1 Meba ŋã, mɛ̃ eyɛɛn y’akuul-kuul b’Ebvɔɔn onse byɛ. Mɛ̃ hɛ̃ ndi ɔ̃kuul a Ebvɔɔn onge bɔ, mɛ̃ émwɛn k’ékemwɛn Mãsia ãmpal bvool ndi ye boo li mɛ̃ onse lweel li èyemɔɔn. 2 Ekal ankiaal a nkel a emɛmɛɛ̃ e Nziã bvi eli onse byɛ. Ekyab me ndɔɔ a bvɛ. Oyɔ ebee ndɔɔ yi aywɛɛn byɛ m’oywɛɛn okal, kɛn a byɛ esa ɔ̃sal a byɛ m’ɔ̃kwal ngɔmɔ̃ m’emfa ki edzii Nziã. Ebee obobɔ osa me ndɔɔ a pfuul o nzi, esa me ndɔɔ yɛn byɛ edzii bam k’ewuaal a emɛmɛɛ̃ obvɛ. 3 Ebee baal b’awi byɛ okiaal onyam m’onyam, kɛn a byɛ ekal baal bɛn bɔ aluɛɛn a kuul e bɔ. 4 Obobɔ, ŋ’ekieel epal mfam a ankiaal b’emɛmɛɛ̃, byɛ ekieel ebɔɔ ekɔrɔ ki omfam kyɛn ompal k’ofa bam wɛ.

5 Emfa kiki hɛ̃, byɛ b’ãnsam, elweel akuul-kuul b’Ebvɔɔn. Byɛ bueel, ekal y’okuaal o nzuru ye bakyɛ, ke ngwel wɛ ákel bubu: «Nziã abekii ɛ̃yɛɛl ɛ̃ baal b’ali y’ondɛɛl o nzuru, kɛn a ndɛ abesio b’ali y’okuaal o nzuru nyiĩ.✝» 6 Oŋɔ̃ ekuaal ãnzuru ã byɛ ke nsɛn a kuɔɔl e Nziã ki waan, kwɛn ndɛ andɛɛl byɛ me lio li éyɛɛl ndɛ. 7 Etuul ãndɔɔ mbueel m’ebekɛɛ byɛ nguo nkal a ndɛ, ke ngwel wɛ ndɛ wu abekiaal byɛ.

8 Ekal y’onkyab, ekal angɔ-mwiĩ! Ɔ̃taal a byɛ wu ɔ̃pfu afa ku abwel ku onge ebob ki eta ɛ̃baan m’obii o wu ekɔɔl kyɛ m’okɔɔl. 9 Esɛn ãna ke nkwel a ndɛ bvool ekal ye mpɛn onse okiool. Byɛ eyɛɛ wɛn baan-ngoo a byɛ b’atsɔɔn m’ɔ̃kiri wueel abebwel onse ãmpal m’emfa kiki hɛ̃. 10 Kɛn a ke mbee ŋ’ebwel byɛ onse ãmpal me muaan-lio, Nziã wu nga-nyiĩ yueel, wɛn me Yeso Mãsia, oti byɛ mbel onse lweel e ndɛ li ɔ̃bu, ndyam àsuul byɛ baal b’ɔ̃koo, àwɛɛl byɛ bvool àsuul byɛ baal bɛn k’atsiɔ̃ wɛ. 11 Lweel eli li ndɛ ɔ̃bu nkal ɔ̃bu! Amɛn!

12 Silas* wu ebewal mɛ̃ onge ndoo wa taa-taa, owueel mɛ̃ m’oswɛn o byɛ ɔ̃nkaan wu m’ãmbel ke kwɛ. Mɛ̃ nswɛn ndɛ me ndɔɔ yi ewɛɛl byɛ bvool me ndɔɔ yi esuo byɛ wɛn, byɛ etɛɛn onse nyiĩ a Nziã yi taa-taa. 13 Bvɔɔn li Babilon ebio byɛ, lɔ li ésueel Nziã onge byɛ. Maak wu muaan a mɛ̃ hɛ̃ obio byɛ. 14 Ebio bakyɛ m’ɔ̃bio wa dzii li onziã. Opi okal ye byɛ bueel b’eli onse Mãsia!