1 Bee ye mbuul wu amaayal mpɛn-mpɛn oyɛɛn. Kɛn a yɛ awa ndɛ luo onge bɛn ndɛ oli tal a yɛ. Wa ãnsam luo onge baan-ngoo a yɛ. 2 Akaal b'amaayal, wa bɔ luo onge bɛn bɔ ali angoo a yɛ, b'ali ãnsam m'akaal, wal bɔ onge ankyel a yɛ, onse otsɛ-tsɛ bueel.

3 Kal ye bvɛɛ li akaal b'apfiil, bɛn taa-taa ali bam sii. 4 Kɛn okɛɛn ɔ̃kaal wu ɔ̃pfiil oli ye baan wuo atiɔɔl, ebvaan kwɛn ŋ'ɛ̃kwel bɔ asuo onziã o bɔ onse owuaal b'ewuaal a bɔ yam e bɔ. Bɔ abveel aburu a bɔ obvɛ b'ési bɔ bɔ. Oyɔ ndɔɔ yi edzii Nziã. 5 Ɔ̃kaal wu ɔ̃pfiil wu oli y'osii, wɛn wu awuaal a ndɛ pyɛ, alɔ okiool o ndɛ me Nziã. Ndɛ abuɛɛn Nziã tsia mwiĩ kwɛn ndɛ awuaal a ndɛ. 6 Kɛn ɔ̃kaal wu ɔ̃pfiil wu akal onse efua, ŋ'amaakwa, onkyam ŋɛn ndɛ oli mwiĩ. 7 Omɔ̃ ãndɔɔ m'etam yɛ bɔ osa, kwɛn bɔ akal baal b'aywɛn elyal. 8 Ŋɛn mbuul k'asiɔɔl eburu ndɛ wɛ, bvel-bvel baal ba yam e ndyam, ndɛ ŋ'ayiri okiool o ndɛ, bvool oli ɔ̃bi onduru wɛn k'akiool Nziã wɛ. 9 M'oswɛn o yɛ nkuũ mbuul onge ɔ̃kaal wu ɔ̃pfiil onse ɔ̃luo wu akaal b'apfiil, obvie ndɛ mvel enduru otsiaal ekal ãku-ãsɛɛn (60). Ndɔɔ yinkyɛ yɛn obvie ábaal ndɛ kɛn a m'ɔ̃lam ngɔmɔ̃, 10 bvool ebvaan ndɛ akal wɛn baal ayɛɛ ndɛ m'ɛ̃sal ɛ̃ ndɛ mi ngesɛ: Okɛɛn ndɛ ákuul baan a ndɛ ngesɛ, ákeyɔɔ baal ngesɛ, ákesuɔɔl ntaã e ba ngel, ákewuaal b'ali onse fool, bvool ákesa ɛ̃sal mi ɛ̃bvɛ-ɛ̃bvɛ mi emfa bwɛn emfa.

11 Me b'otal apfiil b'ãnsam, bee bɔ onse ɔ̃luo wu apfiil olɔ, ke ngwel wɛ, ŋɛn bɔ aluul m'efua ki abaal bvool, bɔ atiɔ Mãsia eboo. 12 M'emfa okyɛ, bɔ abɔɔ etsob me ndɔɔ yɛn bɔ k'asi ndɔɔ yi elab bɔ ɔ̃kyel ŋ'ɛ̃kwel ke nkwel a Mãsia wɛ. 13 Ndɔɔ yikyɛ yɛn, onge bɛn bɔ ayii ki asa pyɛ, bɔ akal y'epfuũ bvi adzuu me nzɔ bwɛn a nzɔ. Ndɔɔ yi enduru mbi yɛn, bɔ akal ye ndiaal, baal bɛn k'akwɛ ndɔɔ wɛ bvool b'abeyɛɛn ãndɔɔ mɛn k'ãtal bɔ wɛ. 14 Obɔ otsɛn bɛn, mɛ̃ nzii kwɛn apfiil b'ãnsam akaal abaal bvool, kwɛn bɔ aburu baan, abiri ãnzɔ ã bɔ. Obobɔ, bɔ k'awa ataal a bia-byɛ mpwe yam yi akwee bia-byɛ wɛ. 15 Ke ngwel wɛ, apfiil ke kwɛ amaasiil nkuul yi dzu m'oluɛɛn o Satana. 16 Kɛn okɛɛn ɔ̃kaal wu ɔ̃kiool oli y'apfiil onse yam e ndɛ, yɔɔl kwɛn ndɛ atal ãndɔɔ ã bɔ, abee pfuũ e bɔ owa m'Ebvɔɔn. M'emfa okyɛ, Ebvɔɔn etal ãndɔɔ m'apfiil b'aywɛn a b'awuaal a bɔ.

17 Aku-kuul b'abiri Ebvɔɔn ngesɛ, bvel-bvel b'ali ye pfuũ li abetee bvool abeyiool, ebvaan bɔ abɔɔ lweel nsa yuaal. 18 Ke ngwel wɛ, Ɔ̃nkaan a Nziã ayɛɛn ndiri: «Oyɛɛ k'ekuru ɔ̃nywã a ngwɛmbɛ ŋ'enyii ndɛ nsia e bele wɛ.» Ndɛ bvool olieel ndiri: «Ɔ̃sal obvaan abɔɔ furu e ndɛ✝.» 19 Ŋɛn mbuul oyefɛn ɔ̃kuul Ebvɔɔn ola yɛ, oyɛɛ ke kiool ndɛ wɛ. Yɛ m'okiool, obvie ekal y'amwɛn wuo ayoo buaal wuo atyel. 20 Baal b'asa ãbi, wa bɔ mbyel ke nkwel a baal bueel, kwɛn bakyɛ hɛ̃ akal ye buɔ. 21 Ke nkwel a Nziã, ke nkwel a Yeso Mãsia, ke nkwel ãnzwel m'ásueel, mɛ̃ ngwi yɛ pfuũ li anɔɔn k'asa ãndɔɔ me ntam mɛ̃ yɛ osa. Bee ãsu ã baal osuaal, bee hɛ̃ y'ɔ̃bɛɛ okal. 22 Bee nkaã osa yi andɔɔl mbuul mviɔɔl. Bee hɛ̃ onse ãbi ã mbuul osam, kwɛɛ nzuru a yɛ yam tsɛtsɛ.

23 Abee kɛn ãdza obenywã, anywã hɛ̃ embal-mbal e bvine me ndɔɔ a mwiĩ wu abesa yɛ, nzal-a-ŋɛn yɛ abeluu bibi.

24 Ãbi ã baal bakyɛ ãbemɔɔn bam ye k'atsiil ãndɔɔ ã bɔ. Kɛn a mã bakyɛ, abeyɛɛ mɔ̃ kɛn ãmbee. 25 Eli emfa kiki hɛ̃ m'ɛ̃sal mi ngesɛ: Myɛ̃ ɛ̃bemɔɔn kal-a-kal tswa-a-tswa ola baal bakyɛ, kɛn ke mboo yɛn myɛ̃ k'ɛ̃mɔɔn tswa-a-tswa oŋɔ̃ wɛ, myɛ̃ k'ɛ̃koo k'ɛ̃kal m'edziɔɔn ɔ̃bu wɛ.