1 Emfa kiki hɛ̃ byɛ b’akal, ewa alam a byɛ dzuun, m’emfa okyɛ onkyam ŋɛn baal bakyɛ onse bɔ k’akiool Endɔɔ e Nziã wɛ, bɔ akiool lɔ me ndɔɔ epfuũ e byɛ, ndɔɔ yi ayɛɛn bɔ pyɛ. 2 Ki nguo ki emwɛn bɔ epfuũ e byɛ bvi ebvɛ-ebvɛ bvool bvi ewa alam bvɛɛ. 3 Ompal o byɛ obee kɛn b’okwel-a-nzi okal, onge ofaal o mfu, olaal b’eluɔ bvi ãtswi bvi ɔɔl wuo ekɔ bvam bvi ebvɛ-ebvɛ. 4 Ompal b’ebii byɛ bvel-bvel okal b’onse ɔ̃kwal, ompal b’ɔ̃fel wu efyɛ ye wu opi b’onduru ɔ̃bvɛn ke mviil ã Nziã bvool bɛn k’ofa wɛ. 5 Emfa kiki, akaal ba ngel ba tsɔɔn, b’áli ye kaã me Nziã, áli y’ompal obɔ, me ndɔɔ yɛn bɔ ákewa alam a bɔ dzuun. 6 Emfa ngemɔ̃ onge Sala wu álweel Abalayam bvool áti ndɛ me «Mfam a mɛ̃.» Byɛ eyii baan a ndɛ b’akaal okɛɛn byɛ esa obvɛ, ki ebal pyɛ.

7 Emfa kiki, byɛ b’alam, efaal akal a byɛ onse ãbal. Eyɛɛ wɛn akaal ali y’okwal bibi. Ewal bɔ ye bvɛɛ, ke ngwel wɛ bɔ akieel ayɔɔ kab li elaã li taa-taa ola Nziã onge byɛ. Byɛ esa obobɔ, eluɔ si ngemɔ̃ k’èkii ãbuɛɛn a byɛ wɛ.

8 Obobɔ, byɛ bam bueel ekal ãtsam ngãmɔ̃, esa bakyɛ obvɛ, edzii bakyɛ me dzii li baan a Nziã, ekal ye nyiĩ a bakyɛ, ekal hɛ̃ y’okuaal o nzuru. 9 Ebee obi m’obi obveel, ebee ɛ̃tswɛ hɛ̃ m’ɛ̃tswɛ obveel. Ebveel m’ondɔɔl o kuɔɔl, nzal-a-ŋɛn Nziã ŋ’áti byɛ mbel, me ndɔɔ obobɔ, kwɛn byɛ ewal ɔ̃swal wu ondɔɔl o kuɔɔl. 10 Ke ngwel wɛ, Ɔ̃nkaan wa ngel ayɛɛn bubu: «Mbuul wu odzii k’akal y’omwiĩ bo ngesɛ bvool akal y’ãtsoo m’esɛ, ebvaan ndɛ abee k’ayɛɛn obi me bakyɛ bvool abee ãndɔɔ mã pfuru oyɛɛn. 11 Ebvaan ndɛ abal ãbi, asa obvɛ bvool abii opi y’ɔ̃tɛɛ̃ wueel. 12 Ke ngwel wɛ, mviil ã Mfam ãli nkal a baal b’ali dzu bvool abeyoo ãbuɛɛn ã bɔ, kɛn a ndɛ abetiɔ b’abesa obi eboo.✝»

13 Okɛɛn byɛ edzii bam k’esa obvɛ, wu asa byɛ obi nã? 14 Onkyam ŋɛn byɛ emwɛn fool me ndɔɔ obvɛ b’esa byɛ, byɛ eli baal b’esɛ! Ebee ye buɔ o baal okal bvool ɛ̃kwal ɛ̃ byɛ ɛ̃bee ke ywel okal. 15 Kɛn onse ɛ̃kwal ɛ̃ byɛ, ekal ye lweel e Mãsia wu oli Mfam a byɛ. Ekal ãlio mbueel onse ɔ̃yɛɛl wu ebveel ɛ̃mfuul ɛ̃ baal b’afuul byɛ otsɛn b’eli byɛ ye kaã. 16 Kɛn a byɛ esa ndɔɔ oyɔ y’efyɛ bvool ye bvɛɛ. Ekal y’ãtsam mã ngesɛ, me ndɔɔ yɛn b’akwee byɛ me ndɔɔ epfuũ e byɛ bvi ngesɛ onse Mãsia, abɔɔ opfuru. 17 Ke ngwel wɛ, ngesɛ mbuul amwɛn fool ŋ’esa ndɛ obvɛ okɛɛn Nziã odzii obobɔ, ye k’amwɛn fool m’osa b’obi. 18 Nzal-a-ŋɛn, Mãsia ndyam hɛ̃ ámwɛn fool sa ngelemɔ̃ ɔ̃bu me ndɔɔ ãbi ã baal. Ndɛ wa dzu, ákwi me ndɔɔ a baal b’ãbi, me ndɔɔ yi abiri bɔ ola Nziã. Ndɛ ákwi m’ombuul, kɛn a ndɛ ásiool m’Ɔ̃fel. 19 M’Ɔ̃fel ondɛ, ndɛ oyetsal Nsia yi Ngesɛ ol’ɛ̃fel mi me bwal. 20 Ɛ̃fel omyɛ̃ tsɔɔn ɛ̃́bee Nziã olweel me lio li ékesuo ndɛ osɛ-mwiĩ o ndɛ, ŋ’éketuu Nowa ãsua. Ɔ̃bvɛn a baal atsi-tsiri, bɔ mpuɔ̃, ásam onse ãsua bvool ábvuul m’ãdza. 21 Eli emfa ngemɔ̃ onge opongo b’obvuul byɛ meba. Otsɛn b’opongo k’oli ombaal o mbiin e nzuru wɛ, kɛn a bɔ oli owa b’ɔ̃kwal ola Nziã m’okal y’ãtsam mã ngesɛ. Bɔ obvuul byɛ m’osiool o Mãsia. 22 Ndɛ oyɛn ywel bvool oli me kuɔɔl e Nziã ki elam. Meba, ãnzwel y’ɛ̃fel mi y’omfam ye mi ye waan ɛ̃li ke nsɛn okwɛn o ndɛ.