1 Byɛ b'amfam, ekal y'asal a byɛ m'emfa ki dzu bvool ki ekoo, eyɛɛ wɛn byɛ hɛ̃ eli ye Mfam ke ywel.

2 Ebuɛɛn owɔɔl wɛ, m'okal y'onkyab onse ãbuɛɛn y'obveel b'ãtuɛɛn. 3 Ebuɛɛn hɛ̃ me ndɔɔ a bee, kwɛn oŋɔ̃ Nziã adzweel bee nkuul yi eyetee Endɔɔ e ndɛ, yi etsal nsia a ndɔɔ a Mãsia yi m'edziɔɔn. Me ndɔɔ a ndɔɔ oyɔ, mɛ̃ ndi onse bwal. 4 Ebuɛɛn me ndɔɔ yɛn mɛ̃ ntee yɔ kal-a-kal m'emfa ki ekoo. 5 Ekal y'ãyal ye bɛn k'ali akiool wɛ. Lio lueel li ebɔɔ byɛ mpwee, esa obvɛ. 6 Yɔɔl kwɛn ãyɛɛn ã byɛ ãsuo nyiĩ bvool ãkal y'obvie ãlio mbueel, kwɛn byɛ ekoo k'eyɛɛ emfa ki ewa mbuul bwɛn a mbuul ɔ̃mveel.

7 Tiswik àwa byɛ ãnsia mbueel m'ola mɛ̃. Ndɛ oli ndoo a bee wa dzii, oli ɔ̃sal wu okuru nzuru me Nziã bvool oli ndoo a mɛ̃ wu ɔ̃sal onse bvoo a bia-byɛ ye Mfam. 8 Mɛ̃ eyuɔɔl byɛ ndɛ bvel-bvel kwɛn byɛ ebɔɔ ãnsia m'ola bee bvool kwɛn ndɛ awɛɛl ɛ̃kwal ɛ̃ byɛ. 9 Mɛ̃ eyuɔɔl ndɛ y'Onedzime wu okuru nzuru me Nziã bvool wu oli ndoo a dzii. Ndɛ oli ngɔmɔ̃ onse byɛ. Bɔ àliaal byɛ mbueel m'ãbebwel kwɛn.

10 Alisitaake, ndoo a mɛ̃ wa bwal, obio byɛ. Maak wu muaan-ngoo a Balanabas obio byɛ hɛ̃. Amaawa byɛ luo me ndɔɔ a ndɛ wu Maak, ŋɛn ndɛ oyi ola byɛ, eyɔɔ ndɛ ngesɛ. 11 Yeso wu ata me Dzisitus obio byɛ hɛ̃. Onse baal b'átsiil, b'abesal ye mɛ̃ me ndɔɔ Okwɛn o Nziã, eli kɛn a bɔ ange-atyel. Bɔ baal b'awi mɛ̃ mpɛn.

12 Epafalas wu oli ngɔmɔ̃ onse baal a byɛ, obio byɛ. Ɔ̃sal a Yeso Mãsia ondɛ abedzwaan kɛn odzwaan me ndɔɔ a byɛ onse ãbuɛɛn ã ndɛ, kwɛn oŋɔ̃ byɛ esɛn ãnã, ekal ɔ̃koo, bvool ekiool ɔ̃kwal ngɔmɔ̃ k'esa mbueel m'edzii Nziã. 13 Ke ngwel wɛ, me ndɔɔ a ndɛ wu Epafalas, mɛ̃ eyɛɛn byɛ wɛn, ndɛ abesal kokɔ me ndɔɔ a byɛ, me ndɔɔ a baal ba bviil li Lahodise bvool me ndɔɔ a baal ba bviil li Hielapolis. 14 Luk wu ndoo a bia-byɛ wa dzii wu ɔ̃boo, ye Demas abio byɛ. 15 Ebio andoo b'ali ke bviil li Lahodise. Ebio Nɛmfa hɛ̃, y'ebvɔɔn li eli onse nzɔ a ndɛ. 16 Ŋ'eman byɛ ɔ̃nkaan wu otsiɔ ola byɛ, esa kwɛn atsiɔ ndɛ hɛ̃ k'ebvɔɔn li Lahodise. Byɛ hɛ̃ etsiɔ wu àfa Lahodise. 17 Eliaal Aaswipe ndiri: «Kal y'onkyab m'ɔ̃sal wu éwi Mfam yɛ, me ndɔɔ yi asa ndɛ ngesɛ.»

18 Mɛ̃ wu Pool, mɛ̃ mbio byɛ, myam mbuul wu nswɛn byɛ ɔ̃nkaan wu me kuɔɔl e myam. Ebee odzɛɛn wɛn me ndi onse bwal. Yɔɔl kwɛn Nziã asio byɛ nyiĩ!