1 Mɛ̃ wu Pool, mɛ̃ ndi mbuul a bwal a Yeso-Mãsia me ndɔɔ a byɛ bɛn k'Ayuda wɛ. 2 Byɛ oŋɔ̃ emeeyoo kwɛn Nziã, onse nyiĩ a ndɛ, áwi mɛ̃ ɔ̃sal wu me ndɔɔ a byɛ. 3 Ndɛ áyɛɛl mɛ̃ ɔ̃yɛɛl wu áli m'edziɔɔn ondɛ, onge be nkel mɛ̃ byɛ tsɔɔn etsi-tsiri. 4 Ŋ'ètsiɔ byɛ ãndɔɔ me nkel mɛ̃, byɛ ekoo k'etaal ãyal me ndi a mɛ̃ me ndɔɔ ɔ̃yɛɛl wa m'edziɔɔn wu otal Mãsia. 5 Ɔ̃yɛɛl wa m'edziɔɔn ondɛ, m'ãlio m'ãbwel tsɔɔn, Nziã k'ásuo ndɛ ola baal wɛ, m'emfa ki esuo ndɛ ndɛ meba m'Ɔ̃fel ol'antam y'aliaal-ɛ̃kiɛɛn a ndɛ ba ngel. 6 Ɔ̃yɛɛl ondɛ oli bubu: Baal bɛn k'Ayuda wɛ y'Ayuda abɔɔ ɔ̃swal wuwu wu ékwee Nziã baal a ndɛ, ayii nzuru ngamɔ̃ ye bɔ, abvɔɔn onse ndɔɔ yiyi yi élieel Nziã ndiri àsa onse Yeso-Mãsia, me nkuul a Nsia yi Ngesɛ. 7 Mɛ̃ ngyii ɔ̃sal wu etee Nsia yi Ngesɛ oyɔ, me kab li ewi Nziã mɛ̃ onse nyiĩ a ndɛ, me waan e ndɛ li ebesal onse mɛ̃. 8 Mɛ̃ wu mvool mbee onse baal a Nziã bueel ba ngel, Nziã osio mɛ̃ nyiĩ oyɔ, kwɛn mɛ̃ ntee baal bɛn k'Ayuda wɛ opfel o Mãsia b'oywɛn ɔ̃ndel. 9 Nziã hɛ̃ osio mɛ̃ nyiĩ, kwɛn mɛ̃ nsuo baal bueel kal-a-kal emfa ki ekoo ɔ̃yɛɛl wu áli m'edziɔɔn ãlio mbueel onse Nziã, ndɛ wu ábuo eluɔ bvieel. 10 M'emfa okyɛ, ãkwɛn y'ãwaan mã ke ywel meba ãyɛɛ ãyal ã Nziã, me nkuul a Ebvɔɔn. Ãyal omɔ̃, Nziã abesuo mɔ̃ m'emfa bwɛn a emfa, 11 m'emfa ki ɔ̃yɛɛl wu ɔ̃bu nkal ɔ̃bu wu ésuul ndɛ ákoo onse Yeso-Mãsia wu Mfam a bia-byɛ. 12 Onse ndɛ, m'okiool me ndɛ, bia-byɛ eyii ndii me ndɔɔ yi esyal tsotsoo a Nziã ye kaã lueel. 13 Obɔ otsɛn bɛn, mɛ̃ eluɔɔn byɛ wɛn ebee owɔɔl me ndɔɔ ãmpal m'emwɛn mɛ̃ me ndɔɔ a byɛ, ke ngwel wɛ mɔ̃ ãli lweel e byɛ.

14 Obɔ otsɛn bɛn, mɛ̃ ebebva ãbuo ke nkwel a Taal, 15 ndɛ wɛn ãyam mbueel ke ywel ye nsie ãbɔɔ nkuũ a ndɛ. 16 Mɛ̃ ebebuɛɛn kwɛn, m'opfel b'onduru okuun bo lweel e ndɛ, ndɛ awa byɛ mpɛn ye waan m'Ɔ̃fel a ndɛ, kwɛn byɛ ewam onse ɛ̃kwal ɛ̃ byɛ. 17 Yɔɔl kwɛn Mãsia akal onse ɛ̃kwal ɛ̃ byɛ me nkuul a okiool! Bvool yɔɔl kwɛn byɛ elɔ ɛ̃dza bvool etuu elaã e byɛ onse dzii. 18 M'emfa okyɛ, byɛ ol'ebɔɔ mpɛn, ye baal a ngel bueel, yi ekwaal otsɛn b'ola, y'ɔ̃tyal, ye dzio, y'ɔ̃tɔɔl a dzii e Mãsia, 19 kwɛn byɛ eyɛɛ dzii olɔ li enduru ãndɔɔ mɛn mbuul okoo k'ayɛɛ, m'emfa okyɛ byɛ eluul m'ɔ̃tsiin a Nziã.

20 Ola Nziã wɛn, me waan e ndɛ li esal onse bia-byɛ, okoo k'asa bam m'onduru o mam mbueel m'esɔɔ wuo m'etsam bia-byɛ, 21 yɔɔl kwɛn lweel ekal ye ndɛ onse Ebvɔɔn bvool onse Yeso-Mãsia, ãlio mbueel, ɔ̃bu nkal ɔ̃bu. Amɛn!