1 Ebee ãbi m'emfa bwɛn emfa. Ebee mfya otsoo, ebee ye pfuru okal, ebee y'ɔ̃kwal-nsɔɔ okal, ebee hɛ̃ ye kwee okal. 2 Emfa ngemɔ̃ onge baan ba tiɛɛn-tiɛɛn, ekal y'efua ki kokɔ ki ãbiaal m'Endɔɔ e Nziã, ãbiaal m'ãywɛn ɔ̃mfee, kwɛn me mɔ̃, byɛ ekwel me ndɔɔ obvuul. 3 Ke ngwel wɛ, «byɛ embio, bu emwɛn kwɛn Mfam oli ngesɛ✝.»

4 Esyal tsotsoo a Mfam, ndɛ oli nkɔɔn yi omwiĩ yi éti baal pfɛɛ, kɛn a Nziã osueel yɔ bvool yɔ eli y'ɔ̃bvɛn ke mviil ã ndɛ. 5 Byam hɛ̃, onge ãnkɔɔn m'ãli m'omwiĩ, eyɔɔl kwɛn atuu byɛ me ndɔɔ yɛn byɛ ekal nzɔ yi ɔ̃fel. Byɛ hɛ̃ ekal nkel a angaa-a-Nziã ba ngel, kwɛn byɛ ewa ãkab m'ɔ̃fel ola Nziã, ãkab m'ekiool ndɛ me nkuul a Yeso Mãsia. 6 Ke ngwel wɛ, etal m'áyɛɛn onse Ɔ̃kaan a Nziã:

«Mɛ̃ nsuul nkɔɔn ngamɔ̃ yi nkiin ke Siɔ̃, yi ásueel bvool yi ɔ̃bvɛn.

Mbuul wu ata kaã me yɔ kieel k'ayoo opfuru bam wɛ.» 7 Nkɔɔn oyɔ eli ye dzuun li bibi me ndɔɔ a byɛ b'akiool. Kɛn a me ndɔɔ a baal bɛn okiool pyɛ, ákel ndiri:

«Yɔ eli nkɔɔn yɛn atuu áti yɔ pfɛɛ,

kɛn a yɔ eyii nkɔɔn yi nkiin, yi ɔ̃soo a nzɔ.✝»

8 Ke mboo yinkyɛ, áyɛɛn bvool ndiri:

«Yɔ eli nkɔɔn yi abebɛɛl ãtsa me yɔ,

yi ebebal baal.✝»

Baal abebɛɛl ãtsa me yɔ, me ndɔɔ yɛn bɔ abebee k'akiool Endɔɔ e Nziã. Oyɔ hɛ̃ ndɔɔ yi áyɛɛl me ndɔɔ a bɔ. 9 Kɛn a byɛ, byɛ eli yam li ásueel, nkel yi angaa-a-Nziã b'Okwɛn, yam e baal ba ngel. Byɛ eli baal b'ésuun Nziã, kwɛn byɛ etsal nsia a ɛ̃sal ɛ̃ ndɛ mi ɛ̃nɛn. Ndɛ áti byɛ mbel kwɛn byɛ embal onse lempeel ebwel ke mwiĩ a ndɛ wu ɔ̃bvɛ-ɔ̃bvɛ. 10 Byɛ tsɔɔn k'éli baal a ndɛ wɛ, meba byɛ eyii baal a ndɛ. Ndɛ tsɔɔn k'ákesio byɛ nyiĩ wɛ, meba ndɛ oyii asio byɛ nyiĩ.

11 Andoo a dzii, byɛ b'eli ɛ̃mbwel-nkuul bvool eli anzii me nsie, mɛ̃ nsɔɔ ola byɛ bubu: Ebee efua bvi ombuul bvi ebedzwaan onse byɛ onɔɔn. 12 Ekal y'epfuũ bvi ngesɛ onse baal bɛn k'ayɛɛ Nziã wɛ, m'emfa okyɛ, ke mboo yi ebekwee bɔ byɛ ndiri byɛ ebesa obi, bɔ amwɛn ɛ̃sal ɛ̃ byɛ mi ɛ̃bvɛ-ɛ̃bvɛ, bvool alweel Nziã me tsoo li èya ndɛ. 13 Ekal ye lweel li ambiri bueel, me ndɔɔ a Mfam. Ekal ye lweel li ɔ̃kwɛn, me ndɔɔ yɛn ndɛ oli mfam wa ke ywel a baal bueel. 14 Ekal hɛ̃ ye lweel li amfam ba ke nsɛn a ndɛ, b'eyuɔɔl ndɛ me ndɔɔ yi awa b'abesa ãbi etumbu bvool me ndɔɔ yi atuɛɛn b'abesa obvɛ. 15 Ke ngwel wɛ, ndɔɔ yi edzii Nziã yɛn, ŋ'esa byɛ obvɛ, byɛ ekuru ɛ̃nywã ɛ̃ baal b'ali onse odzɛɛn y'owool-a-wool. 16 Ekal onge baal ba ndii, kɛn ondii o byɛ obee okal onge eluɔ ki efoo obi. Ekal onge asal a Nziã. 17 Ekal ye bvɛɛ e mbuul wueel, edzii andoo onse okiool, ebal Nziã, elweel ɔ̃kwɛn.

18 Asal, ewa amfam a byɛ bvɛɛ li bibi, ke kɛn a b'ali ngesɛ bvool y'efyɛ wɛ, elweel abi hɛ̃. 19 Ke ngwel wɛ, ŋɛn byɛ emwɛn ãmpal m'ãndɔɔ mɛn byɛ ki esi pyɛ, byɛ ekuru ɔ̃kwal me ndɔɔ a Nziã, obobɔ eli ngesɛ. 20 Ke ngwel wɛ, dzuun li emã, ŋɛn abɛɛl byɛ me ndɔɔ yɛn byɛ esi obi? Kɛn okɛɛn byɛ emwɛn fool ke mbee obvɛ b'esi byɛ bvool byɛ ekuru ɛ̃kwal, eli ndɔɔ yi ngesɛ ke mviil ã Nziã. 21 Oyɔ ndɔɔ yi áti byɛ mbel me ndɔɔ a yɔ, ke ngwel wɛ Mãsia ndyam hɛ̃ ámwɛn fool me ndɔɔ a byɛ, ndɛ osuo byɛ nkuul kwɛn byɛ eluɛɛn kuul e ndɛ. 22 Ndɛ k'ási obi wɛ, pfuru hɛ̃ k'épal onse ɔ̃nywã ndɛ wɛ. 23 Ŋ'ákeswel ndɛ ɛ̃tswɛ, ndɛ k'ákebveel ɛ̃tswɛ wɛ, ŋ'áketuaal ndɛ mpal, ndɛ k'ákeŋaan mbuul wɛ, kɛn a ndɛ áwi mbueel me mviɔɔl ɛ̃ Nziã wu abetsiil ãndɔɔ m'emfa ki dzu. 24 Ndɛ ndyam olaal ãbi ã bia-byɛ me nzuru a ndɛ nkal enkulusu, me ndɔɔ yɛn bia-byɛ ekwa m'obi bvool ekal y'omwiĩ me ndɔɔ ãndɔɔ mã dzu. Eli me nkuul a ãbwɔɔ ã ndɛ k'ebvuul byɛ. 25 Ke ngwel wɛ, byɛ éli onge emɛmɛɛ̃ bvi edziɔɔn, kɛn a meba byɛ eyebvool ol'Ɔ̃mbuaal y'Ɔ̃nkiaal a byɛ.