1 Mɛ̃ nzii kwɛn byɛ eyɛɛ wɛn mɛ̃ ebedzwaan mvel yi kokɔ me ndɔɔ a byɛ, me ndɔɔ andoo ba bviil li Lahodise ye bam bueel bɛn lɔɔ-okal kɛn a mwɛn mɛ̃ wɛ. 2 Mɛ̃ ebedzwaan m'emfa okyɛ, kwɛn oŋɔ̃ ɛ̃kwal ɛ̃ bɔ ɛ̃luul me mpɛn, bvool kwɛn bɔ akal onse bvoo onse dzii, bvool kwɛn bɔ aluul bam m'opfel b'ãyal. M'emfa okyɛ, bɔ ol'akoo k'ayɛɛ ndɔɔ a Nziã yi m'edziɔɔn. Ndɔɔ oyɔ, eli Mãsia. 3 Onse ndɛ, ákwee opfel bueel b'ãyal ye b'oyɛɛ. 4 Mɛ̃ ngyɛɛn obobɔ, kwɛn mbuul si ngɔmɔ̃ abee byɛ opfuru m'ãyɛɛn m'opɛɛn. 5 Onkyam ŋɛn me nzuru mɛ̃ ke ndi mboo mɔ̃ ye byɛ wɛ, kɛn a m'ɔ̃fel mɛ̃ ndi ye byɛ, bvool mɛ̃ ndi y'esɛ ki emwɛn byɛ etɛɛn ye mpɛn onse okiool o byɛ me Mãsia.

6 Obobɔ, onge bɛn byɛ eyɔɔ Mfam Yeso Mãsia, edzuu onse bvoo ye ndɛ. 7 Yɔɔl kwɛn byɛ elɔ ɛ̃dza bvool etuu elaã e byɛ nkal a ndɛ, ewam onse okiool m'emfa ki átee byɛ, bvool eluul me tuɛɛn. 8 Ekal y'onkyab kwɛn mbuul si ngɔmɔ̃ abee byɛ tuo e ndɛ okaal m'ãyal m'ombuul m'ãngwel-a-ngwel bvool mã pfuru, m'ãfa onse onkɔɔ o baal bvool onse ãndɔɔ m'ãbebiri ɔ̃kiri wu. Ãyal omɔ̃ k'ãfa ola Mãsia wɛ. 9 Ke ngwel wɛ, onziã bam bueel obekal onse ndɛ bvool oluul nzuru a ndɛ. 10 Onse ndɛ, byɛ hɛ̃ eli ye bvieel m'emfa ki ɔ̃koo. Ndɛ wu oli mfam a okwɛn bueel bvool wa waan lueel.

11 Onse Mãsia, átsiil byɛ. Otsiil obɔ, ke bo me mviɔɔl ɛ̃ baal wɛ, bɔ ofi ola ndɛ. M'otsiil obɔ, ŋ'apaal byɛ onse ombuul b'ãbi. 12 Ke ngwel wɛ, ádziool byɛ ye ndɛ me nkuul a opongo, bvool byɛ ésiool ye ndɛ m'okiool onse waan e Nziã li éseel ndɛ onse b'ákwi-ákwi. 13 Byɛ bɛn tsɔɔn éli baal b'ákwi me ndɔɔ elyal e byɛ, bvool bɛn k'átsiil wɛ. Kɛn a Nziã áseel byɛ ye Mãsia, ŋ'émbaal ndɛ elyal e byɛ bvieel. 14 Ndɛ ádzeel ɔ̃nkaan wu ákefɛn bia-byɛ, wɛn m'áswɛn onse ndɛ k'ã́ketsweel bia-byɛ wɛ. Ndɛ ámbaal ɔ̃nkaan ondɛ ŋ'ébɛɛl ndɛ ndɛ m'enkulusu. 15 M'emfa okyɛ, Nziã ámbaal mpɛn a ɛ̃fel mi y'okwɛn ye mi ye waan. Ndɛ ásuo myɛ̃ ke nkwel a baal bueel, bvool ákedzuru myɛ̃ onge baal a bwal b'ásiin ke mvel ŋ'ébvel Muaan a ndɛ bɔ m'enkulusu.

16 Obɔ otsɛn bɛn, yɔɔl kwɛn mbuul abee byɛ me mbyel obam me b'otal bvi-odza wuo me b'otal ki onywã, wuo me b'otal pfuun ke lɛn, me b'otal nswii wu ɔ̃nyiɔɔn wuo me b'otal ãtsoo ã saba. 17 Ãndɔɔ omɔ̃ mbueel ã́li kɛn edzel-a-dzel b'obvɛ b'okeya, otaa-taa o mɔ̃ omɔɔn onse Mãsia. 18 Yɔɔl kwɛn baal b'asa empa ki akal y'okuaal o nzuru, b'abebuɛɛn ãnzwel bvool abelɔ dzuun onse emwɛn e bɔ, abee byɛ me mbyel obam. Bɔ ali y'ondɛɛl o nzuru bo ngwel-a-ngwel m'ãtsam ã bɔ m'ombuul. 19 Bɔ k'abekuru nzuru me Mãsia wu oli ɔ̃tswɛ wɛ. Kwɛn ŋɛn ɔ̃tswɛ, wu abesa kwɛn nzuru ekwel m'emfa ki edzii Nziã bvool ebvɔɔn mboo mɔ̃ m'atel ye tuo.

20 Byɛ ékwi ye Mãsia, m'emfa okyɛ byɛ émeembal ke nsɛn ãndɔɔ m'ãbebiri ɔ̃kiri wu. Oŋɔ̃ otsɛn omã bvool b'ekal byɛ onge bɛn elaã e byɛ kɛn ekuru nzuru m'ɔ̃kiri wu, ŋ'ekiool byɛ k'elweel ãngel mã: 21 «Oyɛɛ ke wal! Oyɛɛ ke mbio! Oyɛɛ ke kwaal!» 22 Ãngel omɔ̃ mbueel ãtal eluɔ bvi ebebii ke mbee a ŋ'amasa ɔ̃sal me bvɛ. Omɔ̃ eli kɛn ãngel y'ãtee m'ombuul. 23 Ke yam ãngel omɔ̃ ãli k'emfa onge m'ãwa ãyal. Ke ngwel wɛ, mɔ̃ ãtam kwɛn mbuul abuɛɛn m'emfa ki edzii ndyam, akal y'okuaal o nzuru b'opfuru-opfuru bvool atuaal nzuru mpal. Kɛn ãngel omɔ̃ k'ãli y'otsɛn wɛ, mɔ̃ ãtam kɛn k'asa ãndɔɔ m'edzii efua bvi ombuul.