1 M’osɛɛl, andoo, ebuɛɛn me ndɔɔ a bee, kwɛn Endɔɔ e Mfam etsɔɔn tswa-tswa bvool ekal ye dzuun onge b’eli lɔ ye dzuun ola byɛ. 2 Ebuɛɛn Nziã hɛ̃ kwɛn ndɛ abvuul bee me baal b’abi bvool bɛn otsɛn pyɛ. Ke ngwel wɛ, bueel k’ali y’okiool wɛ. 3 Kɛn a Mfam oli wɛn ebvaan bia-byɛ eta kaã me ndɛ: Ndɛ akieel awa byɛ mpɛn bvool akwɛɛ byɛ lala ye Wu ɔ̃bi. 4 Bee eli ye kaã me Mfam me ndɔɔ a byɛ wɛn, byɛ ebesa bvool ekieel esa m’etam bee byɛ osa. 5 Yɔɔl kwɛn Mfam asa kwɛn ɛ̃kwal ɛ̃ byɛ ɛ̃dzii Nziã bvool ɛ̃kal y’osɛ-mwiĩ o Mãsia.

6 Andoo, me nkuũ a Mfam a bia-byɛ Yeso Mãsia, bee etam byɛ k’ekal lala ye ndoo wueel wu akal epwa-epwa, bvool k’anɔɔn ãtee m’etee bee byɛ wɛ. 7 Byam eyɛɛ emfa ki eluɛɛn byɛ kuul e bee, ke ngwel wɛ bee k’edzuu epwa-epwa onse byɛ wɛ. 8 Bee k’edzi mampa a mbuul ngwel wɛ. Kɛn a tsia mwiĩ bee esi ɔ̃sal wa fool bvool wu efi ɔ̃furu, kwɛn bee ebee okal mpɛn me mbuul si ngɔmɔ̃ onse byɛ. 9 Bee ŋ’esi obobɔ, ke me ndɔɔ yɛn byɛ ale k’ekoo m’owuaal a bee wɛ, me ndɔɔ yɛn bee edzii k’esuo byɛ kuul li enɔɔn a byɛ. 10 Ke ngwel wɛ, ŋ’éli bee ola byɛ, bee éwi byɛ ngel yi: «Okɛɛn mbuul k’adzii k’asal wɛ, ndɛ hɛ̃ abee odza!» 11 Kɛn a bee eyoo wɛn onse byɛ, eli y’anga-obwal bɛn ki asa pyɛ, kɛn a bɔ ɔ̃sal wu abesam anga-ãndɔɔ. 12 Me baal ba m’emfa okyɛ, bee ewi bɔ luo, bvool etam bɔ me nkuũ a Mfam Yeso Mãsia k’asa bubu: Asal onse opi, kwɛn bɔ abɔɔ ki-adza ki efi m’ɔ̃sal a bam. 13 Me b’otal byɛ, andoo, ebee owɔɔl m’osa b’obvɛ. 14 Okɛɛn mbuul k’alweel m’eyɛɛn bee onse ɔ̃nkaan wu wɛ, etal ndɔɔ oyɔ ngesɛ. Ebee y’ondoo ye ndɛ obekal, kwɛn ndɛ akwa opfuru. 15 Kɛn ebee ndɛ owal onge ɔ̃taal, edzuru ndɛ ãtswi onge b’abedzuru mã ndoo.

16 Yɔɔl kwɛn Mfam nga-opi ndyam awa byɛ opi lio lueel bvool m’emfa kieel! Yɔɔl Mfam akal ye byɛ bueel! 17 Obio ba, bo me kuɔɔl e myam wu Pool. Eli eliĩ ki ebelɔ mɛ̃ m’ɛ̃nkaan mvieel, oyɔ hɛ̃ nke-nkel a mɛ̃. 18 Yɔɔl kwɛn Mfam a bia-byɛ Yeso Mãsia asio byɛ bueel nyiĩ!