1 Obobɔ, onge bɛn bee ale k'ebekoo k'ekiaal wɛ, bee ekuru k'ekal bee myam k'Atɛn. 2 Bee bu eyuɔɔl ndoo a bee Timote, wu abesa ɔ̃sal a Nziã ye bee onse otsal o Nsia yi Ngesɛ yi Mãsia, kwɛn ndɛ awɛɛl byɛ bvool awa byɛ mpɛn onse okiool o byɛ. 3 M'emfa okyɛ, mbuul si ngɔmɔ̃ k'aywɛn a mpɛn onse ãmpal mã nonɔ̃ wɛ. Ke ngwel wɛ, byam eyɛɛ wɛn ãmpal omɔ̃ ãli hɛ̃ onse ãndɔɔ m'éyɛɛl Nziã me ndɔɔ a bia-byɛ. 4 Ŋ'éli bee kɛn ola byɛ, bee élieel byɛ tsɔɔn wɛn bee ekieel emwɛn ãmpal, bee hɛ̃ emwɛn mɔ̃, byɛ eyɛɛ obobɔ. 5 Obɔ otsɛn bɛn, onge bɛn mɛ̃ ale k'ebekoo k'ekuru ɔ̃kwal bvool wɛ, mɛ̃ ngyuɔɔl Timote oyebii nsia yi okiool o byɛ, me ndɔɔ yi atal okɛɛn nga-ɔ̃mbio k'ambio byɛ wɛ, bvool okɛɛn ɔ̃sal a bee k'ali wa ngwel wɛ. 6 Kɛn a Timote ŋ'atɔ ola bee ŋ'efi ndɛ ola byɛ. Ndɛ owi bee nsia yi ngesɛ yi okiool o byɛ ye yi dzii e byɛ. Ndɛ olieel bee ndiri byɛ eli ãlio mbueel y'ãtsam mã ngesɛ m'ekwee me ndɔɔ a bee. Ndɛ bvool olieel bee ndiri byɛ edzii bam k'emwɛn bee bvool, bee hɛ̃ edzii bam obobɔ. 7 Andoo, m'emfa okyɛ, onse fool y'ãwua ã bee, bee ebɔɔ mpɛn me byɛ, me ndɔɔ okiool o byɛ. 8 Meba, bee emwɛn kwɛn bee kɛn eli mwiĩ, me ndɔɔ yɛn byɛ esɛn ãnã onse Mfam. 9 Emfa emã ki ebveel bee Nziã ãtuɛɛn me ndɔɔ a byɛ, m'esɛ kieel ki eli a bee me ndɔɔ a byɛ, ke nkwel a Nziã a bee? 10 Tsia ye mwiĩ, bee ebebuɛɛn ndɛ y'ɔ̃tɛɛ̃ ndyam, kwɛn ndɛ awa bee nkuul yi emwɛn byɛ, bvool kwɛn bee ekool ndɔɔ yi eywɛn m'okiool o byɛ. 11 Yɔɔl kwɛn Nziã wu Tal a bia-byɛ ndyam bwɛn a Mfam a bia-byɛ Yeso Mãsia afaal nkuul a bee tiil k'etɔ bee ola byɛ! 12 Yɔɔl Mfam asa kwɛn dzii e byɛ eyi nkwel bvool ekal lam li enduru ɔ̃ndel me ndɔɔ a byam-a-byam, bvool me ndɔɔ a baal bueel, m'emfa e dzii li eli a bee me byɛ! 13 Yɔɔl kwɛn ndɛ awa ɛ̃kwal ɛ̃ byɛ mpɛn, kwɛn byɛ eywɛn elyal onse onsensal ke nkwel a Nziã wu Tal a bia-byɛ, ŋ'ekieel eya Mfam Yeso ye ba ndɛ bueel ba ngel! Amɛn!