1 Ngɔngɔ i bobala bea, Yesu akɛ na batingami ba nde ta dɔngɔ ikina i ibɛngɛ ibeakabo Sedelɔne*. Akweaka na batingami ba nde ta gbie emɔti edaka oho. 2 Yudasi, yona omokababi, adjebaka pongono polo emina, tine boo Yesu ko batingami ba nde badaka na elama e bosonganaka oho*. 3 Na bea Yudasi adalaka boso bo engbanga e basoda na babanei bia bakondji ba banganga ba Ndjakomba ko bapalusai bamopakabo. Aimea ta gbie emina engbanga na bato bapelamaki milodji, tanda ko bipeko. 4 Elenge Yesu adjebaka midjɔ misusu mibwanaka bomoimea, akɛkɛ boso bo bobo ko abahɔdjɔkɔ: «Wahombakano nda?» 5 Bamosɔmbedjaka: «Yesu o Nasaleta.» Yesu abalaka na bu: «Edi mbi.» Ko Yudasi yona omokababi, adaka pongono ena engbanga na bu. 6 Ehole ebalaka Yesu na bu: «Edi mbi,» basɔmbɔkɔ ngɔngɔ ko bakwakaka ta kpɔtɔ. 7 Yesu abahɔdjɔkɔ naikina: «Wahombakano nda?» Bomosɔmbedjaka: «Yesu o Nasaleta.» 8 Yesu abasɔmbedjaka: «Nabali na nu ehele, edi mbi. Edaka boo ohombakanini, kinani bato bakina bayane.»

9 Edaka tine bokokedjama bo mobalo mobalaka yo: «Nabungedjiti nongo omɔti o bobo ta bia ibapani wɛ.» 10 Simo Piɛlɛ adaka na mopamba; amoiwaka ko alenaka mosali o nganga monɛnɛ o Ndjakomba itoi i ebɔ e bami. Mosali omina bamobeaka na kombe e Malukusu. 11 Endolo Yesu abalaka na Piɛlɛ: «Sɔmbedja mopamba mo wɛ ta igbogbo! Olɛdjɛkɛ boo nata mwake kɔbɔ e saya yena epani Sesa*?»

12 Engbanga e basoda na mokondji o bobo ko babanei ba bayuda bapeaka Yesu, bamonangaka mbɔti. 13 Bakɛkɛ na nde boso mɛnɛ adi Ana, yona odaka bokio bo Kaipa ko nganga monɛnɛ o Ndjakomba ta bianga bimina. 14 Enakobea edaka Kaipa moto opaka ilako adi bakondji ba bayuda: «Otasipoakani edi bopele boo moto omɔti agwɛ tine bato basusu ko ekomi esusu edae pɛ bobeha*.»

15 Simo Piɛlɛ ko motingami okina bakimanaka Yesu. Motingami omina adjebanaka bopele na nganga monɛnɛ o Ndjakomba ko akweaka na Yesu ta ikanga i bopango bo ndako bo nganga monɛnɛ o Ndjakomba. 16 Endolo Piɛlɛ adikaka sokolu, mbuti na ekukɛ. Na bea, motingami okina, yona odjebanaka bopele na nganga monɛnɛ o Ndjakomba, aimanaka sokolu ko abalaka na mwali yona odaka sindjili o ekukɛ, ko akwedjaka Piɛlɛ. 17 Mosali mwali yona odaka sindjili o ekukɛ abalaka na Piɛlɛ: «Wɛ oditi pongono, omɔti o batingami ba moto yonaoo?» Abalaka: «Ngasa, te mbi.» 18 Basali ko basindjili badaka ena; bawanedjaka mosa, tengasa piɔ edaka epipo ko baokaka mosa. Piɛlɛ adaka na bu ko aokaka mosa pongono.

19 Na bea Nganga monɛnɛ o Ndjakomba aimeaka bosambedja Yesu ta midjɔ miendji ba batingami ba nde ko na bileho bilehaka yo. 20 Yesu amosɔmbedjaka: «Nabalaka ta bohu na bato basusu ba ngondo; nalehaka ta ba sinagoga, ta tepelo, ko ta polo iputoanaka bayuda basusu; naibalaka ta mbombi. 21 Ohɔdjɔkɔnini tina nda? Hɔdjɔni bato bia baokaka meako midaka mbi bobala: badjebaka bopele, meako ndani mibalaka mbi.» 22 Na bobala bea, omɔti o babanei odaka ena, abomaka Yesu epapata ko abalaka: «Edi moda mobwani na wɛ bosɔmbedja nganga monɛnɛ o Ndjakomba?» 23 Yesu amosɔmbedjaka: «Nakabala eka emɔti ebe, inedjani bobe bomina; endolo tati e bali mbi ekada soti, tina ndani ebomini wɛ?» 24 Na bea Ana amolomaka, monangamake na mbɔti adi Kaipa, nganga monɛnɛ o Ndjakomba.

25 Ta ehole emina, Simo Piɛlɛ, yo adikaka ena aoka mosa. Bamohɔdjɔkɔ: «Wɛ oditi pongono omɔti o batingami ba moto yo?» Endolo Piɛlɛ ainganaka: «Ngasa, te mbi.» 26 Okina mosali o nganga monɛnɛ o Ndjakomba, odaka sange e moto yona olenaka Piɛlɛ itoi, abalaka na nde: «Naonɛkiti wɛ na nde ta gbie?» 27 Endolo Piɛlɛ ainganaka naikina. Ko na mbala emɔti kɔkɔ akɔkɔlɔkɔ.

28 Baimana na Yesu adi Kaipa ko bakakwea na nde adi gupɛnɛlɛ o Baloma, edaka ehuma mɛnɛ. Endolo bakondji ba bayuda ibakɛkɛ na Yesu ta ndako e gupɛnɛlɛ, baikweaka oho; basaka saimedja mbindo, tine boyaka mia ma pasika. 29 Na tina emina gupɛnɛlɛ Pilato aimaka sokulu bobatanea. Abahɔdjɔkɔ: «Modjɔ mopundaka na nu moto iyo nda?» 30 Bamosɔmbedjaka: «Amiti da moto mobe, lobwaniti bodua amopunda!» 31 Pilato abalaka na bu: «Motombani ino bɛnɛ ko mosambedjani elenge mobeko mo bino.» Bayuda bamosɔmbedjaka: «Lotungiti bodumba moto ta bogwa.»

32 Bɛngi boo ekokedjame mibalo misusu mibalaka Yesu, tine etingodje moda mo bogwa modaka na nde agwɛ. 33 Na bea Pilato akweaka naikina ta ndako e nde. Aimanaka na Yesu ko amohɔdjɔkɔ: «Odi Mokondji o bayuda?» 34 Yesu amosɔmbedjaka: «Obali bea wɛ mɛnɛ kaoko bato bakina babali na wɛ tina e mbi?» 35 Pilato asɔmbedjaka: «Mbi naimei moyuda? Bato bia ba ekomi e wɛ ko bakondji ba banganga ba Ndjakomba baopundi adi mbi, modjɔ mokɔi wɛ nda?» 36 Yesu asɔmbedjaka: «Bokumu bo mbi boditi bokumu bo ngondo ye; ekadabo bokumu bo mbi bodae bo ngondo ye, basali ba mbi bakɔki ana bila tine mbi, bɛngi nadae pɛ bopama ta mɔmɔ ma bakondji ba bayuda. Endolo ngasa, bokumu bo mbi boditi bo ngondo ye.» 37 Na bea Pilato abalaka na nde: «Odi mɛnɛ Kumu?» Yesu asɔmbedjaka: «Wɛ moto obali boo: nadi Mokondji*. Nabotama ko nadua ta ngondo tine bopa tati ta tina e soti. Moto odi ta dɔngɔ i soti, akɔke meako mikabale mbi.» 38 Pilato amohɔdji naikina: «Edi soti nde?»

Ngɔngɔ imibalo mia, Pilato aimaka naikina adi bayuda ko abalaka na bu: «Naeniti nongo modjɔ moboloma momi yo ta bogwa. 39 Elenge alamano na bokɔkɔ bo di na nu, botingoa mobɔlɔkɔ omɔti ta enɔeli ta tɛkɛ e Pasika. Wapalakani notingoeni Mokondji o bayuda?» 40 Bamosɔmbedjaka na bogama: «Ngasa, te moto yona! Endolo Balaba moto apalaka so!» Enakobea, Balabase adaka mowoi*.