1 Mɛ̃ wu ɔ̃kuul, mɛ̃ nswɛn yɛ wu Ngayihus, ndoo a dzii, wu nzii mɛ̃ ndyam onse otaa-taa. 2 Ndoo a dzii, mɛ̃ nzii kwɛn ãndɔɔ mbueel ãkal ngesɛ me ndɔɔ a yɛ bvool kwɛn yɛ kal nzuru kɛɛ-kɛɛ onge b’eli ɔ̃fel a yɛ kɛɛ-kɛɛ.

3 Mɛ̃ eli y’esɛ bibi ŋ’eyi andoo, bu alieel me ndɔɔ otaa-taa b’oli onse yɛ, bvool m’emfa ki ebedzuu yɛ onse otaa-taa. 4 Esɛ e mɛ̃ ki enduru eli ŋ’eyoo mɛ̃ ndiri baan a mɛ̃ abedzuu onse otaa-taa. 5 Ndoo a mɛ̃ wa dzii, yɛ abesa ãndɔɔ m’emfa ki okiool me ndɔɔ andoo, onkyam me ndɔɔ anzii. 6 Bɔ ayɛɛn me ndɔɔ a dzii e yɛ ke nkwel Ebvɔɔn. Ol’ekal ngesɛ, okɛɛn yɛ buun bɔ bvi eli a bɔ ye kɔɔ me ndɔɔ odzuu o bɔ, m’emfa ki edzii e Nziã. 7 Ke ngwel wɛ, otsɛn b’eyɛn bɔ dzwɛ, me ndɔɔ a nkuũ a Mãsia, ki abɔɔ ola baal bɛn k’ayɛɛ Nziã wɛ pyɛ. 8 Obobɔ, bia-byɛ bam ebvaan eyɔɔ baal ba bubu, me ndɔɔ yi esal ye bɔ me ndɔɔ otaa-taa.

9 Mɛ̃ nswɛn Ebvɔɔn muaan-ɔ̃nkaan, kɛn a Diotilef, wu odzii k’akal mfam onse bakyɛ, k’ayɔɔ bee wɛ. 10 Obɔ otsɛn bɛn, ŋ’èya mɛ̃, mɛ̃ èyɛɛn obi b’ebesa ndɛ, ndɛ wu abeyɛɛn ãyɛɛn m’ãbi-ãbi me bee. K’asɛn kɛn oŋɔ̃ wɛ, ndɛ obee hɛ̃ k’ayɔɔ andoo b’abwel, bvool bakyɛ b’adzii k’ayɔɔ bɔ, ndɛ okii bɔ bvool otswɛɛl bɔ onse Ebvɔɔn. 11 Ndoo a dzii, bee obi onɔɔn, nɔɔn kɛn obvɛ. Mbuul wu asa obvɛ oli wa Nziã, wu asa obi k’ayɛɛ Nziã wɛ.

12 Me b’otal Demetiliyus, baal bueel y’otaa-taa bam abeyɛɛn obvɛ me ndɔɔ a ndɛ. Bee hɛ̃ eyɛɛn me ndɔɔ a ndɛ, b’eyɛɛn bee oli taa-taa.

13 Mɛ̃ ndi y’ãndɔɔ bibi m’ekeeswɛn yɛ, kɛn a mɛ̃ ke nzii k’eswɛn yɛ mɔ̃ m’oswɛn wɛ. 14 Mɛ̃ ndi ye kaã wɛn mɛ̃ èmwɛn yɛ alili ŋã, obobɔ bia-yɛ èta ɔ̃sam nsɔɔ̃-a-nsɔɔ̃. 15 Yɔɔl kwɛn opi okal ye yɛ! Andoo b’ali kwɛn abio yɛ. Bio andoo b’ali okɔ m’ɔ̃mɔ̃-ɔ̃mɔ̃.