1 M'emfa okyɛ, onge bɛn Mãsia ámwɛn fool onse nzuru a ndɛ, byɛ hɛ̃, ekal y'ɔ̃yɛɛl wu emwɛn fool onge ndɛ, ke ngwel wɛ mbuul wu omwɛn fool onse nzuru a ndɛ, ŋ'aman y'ãbi. 2 Bɛɛn meba, me lio li esiil li omwiĩ o byɛ me nsie, ekal m'emfa ki edzii Nziã, ke m'emfa ki efua e byɛ bvi ombuul wɛ. 3 Ke ngwel wɛ, m'ãlio m'ã́bwel, byɛ bam ési ãndɔɔ m'edzii baal bɛn k'ayɛɛ Nziã wɛ, ŋ'ékekal byɛ onse ãndɔɔ m'esio, onse efua bvi ebi-ebi, onse obɔɔ o mbal, onse odza b'onduru ɔ̃ndel, onse onywã b'onduru ɔ̃ndel, bvool onse obuɛɛn b'anziã ba mfya b'oli ndɔɔ yi áluo. 4 Obobɔ, baal bɛn k'ayɛɛ Nziã wɛ akam me ndɔɔ yɛn byɛ k'ebedzuu nkuul mɔ̃ ye bɔ onse ãndɔɔ m'esio wɛ, bɔ bu abvi byɛ okwee. 5 Kɛn a bɔ akieel ayɛɛn m'ɛ̃sal ɛ̃ bɔ ola Nziã wu amaawal ɔ̃yɛɛl wu atsiil ãndɔɔ ã baal b'amwiĩ-mwiĩ ye mã b'ámaakwa. 6 Obɔ otsɛn bɛn ál'atsal Nsia yi Ngesɛ hɛ̃ ola baal bɛn ŋ'eyɛɛn ŋã amaakwa. M'emfa okyɛ, ke mbee a ŋ'ebɔɔ bɔ etumbu onge ki ebebɔɔ baal bueel m'emfa ki ombuul, bɔ akal y'elaã m'ɔ̃fel, m'emfa ki Nziã.

7 Ntɔ a eluɔ bvieel eyii tsotsoo. Oŋɔ̃ ekal y'ãyal bvool y'onkyab, kwɛn byɛ ekoo k'ebuɛɛn. 8 Ke nkwel a mbueel, edzii bakyɛ bam bibi, ke ngwel wɛ dzii efoo ɔ̃bɔbɔ wu ãbi. 9 Eyɔɔ bakyɛ, ebee obwɔɔl. 10 Ngɔmɔ̃ ngɔmɔ̃ onse byɛ oyɔɔ kab me nyiĩ a Nziã. Oŋɔ̃ ewuaal a bakyɛ me lɔ. M'emfa okyɛ, byɛ ekal asal ba ngesɛ b'atal ãkab ã Nziã m'emfa bwɛn emfa. 11 Yɔɔl kwɛn mbuul wu ayɛɛn, ayɛɛn ãndɔɔ m'ãfa ola Nziã. Wu asa ɔ̃sal, asa ndɛ me mpɛn yi ewa Nziã. M'emfa okyɛ, m'ãndɔɔ mbueel, baal bueel awa Nziã dzuun me Yeso Mãsia, ndɛ wɛn lweel ye waan eli li ndɛ ɔ̃bu nzal ɔ̃bu. Amɛn!

12 Andoo a dzii, mbaa yi ɛ̃mbio yi alɔ byɛ onse yɔ, ebee yɔ owal onge ndɔɔ yi ɛ̃kam, olɔ yɛɛn wɛn ndɔɔ yi ɛ̃kam eyi me byɛ. 13 Kɛn ekal y'esɛ me ndɔɔ yi esam byɛ onse ãmpal ã Mãsia. M'emfa okyɛ, ŋ'ekieel emɔɔn lweel e ndɛ, byɛ hɛ̃ ekieel eluul m'esɛ. 14 Okɛɛn atoo byɛ me nkuũ a Mãsia, byɛ eli baal b'esɛ. Ɔ̃fel wu omfam, Ɔ̃fel a Nziã oli nkal a byɛ. 15 Kɛn a yɔɔl kwɛn mbuul si ngɔmɔ̃ onse byɛ, ŋ'emwɛn ndɛ fool, abee lɔ omwɛn me ndɔɔ yɛn ndɛ oli ɔ̃bam a baal, wuo oli mbuul a pfuul, wuo abesa obi, wuo me ndɔɔ yɛn ndɛ abesam onse anga-ãndɔɔ. 16 Kɛn okɛɛn ndɛ amwɛn fool me ndɔɔ yɛn ndɛ oli ɔ̃kilisito, yɔɔl kwɛn ndɛ abee opfuru oyoo me ndɔɔ oyɔ. Kɛn a yɔɔl kwɛn ndɛ alweel Nziã me ndɔɔ a nkuun oyɔ. 17 Ke ngwel wɛ, lio li etsiil Nziã ãndɔɔ ã baal emeekoo, lɔ ebɛɛn me Nzɔ a Nziã. Okɛɛn abɛɛn me bia-byɛ, ke b'abee k'alweel Nsia yi Ngesɛ yi Nziã, kieel bwɛn ayesɛn? 18 «Bvool okɛɛn mbuul wa dzu obvuul ye fool lam, k'abi y'anga-ãbi kieel bwɛn akal?»✝

19 Obobɔ, b'amwɛn fool me ndɔɔ yɛn Nziã odzii obobɔ, yɔɔl kwɛn bɔ awa omwiĩ o bɔ me mviɔɔl ɛ̃ ndɛ wu ábuo bɔ, wɛn k'akwɛɛn k'asa b'élieel ndɛ ndiri asa wɛ. Yɔɔl kwɛn bɔ asa obvɛ kɛn osa.