1 Mɛ̃ wu Pool, mɛ̃ ndi ntam a Yeso Mãsia, m'emfa ki edzii Nziã. Mɛ̃ ye ndoo wu Timote, 2 eswɛn ɔ̃nkaan wu ol'andoo b'ali ke Kolose, b'ali ba ngel bvool b'akuru nzuru me Nziã onse bvoo a bia-byɛ ye Mãsia: Yɔɔl kwɛn Nziã wu Tal a bia-byɛ asio byɛ nyiĩ, awa byɛ opi!

3 Bee ebebveel Nziã wu Tal a Mfam a bia-byɛ Yeso Mãsia ãtuɛɛn, ŋ'ebebuɛɛn bee me ndɔɔ a byɛ lio lueel. 4 Ke ngwel wɛ, bee eyoo k'ayɛɛn m'okiool o byɛ me Mfam Yeso Mãsia, bvool me dzii li eli a byɛ me ndɔɔ a ba ngel bueel, 5 me ndɔɔ yɛn byɛ eli ye kaã me ki ákwee byɛ ke ywel. Kaã olɔ li ébɔɔ byɛ, ŋ'éyoo byɛ Endɔɔ li otaa-taa, Nsia yi Ngesɛ. 6 Nsia oyɔ ebeburu nsia bvool ebetsɔɔn m'ɔ̃kiri wueel. M'emfa okyɛ yɔ emeetɔ ola byɛ, fa lio li éyoo byɛ yɔ bvool éyɛɛ nyiĩ a Nziã onse otaa-taa bueel. 7 Epafalas wu ndoo a bia-byɛ wa dzii bvool wu abesal ye bee, wu áyiool byɛ Nsia oyɔ. Ndɛ oli ɔ̃sal a Mãsia bvool abesal m'emfa ki dzu me ndɔɔ a byɛ. 8 Ndɛ owi bee nsia a dzii li ewi Ɔ̃fel wu Ɔ̃nsensal byɛ.

9 Obɔ otsɛn bɛn, bɛɛn tsoo li eyoo bee nsia oyɔ, bee k'ebeyɔɔl k'ebuɛɛn Nziã me ndɔɔ a byɛ wɛ. Bee ebesɔɔ ola ndɛ kwɛn ndɛ asa kwɛn byɛ eyɛɛ mbueel m'edzii ndɛ, ŋ'ewa ndɛ byɛ ontwel bueel y'ãyal m'ɔ̃koo me nkuul a Ɔ̃fel. 10 Obobɔ, byɛ edzuu m'emfa ki edzii Mfam, bvool esa mbueel m'ãwa ndɛ esɛ. M'emfa okyɛ, byɛ èburu nsia yi mvɛ yi eli ɛ̃sal mi ngesɛ mi emfa bwɛn emfa bvool byɛ èkwel onse oyɛɛ o Nziã. 11 Nziã àwɛɛl byɛ m'ãndɔɔ mbueel me mpɛn a lweel e ndɛ, me ndɔɔ yɛn byɛ ekoo k'ekal y'osɛ-mwiĩ y'okuru b'ɔ̃kwal onse ãndɔɔ mbueel. 12 Y'esɛ kieel, ebveel ãtuɛɛn ola Taal, wu ásuul kwɛn byɛ ekoo k'ebɔɔ boo li ɔ̃swal wu ékwee ndɛ ba ngel onse mwiĩ. 13 Ndɛ opaal bia-byɛ onse okwɛn b'empeel, me ndɔɔ yi abiri bia-byɛ onse okwɛn o Muaan a ndɛ wa dzii. 14 Me nkuul a ndɛ, bia-byɛ ebɔɔ obvuul bvool ebɔɔ odzeel b'ãbi.

15 Mãsia oli m'emfa ki eli Nziã wɛn k'abemwɛn wɛ. Ndɛ oli Muaan wu ɛ̃kwel, wa ke ywel a bvieel bvi ési Nziã. 16 Ke ngwel wɛ, me nkuul a ndɛ ábuo bvieel bvi eli ke ywel ye bvi me nsie, bvi abemwɛn ye bvɛn k'abemwɛn wɛ, ekal akwɛn, ekal amfam, ekal waan, ekal mpɛn. Eluɔ bvieel ábuo bvɛ me nkuul a ndɛ bvool me ndɔɔ a ndɛ. 17 Ndɛ, ndɛ oli ke nkwel a bvieel, bvool me nkuul a ndɛ bvam bvieel etɛɛn k'ãmboo ã bvɛ. 18 Ndɛ, ndɛ oli ɔ̃tswɛ a nzuru a ndɛ. Nzuru oyɔ eli Ebvɔɔn. Ndɛ oli obɛɛn bvool oli mbuul wu ɛ̃kwel wu ásiool onse b'ákwi-ákwi, kwɛn ndɛ akal wu ɛ̃kwel onse ãndɔɔ mbueel. 19 Ke ngwel wɛ, Nziã omwɛn ngesɛ k'asa kwɛn onziã bam bueel okal onse ndɛ, 20 bvool kwɛn me nkuul a ndɛ, ndɛ abveel ondoo y'eluɔ bvieel ye ndyam, ekal bvi me nsie, ekal hɛ̃ bvi ke ywel, me ndɔɔ yi alɔ opi me nkuul a ndɛ, m'ãkel m'enkulusu e ndɛ. 21 Byɛ hɛ̃ tsɔɔn éli lala ye Nziã bvool éli ataal a ndɛ, me ndɔɔ ãtsam ã byɛ m'ãbi ãbi y'ɛ̃sal ɛ̃ byɛ mi ɛ̃bi-ɛ̃bi. 22 Meba ŋã, ndɛ obveel ondoo ye byɛ m'epfu e Muaan a ndɛ onse nzuru y'ombuul, me ndɔɔ yɛn byɛ eyetɛɛn ke nkwel a ndɛ onge baal ba ngel, b'aywɛn elyal bvool bɛn mbyel pyɛ. 23 Kɛn ebvaan kwɛn byɛ esɛn ãnã bvool etɛɛn ye mpɛn onse okiool. Ebee nkuul owa yi abiri byɛ lala ye kaã li ébɔɔ byɛ ŋ'éyoo byɛ Nsia yi Ngesɛ. Nsia oyɔ, átee yɔ ola baal bueel b'ɔ̃kiri a nsie, Nsia yɛn mɛ̃ wu Pool éyii ɔ̃sal a yɔ.

24 Meba ŋã, mɛ̃ esia mpaa m'ãmpal m'emwɛn mɛ̃ me ndɔɔ a byɛ. Onse nzuru a mɛ̃, mɛ̃ embɛɛl ki eywɛn onse ãmpal ã Mãsia me ndɔɔ a nzuru a ndɛ. Nzuru oyɔ eli Ebvɔɔn. 25 Mɛ̃ ndyam éyii ɔ̃sal Ebvɔɔn olɔ me pfuũ li éwi Nziã mɛ̃ me ndɔɔ yi etee byɛ Endɔɔ e ndɛ m'emfa ki ɔ̃koo. 26 Ndɔɔ oyɔ yi éli m'edziɔɔn ol'ãyam mbueel m'ãlio mbueel m'ã́bwel. Kɛn a meba, ndɛ oyɛɛl yɔ ola baal a ndɛ ba ngel. 27 Ke ngwel wɛ, Nziã ádzii k'asa kwɛn bɔ ayɛɛ opfel o lweel e ndɔɔ yi éli m'edziɔɔn me ndɔɔ a baal bɛn k'Ayuda wɛ. Ndɔɔ oyɔ, yɔ bu: Mãsia onse byɛ, eli kaã lɛn byɛ ekal onse lweel. 28 Ndɛ wu Mãsia, wu ebetee bee, ewa ãnkunkwa bvool etee mbuul wueel y'ãyal mbueel, me ndɔɔ yi ebiri mbuul wueel k'akal ɔ̃koo onse Mãsia. 29 Obɔ otsɛn b'ebesal mɛ̃ bvool ebedzwaan me mpɛn a ndɛ yi ebesal ye waan lueel onse mɛ̃.