1 Mɛ̃ wu Pool, mɛ̃ ndi ntam a Yeso Mãsia m'ontam b'etam Nziã wu Ɔ̃mvuul a bia-byɛ, ye Yeso Mãsia wu oli kaã e bia-byɛ. 2 Mɛ̃ ngyuɔɔl ɔ̃nkaan wu ola Timote, muaan a mɛ̃ wa taa-taa onse okiool. Yɔɔl kwɛn Nziã wu Taal ye Mfam a bia-byɛ Yeso Mãsia asio yɛ nyiĩ, asa yɛ obvɛ bvool awa yɛ opi!

3 Ŋ'ékeyi mɛ̃ Maseduaan, mɛ̃ étam yɛ k'akal k'Efedze, kwɛn yɛ wa baal bakyɛ ãnkunkwa wɛn abee ãtee mã mfya otee, 4 bvool kwɛn yɛ liaal bɔ wɛn abee ɔ̃kwal olɔ onse ese-sam, onse ɔ̃luo wu ãnkuũ m'ankɔɔ wɛn ntɔ pyɛ. Ãndɔɔ omɔ̃ ãbebiri kɛn ɛ̃tsuun ke mboo yi akasa ɔ̃sal a Nziã wu abvuul baal me nkuul okiool. 5 Otsɛn be nta mɛ̃ yɛ k'asa obobɔ, me ndɔɔ yɛn dzii li efa onse ɔ̃kwal wa tsɛtsɛ emɔɔn, kwɛn baal akal y'ãtsam mã ngesɛ, y'okiool bo ngwanyã. 6 Baal bakyɛ ámaasiil nkuul oyɔ, ámaatwal yi ebiri bɔ onse ãyɛɛn mɛn otsɛn pyɛ. 7 Bɔ adzii k'akal ayiool b'ãngel, kɛn a bɔ k'akwaal otsɛn o m'eyɛɛn bɔ wɛ, onkyam o m'ebeyɛɛn bɔ y'ɔ̃tɛɛ̃ wueel.

8 Bia-byɛ eyɛɛ wɛn Ngel eli ngesɛ, okɛɛn bia-byɛ ekiaal yɔ m'emfa ki ekoo. 9 Bia-byɛ bvool eyɛɛ wɛn, k'áwi Ngel me ndɔɔ a baal ba dzu wɛ, áwi Ngel me ndɔɔ a baal bɛn k'abekiaal yɔ wɛ, ye bɛn k'abewa amfam bvɛɛ wɛ, ye bɛn k'abelweel Nziã wɛ, y'anga-ãbi. Áwi Ngel me ndɔɔ a b'abesiaan Nziã y'ãndɔɔ mã ngel wɛ. Áwi Ngel me ndɔɔ a b'abebam atal wuo angoo a bɔ, bvool me ndɔɔ abam a baal. 10 Áwi Ngel me ndɔɔ a baal b'ali y'epfuũ ki abvool ntal ye mbuul wɛn bɔ kɛn abaal bakyɛ wɛ, abɔɔl b'awal angaburu-abɔɔl, b'abesa obɔɔ̃ b'ankyal, ye baal a mfya, ye b'abelab ɛ̃kyel mi mfya, y'ãndɔɔ mbueel mɛn k'ayi nkuul mɔ̃ y'ãtee mã dzu wɛ. 11 Ãtee omɔ̃ ãyi nkuul mɔ̃ ye Nsia yi Ngesɛ yi lweel e Nziã. Ndɛ wu Nziã wu odzii obvɛ o bia-byɛ, áwi mɛ̃ Nsia yi Ngesɛ oyɔ.

12 Mɛ̃ mveel ãtuɛɛn ola Mfam a bia-byɛ Yeso Mãsia wu owi mɛ̃ mpɛn yi ekoo me ndɔɔ ɔ̃sal a mɛ̃. Mɛ̃ mveel ndɛ ãtuɛɛn me ndɔɔ yɛn ndɛ omwɛn kwɛn mɛ̃ mvaan ŋ'ewel ndɛ mɛ̃ onse ɔ̃sal a ndɛ. 13 Mɛ̃ wɛn tsɔɔn éli mbuul wu ákesiaan ndɛ, wu éketuaal ndɛ mpal, bvool wu éketoo ndɛ ɛ̃tswɛ. Kɛn a ndɛ osio mɛ̃ nyiĩ, ke ngwel wɛ, mɛ̃ k'ékeyɛɛ m'ékesa mɛ̃ wɛ, bvool mɛ̃ éywɛn okiool. 14 M'emfa okyɛ, Mfam a bia-byɛ osio mɛ̃ me nyiĩ a ndɛ yi enduru ɔ̃ndel, ndɛ owi mɛ̃ okiool ye dzii li eli onse Yeso Mãsia. 15 Tal ndɔɔ yi taa-taa bvool yi ebvaan m'okiool, yɔ bu: Yeso Mãsia oyi m'ɔ̃kiri me ndɔɔ yi abvuul anga-ãbi. Mɛ̃ ndyam wu nduru ãbi onse bɔ. 16 Kɛn a Nziã osio mɛ̃ nyiĩ, me ndɔɔ yɛn me nkuul a mɛ̃, mɛ̃ wu nduru ãbi, Yeso Mãsia asuo osɛ-mwiĩ o ndɛ bɛn ndel pyɛ onge eliĩ ola baal b'akieel akiool ndɛ, me ndɔɔ yi abɔɔ elaã li ɔ̃bu nkal ɔ̃bu. 17 Yɔɔl kwɛn lweel y'omfam b'ɔ̃bu ekal bvi Ɔ̃kwɛn wu ɔ̃bu, ndɛ wɛn k'akwa wɛ, wɛn baal k'abemwɛn wɛ, bvool kɛn ndyam sii wu oli Nziã! Amɛn!

18 Muaan a mɛ̃ Timote, tal ãtee m'ewa mɛ̃ yɛ. Mɔ̃ ãyi nkuul mɔ̃ y'ãndɔɔ m'élieel aliaal-ɛ̃kiɛɛn a Nziã tsɔɔn me ndɔɔ a yɛ. Ãyɛɛn omɔ̃ ã̀wa yɛ mpɛn m'emfa kyɛn yɛ koo k'adzwaan mvel yi ngesɛ, 19 y'okiool y'ãtsam m'ɔ̃kwal mã ngesɛ. Baal bakyɛ amaabee k'ayoo ãtsam m'ɛ̃kwal ɛ̃ bɔ mã ngesɛ, obobɔ, bɔ bu aywɛn a okiool. 20 Onse baal obɔ, eli Himene y'Alekesandel. Mɛ̃ ntiɔ bɔ me mviɔɔl ɛ̃ Satana, kwɛn bɔ ayio k'abee Nziã obesiaan.