wɛ ko dala.» 9 Mbala emɔti, momi omina ahelaka; atombaka itɔkɔ i nde ko abangaka bodala. Na bea, modjɔ momina mokɔmɔkɔ ta busa bo sabata. 10 Bakondji ba Bayuda bahɔdjɔkɔ momi omina ohelaka: «Edi busa bo sabata, otungiti botomba itɔkɔ i wɛ*!» 11 Abasɔmbedjaka: «Moto oheledjini abali na mbi: "Tomba itɔkɔ i wɛ ko dala."» 12 Na bea bamohɔdjɔkɔ naikina: «Moto obali na wɛ bea nda: "Tomba itɔkɔ i wɛ ko dala"?» 13 Endolo momi omina ohelaka aimodjebaka, tengasa Yesu alɛmoaka ta emumu e bato yena edaka ta polo emina. 14 Ngɔngɔ i mooehole, Yesu asakanaka na nde ta tepelo ko abalaka: «Iya aheli wɛ edɛdi, angatana bo osakakɔ bobe naikina; esakadabo modjɔ mokina mobe bonɔ mosakotanea.» 15 Momi omina akɛkɛ abala adi bakondji ba bayuda, edaka Yesu moto omoheledjaka. 16 Na tina emina bayuda baimeaka bonɔngedja Yesu, tine bo akɔkɔ modjɔ momina ta busa bo sabata. 17 Endolo Yesu abalaka na bu: «Sange e mbi adi oko ta mosala, mbi pongono nadi ta mosala.» 18 Ta tina e mobalo mua, bakondji ba bayuda bahombaka naikina enɔeli e bowa Yesu, tengasa eidaka otobea tine aisumaka busa bo sabata, endolo abalaka pongono Ndjakomba adi Sange e nde mɛnɛ ko asakokanedjaka na Ndjakomba.

19 Yesu asɔmbɔkɔ bobala na bu naikina: Okobea, nabali na nu, edi soti: Mwana abwaniti bokɔ eka emɔti na moda mo nde mɛnɛ; akɔkɔ oko imenɛkɛ yo na Sange e nde bokɔ, Mwana akɔkɔ oko moda momina. 20 Tengasa Sesa bopalaka Mwana ko bomoinedjaka imikakɔe yo. Amoinedjakabi misala minɛnɛ bonɔ imi menɛkɛno ko wakamoakeni bonɔ. 21 Tengasa, oko moda momina Sesa akasisodje bago ko akabapɛ bomɔ, oko moda momina Mwana akapɛ bomɔ adi moto opali yo. 22 Ko Sesa tasambedjake moto, endolo apaka adi Mwana bokondji bosusu bo bosambedja, 23 bɛngi bo bato basusu bakumedjake Mwana elenge akumedjaka bo Sesa. Yona adaka pɛ bokumedja Mwana, atakumedjaka pongono Sange e moto yona omolomaka. 24 «Okobea, nabali na nu, edi soti: yona okaka mibalo mi mbi ko adimaka yona olomani, adihi bomɔ bo seko. Atadihabi esambi, endolo anɔ ehele ta bogwa na bomɔ. 25 Okobea, nabali na nu, edi soti: ehole eduake, ko eimei edɛdi, bagwake baokabi kɔpi e Mwana o Ndjakomba ko ibia bamokakabi, badabi na mohelo. 26 Tengasa, elenge Sesa adi na mohelo mo nde yo mɛnɛ, oko moda momina apa adi Mwana makoki ma boda na mohelo mo nde yo mɛnɛ. 27 Ko apaka adi Mwana kpatsi e bosambedja, tine bo adi Mwana o Moto. 28 Pɛ bokamoani, tengasa ehole aduake, ibapuseamaka baokabi kɔpi e nde 29 ko baimabi ta makila ma bobo. Bia ibakɔkɔ bopele, bapusoabi tine bodiha bomɔ, endolo ibia ibakɔkɔ bobe bapusoabi tine bodiha esambi*. 30 Naboaniti bokɔ eka emɔti tina e mbi mɛnɛ. Nasambedjaka oko abalaka Ndjakomba na mbi ko esambi e mbi edi bodjo, tine bo natahombaka bokɔ eka na bopala bo mbi mɛnɛ, endolo na bopala bo yona olomani.»

31 «Ekada bo napaka tati tina e mbi mɛnɛ, tati emina etadake na tina. 32 Endolo edi okina apake tati tina e mbi ko nadjebaka bo tati emina edi soti. 33 Olomakani balomami adi Yoane ko yo apaka tati e soti*. 34 Mbi, naditi na tina e tati e moto; endolo nabalaka bea bɛngi oheleni. 35 Yoane adaka elenge molinda mowanedjakabo tine mopɛ bohu. Endolo ino, odimakani bosepa mooehole mokɛkɛ na bohu bo nde. 36 Endolo nadi na tati enɔi na bonɛnɛ bonɔ e Yoane, tengasa misala makɔkɔ mbi, oko mia mipakani Sesa bo namikokedje. Misala mimina mapaka tati tina e mbi bo Sesa alomakani. 37 Ko Sesa yona olomakani yo pongono apaka tati ta tina e mbi. Endolo, oiyokani kɔpi e nde ko oiyenɛni nongo boso bo nde, 38 ko tobaneakeni mibalo mi nde temiyeyoe ta tei e bino, tine bo todimeni yona olomaka yo. 39 Okaikoeni bopele makomi tine bo okalɛdjeni bodiha na ndjea e mu bomɔ bo seko: enakobea edi makomi mamina mapaka tati tina e mbi*. 40 Enakobea, otapalakani bodua adi mbi bɛngi odiheni mohelo. 41 Tenahombe gala ikadonge adi bato. 42 Endolo nakodjebeni bopele: oditini na epaeli tina e Ndjakomba. 43 Naduaka na kombe e Sange e mbi ko olonini boasɔnini; endolo ekadabo moto adoi na kombe e nde mɛnɛ, ino bomoasɔkɔ! 44 Okapaleni seko ekumu ekadonge adi bato endolo tohombakeni ekumu ekadonge adi Ndjakomba. Moda ndani oboanini bodima? 45 Endolo pɛ bolɛdjɛni bo nopundakeni adi Sange e mbi. Te mbi, edi Mose moto opundabini*, yo moto oisakano elɛndɛ. 46 Okadimeani mɛnɛ Mose, odimeakabinini pongono, tengasa yo akomaka ta tina e mbi*. 47 Endolo edakabo ino todimeni imikoma yo, moda ndani obwanini bodimani mibalo mi mbi?»