1 Mɛ̃ wu Pool, ye Silibvɛ̃* bwɛn a Timote, ekel ebvɔɔn li Tesalonik li Nziã wu Taal ye Mfam Yeso Mãsia. Yɔɔl kwɛn nyiĩ ekal ye byɛ, yɔɔl kwɛn opi okal ye byɛ!

2 Ãlio mbueel, bee ebebveel Nziã ãtuɛɛn me ndɔɔ a byɛ bueel, bvool ebelɔ byɛ kɛn olɔ onse ãbuɛɛn ã bee. 3 Bee ebetsam me byɛ ke nkwel a Nziã wu Tal a bia-byɛ m'okiool o byɛ b'obesal, dzii e byɛ li ebesal, y'osɛ-mwiĩ o byɛ b'ofa onse kaã li kokɔ li ebeta byɛ me Mfam a bia-byɛ Yeso Mãsia. 4 Andoo, bee eyɛɛ wɛn Nziã odzii byɛ bvool ásueel byɛ k'ekal ba ndɛ. 5 Ke ngwel wɛ, Nsia yi Ngesɛ yi étee bee byɛ k'étɔ ola byɛ kɛn a m'ãyɛɛn ãtu wɛ, yɔ étɔ ola byɛ ye waan m'Ɔ̃fel wu Ɔ̃nsensal. Bee ebekiool bam wɛn Nsia yi Ngesɛ oyɔ eli yi taa-taa. Ngwanyã, byɛ eyɛɛ emfa ki ekal bee onse byɛ me ndɔɔ obvɛ o byɛ. 6 Me b'otal byɛ, byɛ eluɛɛn kuul e bee ye ki Mfam, ke ngwel wɛ byɛ eyɔɔ Endɔɔ onse ãmpal bibi, y'esɛ ki ewi Ɔ̃fel wu Ɔ̃nsensal. 7 Obobɔ, byɛ eyii baal bɛn akiool bueel ba Maseduaan ye b'Akayi anɔɔn a kuul e byɛ. 8 Ke ngwel wɛ, fa ola byɛ Endɔɔ e Mfam etsɔɔn, ke kɛn a ke Maseduaan y'Akayi wɛ, kɛn a nsia a okiool o byɛ me Nziã etsɔɔn hɛ̃ ãmboo mbueel. M'emfa okyɛ, bee bvool yi eyɛɛn oŋɔ̃ pyɛ. 9 Ke ngwel wɛ, bam abeyɛɛn me ndɔɔ emfa ki eyɔɔ byɛ bee ŋ'eyi bee ola byɛ, y'emfa ki éyiri byɛ anziã b'etiɔ m'oya ola Nziã, kwɛn byɛ esa ɔ̃sal a ndɛ, ndɛ wu Nziã wa mwiĩ bvool wa taa-taa. 10 Byɛ ebekiaal kwɛn Yeso wu Muaan a ndɛ, afa ywel aya. Ndɛ wu éseel Nziã onse b'ákwi-ákwi. Ndɛ àbvuul bia-byɛ me mpuru a Nziã yi èyeya.