1 Taa-taa, andoo, byam eyɛɛ wɛn oyɔɔ b’eyɔɔ byɛ bee k’oli bo ngwel wɛ. 2 Byɛ bvool eyɛɛ wɛn, ke mbee a ŋ’emwɛn bee fool bvool enywɛn ɛ̃tswɛ ke Filipese, Nziã owi bee ãŋã m’etsal bee byɛ Nsia a ndɛ yi Ngesɛ onse ãmvel bibi. 3 Ke ngwel wɛ, mpɛn a ãtee ã bee ke me ndɔɔ yɛn bee eli onse odziɔɔn wɛ wuo eli onse ãndɔɔ mã mbiin wɛ, ke me ndɔɔ yɛn bee hɛ̃ ebii k’epfuru baal wɛ. 4 Kɛn onge bɛn Nziã okie ɛ̃kwal ɛ̃ bee, ndɛ okiool k’awa bee Nsia a ndɛ yi Ngesɛ. Obobɔ, bee k’eyɛɛn me ndɔɔ yi esa baal esɛ wɛ, bee eyɛɛn me ndɔɔ yi ewa Nziã esɛ, ndɛ wu akie ɛ̃kwal ɛ̃ baal. 5 Byɛ bvool eyɛɛ wɛn bee mwɛn-éndɛɛl kɛn eyɛɛn ãyɛɛn m’opɛɛn wɛ, bee mwɛn-éndɛɛl kɛn esi ãndɔɔ me ndɔɔ yi ebɔɔ nzi wɛ, Nziã ndyam oyɛɛ. 6 Bee k’ebii lweel li efa ola baal wɛ, ekal li efa ola byɛ, ekal li efa ola bakyɛ. 7 Ke yam, onge bɛn bee eli antam a Mãsia, bee kɛn ekeeywɛɛn byɛ ãndɔɔ m’oywɛɛn. Kɛn a bee ekal y’efyɛ onse byɛ, onge ngoo wu akyab baan. 8 M’emfa okyɛ, me ndɔɔ a dzii e bee me ndɔɔ a byɛ, bee k’ekeedzii k’ewa byɛ kɛn a Nsia yi Ngesɛ wɛ, bee ekeedzii k’ewa byɛ hɛ̃ elaã e bee-myam, ke ngwel wɛ byɛ al’ayii y’ɔ̃bvɛn bibi me ndɔɔ a bee. 9 Andoo, byɛ eyɛɛ ɔ̃sal ye fool li emwɛn bee: Bee esal tsia ye mwiĩ, kwɛn bee ebee pfuũ e mbuul si ngɔmɔ̃ onse byɛ okal, ŋ’éketsal bee byɛ Nsia yi Ngesɛ yi Nziã. 10 Byam emwɛn, Nziã hɛ̃ omwɛn: Bee ekal onse byɛ b’akiool m’emfa ki ngesɛ, ye ki dzu ye ki eywɛn elyal. 11 Byɛ hɛ̃ eyɛɛ wɛn bee ekal ye ngɔmɔ̃-ngɔmɔ̃ onse byɛ onge b’ekal tal ye baan. 12 Bee ewi byɛ luo, ewi byɛ mpɛn, bvool etam byɛ wɛn, edzuu m’emfa ki edzii Nziã, ndɛ wu ata byɛ mbel k’okwɛn o ndɛ ye lweel e ndɛ. 13 Obɔ otsɛn bɛn, bee hɛ̃ ebveel Nziã ãtuɛɛn ãlio mbueel, me ndɔɔ yɛn ŋ’eyɔɔ byɛ Endɔɔ e Nziã li etee bee byɛ, byɛ k’eyɔɔ lɔ onge endɔɔ e baal wɛ, byɛ eyɔɔ lɔ m’emfa ki eli lɔ lam: Lɔ eli Endɔɔ e Nziã, lɔ ebesal onse byɛ b’akiool. 14 Andoo, byɛ eluɛɛn kuul ki ãbvɔɔn ã Nziã mã ke nsie yi Yude m’onse Yeso Mãsia: Byɛ emwɛn fool li etueel baal b’ɔ̃kiri a byam byɛ, emfa kiki hɛ̃ ãbvɔɔn ãmwɛn fool li etueel Ayuda mɔ̃. 15 Bɔ b’ábam Mfam Yeso y’aliaal-ɛ̃kiɛɛn a Nziã. Bɔ hɛ̃ b’atueel bee fool. Bɔ k’asa Nziã esɛ wɛ, bɔ ali ataal a baal bueel. 16 Bɔ abekii bee nkuul yi etee bɛn k’Ayuda wɛ, kwɛn bɔ abvuul. M’emfa okyɛ, bɔ akool ãbi ã bɔ kɛn okool. Kɛn a mpuru a Nziã esiɛɛn m’obva nkal a bɔ.

17 Andoo, me b’otal bee, bee ekab nzuru ye byɛ kɛn a me lio etsi-tsiri. Byɛ eli lala ye mviil ã bee, ke y’ɛ̃kwal ɛ̃ bee wɛ. Bee esi mpɛn yam bibi me ndɔɔ yi emwɛn byɛ bvool, ke ngwel wɛ bee eli y’efua okyɛ kyam. 18 Obɔ otsɛn bɛn, bee ekedzii k’eya ola byɛ, myam wu Pool nkie k’esa obobɔ nsa bibi, kɛn Ɔ̃pfu okii bee nkuul. 19 Obobɔ, kaã e bee m’anã? Esɛ e bee m’anã? Ekɔrɔ e bee ki lweel anã? Ke byɛ hɛ̃ ke nkwel a Mfam Yeso, ŋ’ekieel eya ndɛ wɛ? 20 Ngwanyã, byɛ eli lweel y’esɛ e bee.