1 Mɛ̃ wu mbuul a bwal me ndɔɔ a Mfam, mɛ̃ eluɔɔn byɛ bam k'edzuu m'emfa ki ebvaan me mbel yi áti byɛ. 2 Ekal y'okuaal o nzuru, ekal y'efyɛ, ekal hɛ̃ y'osɛ-mwiĩ. Onse dzii, ekuru ɛ̃kwal onse byam-a-byam. 3 Esa mpɛn me ndɔɔ yi ekal kɛn okal onse bvoo wu ewa Ɔ̃fel me nkuul yi opi b'obvool byɛ bɛn ye bɛn. 4 Nzuru eli kɛn a ngamɔ̃, Ɔ̃fel hɛ̃ oli kɛn a ngɔmɔ̃, emfa kiki hɛ̃ eli kɛn a ye kaã ngemɔ̃ li áti byɛ mbel ke lɔ.

5 Mfam oli kɛn a ngɔmɔ̃, okiool oli kɛn a ngɔmɔ̃, opongo hɛ̃ oli kɛn a ngɔmɔ̃.

6 Nziã wu Tal a baal bam bueel oli kɛn a ngɔmɔ̃,

ndɛ oli ke ywel a baal bueel, abesal me baal bueel bvool oli onse baal bueel.

7 Kɛn a ngɔmɔ̃ ngɔmɔ̃ onse bia-byɛ áyɔɔ nyiĩ a Nziã, m'emvɛɛl e kab li ewa Mãsia.

8 Obɔ otsɛn bɛn, ayɛɛn onse Ɔ̃nkaan ndiri:

«Ŋ'éwueel ndɛ ywel,

ndɛ ábiri b'áli me bwal;

ndɛ áwi baal ãkab✝.»

9 K'oyɛɛn ba: «Ndɛ áwueel ywel», ŋ'ayɛɛn ndiri emã? Bɔ ŋ'oyɛɛn ndiri ye k'ewuaal ndɛ, ndɛ kɛn ásool bam ke nsɛn a nsie. 10 Mbuul wu ásool, kɛn a ndɛ wu-wu wu áwueel bam ánduru ywel lam lueel, me ndɔɔ yi aluul eluɔ bvieel. 11 Ndyam mbuul wu áwi ekab ola baal bɛn k'akal antam, ola bɛn k'akal aliaal-ɛ̃kiɛɛn a Nziã, ola bɛn k'akal aliaal a Nsia yi Ngesɛ, ola bɛn k'akal ambiri a baal, bvool ola bɛn k'akal ayiool. 12 Ndɛ ási obobɔ, me ndɔɔ yi afaal baal ba ngel k'akoo k'asa ɔ̃sal a bɔ, me ndɔɔ otuu o nzuru a Mãsia, 13 tiil ye k'etɔ bia-byɛ bam bueel ke bvoo wu okiool, y'oyɛɛ o Muaan a Nziã ngesɛ-ngesɛ, y'okal o baal b'amaayal, m'emfa ki ɔ̃koo ki ɔ̃tyal a Mãsia. 14 Obobɔ, bia-byɛ bvool k'ebekal ebe-baan bvi ebwee wɛ, bvɛn epɔɔ efa a bɔ ngwel ebwel a bɔ ngwel, bvɛn amfel bueel b'ãtee abiri, aywɔɔn a bɔ, bvool bɛn baal b'apfuru bakyɛ m'ãyal m'ãbi adzeel. 15 Kɛn a m'oyɛɛn b'otaa-taa, onse dzii, bia-byɛ èkwel m'ãndɔɔ mbueel tiil ola ndɛ wu oli ɔ̃tswɛ, ndɛ wu Mãsia. 16 Me ndɛ, elyam e nzuru bvieel eli mboo mɔ̃ bvool ebvɔɔn. Ãmboo m'ebvɔɔn elyam bibi, esa kwɛn nzuru ebvɔɔn mboo mɔ̃, bvool ŋɛn elyam bwɛn elyam esi ɔ̃sal a kyɛ, nzuru yam yueel ekwel bvool ewam yam a yam onse dzii.

17 Obobɔ, etal be nzii mɛ̃ byɛ oliaal, bvool mɛ̃ eyɛɛn yɔ ekwal onse Mfam bubu: Ebee okal onge baal bɛn k'ayɛɛ Nziã wɛ, b'abenɔɔn ãtsam ã bɔ mã ngwel-a-ngwel. 18 Ke ngwel wɛ, ãtsam ã bɔ ãli onse empeel, bvool bɔ ali lala y'elaã e Nziã, m'odzɛɛn b'oli onse bɔ, m'ɔ̃kwal mpɛn a bɔ. 19 Bɔ k'abeyɛɛ wɛn ba obi, ba obvɛ wɛ. Bɔ ámaawa ãnzuru ã bɔ k'asa ãndɔɔ m'esio, kwɛn ye pfuul o nzi bueel, bɔ asa ãndɔɔ mã mbiin m'emfa bwɛn emfa. 20 Kɛn a byɛ, byɛ Mãsia ke m'emfa okyɛ éyio wɛ. 21 Ke ngwel wɛ, byɛ éyoo ɔ̃sam wu emfa ki eli ndɛ. Onse ndɛ, áyiool byɛ hɛ̃ m'emfa ki otaa-taa b'onse ndɛ wu Yeso. 22 Obobɔ, ebee epfuũ e byɛ bvi tsɔɔn, eyɔɔl ombuul o byɛ bo tsɔɔn. Ke ngwel wɛ, efua e bɔ bvi pfuru ebebiri byɛ k'obii. 23 Eyɔɔl Ɔ̃fel asuul ãyal ã byɛ ãkal m'ãnyiɔɔn. 24 Elaal mbuul wu ɔ̃nyiɔɔn, wu ábuo m'emfa e Nziã, onse okal dzu, y'onsensal b'ofa onse otaa-taa.

25 Obobɔ, eyɔɔl mfya. Mbuul bwɛn a mbuul aliaal ngaburu-mbuul otaa-taa, ke ngwel wɛ bia-byɛ bueel eli elyam e nzuru ngamɔ̃. 26 Ŋɛn byɛ eyi mpuru, èbee obi osa, mpuru a byɛ efa ye k'edziin tal. 27 Ebee ɔ̃pfu mpwee owa. 28 Yɔɔl kwɛn mbuul wu aketuru pfuul abee obeturu. Kɛn a ndɛ ebvaan asa mpɛn yi asa ɔ̃sal wa ngesɛ me mviɔɔl ɛ̃ ndyam, kwɛn ndɛ abɔɔ ki awa mbuul wu okaan. 29 Yɔɔl kwɛn ndɔɔ si ngamɔ̃ yi mbi-mbi ebee m'ɔ̃nywã a byɛ opal. Eyɛɛn kɛn a ãndɔɔ m'ãbvɛ-ãbvɛ m'ãwuaal a bakyɛ m'emfa ki ãkɔɔ ã bɔ, bvool m'ãsa obvɛ ola baal b'ayoo mɔ̃. 30 Ebee Ɔ̃fel a Nziã wu Ɔ̃nsensal ãwua owa, wɛn me ndɛ ási byɛ eliĩ, me ndɔɔ a tsoo li obvuul. 31 Eyɔɔl kwɛn ɔ̃lyɛn, mpuru, oya o mpuru, ota b'ɛ̃pal, ɛ̃tswɛ, y'ãndɔɔ mbueel m'ãbi, ãmbal onse byɛ. 32 Ekal baal ba ngɛsɛ bɛn ola bɛn, ekal ye nyiĩ a bakyɛ. Edzeel byam-a-byam, onge b'édzeel Nziã byɛ onse Mãsia.