1 Ke mbee a mvel kuun ye nã, mɛ̃ mvool Yelusalem ye Balanabas, mɛ̃ hɛ̃ mbiri Tite. 2 Mɛ̃ mvool okɔ, me ndɔɔ yɛn Nziã áyɛɛl mɛ̃ ndɔɔ. Mɛ̃ nsuo bɔ Nsia yi Ngesɛ yi ebetee mɛ̃ ola baal bɛn k’Ayuda wɛ, mɛ̃ hɛ̃ nsuo yɔ me pyɛ ola baal b’anduru bvɛɛ. Mɛ̃ nsi obobɔ, me ndɔɔ yɛn ɔ̃sal wu emeesa mɛ̃ ye wu ebesa mɛ̃ abee wa ngwel okal. 3 Obɔ otsɛn bɛn, Tite wu áli ye mɛ̃, onkyam ŋɛn ndɛ oli Ɔ̃gelek, baal k’aywɛɛn k’atsiil ndɛ wɛ. 4 Kɛn a ndɔɔ oyɔ epal, me ndɔɔ andoo ba pfuru, b’ásuɛɛn onse nkel a bia-byɛ, me ndɔɔ yi aliɔɔl bia-byɛ m’emfa ki eyii bia-byɛ ndii onse Yeso Mãsia. Bɔ asi obobɔ me ndɔɔ yi akaal bia-byɛ ankyal. 5 Kɛn a bee k’ewi bɔ mpwee si lio ngelemɔ̃ wɛ, k’eyoo bɔ bam wɛ, me ndɔɔ yɛn otaa-taa o Nsia yi Ngesɛ okal ɔ̃bu onse byɛ.

6 Me b’otal baal b’anduru bvɛɛ, onkyam ŋɛn bɔ áli baal b’emfa ke kyɛn, obɔ k’otal mɛ̃ bam wɛ. Ke ngwel wɛ, Nziã k’ali y’ɔ̃bɛɛ wɛ. Bɔ k’ali ye ndɔɔ yi eywɛɛn bɔ mɛ̃ osa wɛ. 7 Kɛn a bɔ amwɛn kwɛn Nziã owi mɛ̃ pfuũ li etee Nsia yi Ngesɛ ola baal bɛn k’Ayuda wɛ, onge b’éwi ndɛ Piɛɛl lɔ li atee yɔ ol’Ayuda. 8 Ke ngwel wɛ, ndɛ ondɛ wu osuul Piɛɛl ntam ol’Ayuda, wu osuul mɛ̃ hɛ̃ ntam ola baal bɛn k’Ayuda wɛ. 9 Dzak ye Piɛɛl ye Dzaã, b’ékewal baal onge ãkwii m’Ebvɔɔn, ŋ’emwɛn bɔ kwɛn Nziã áwi mɛ̃ pfuũ olɔ, bɔ anaan mɛ̃ ye Balanabas kuɔɔl, me ndɔɔ yi asuo kwɛn bɔ áli ɔ̃nguo ngɔmɔ̃ ye bee. Obobɔ, bee bueel ekuru kwɛn, bee, bee eyi ola baal bɛn k’Ayuda wɛ, bɔ ayi ol’Ayuda. 10 Kɛn a bɔ asɔɔ ola bee k’etsam m’aywal. Mɛ̃ bu nsi ndɔɔ oyɔ ɔ̃kwal ngɔmɔ̃.

11 Kɛn a ŋ’éyi Piɛɛl Ãntioswe, ke nkwel a ndyam, mɛ̃ éwi ndɛ mbyel me ndɔɔ yi ési ndɛ, ke ngwel wɛ ndɛ ási obi-obi. 12 Nzal a ŋɛn, ye k’eya baal ke kwɛ b’éyuɔɔl Dzak, Piɛɛl ákedza mboo mɔ̃ y’andoo bɛn k’Ayuda wɛ. Kɛn a ŋ’etɔ baal obɔ, ndɛ odzuru nzuru, bu atsɔɔn ye b’ékedza a ndɛ, me ndɔɔ yɛn ndɛ ákebal Ayuda. 13 Ayuda bakyɛ asam onse pfuru olɔ ye ndɛ, onkyam Balanabas hɛ̃ osam onse oliin obɔ. 14 Kɛn a ŋe mwɛn mɛ̃ kwɛn bɔ k’adzuu dzu m’emfa ki otaa-taa o Nsia yi Ngesɛ wɛ, mɛ̃ ngyɛɛn ye Piɛɛl ke mviil ã baal bueel bubu: «Okɛɛn yɛ wu Ɔ̃yuda yɛ akal m’emfa ki baal bɛn k’Ayuda wɛ, ke m’emfa ki Ayuda wɛ, obobɔ emfa emã ki eywɛɛn yɛ baal bɛn k’Ayuda wɛ k’akal onge Ayuda?»

15 Bia-byɛ mpii Ayuda b’emburu-ngoo eli, k’eli baal b’ãyam ãkyam b’ali y’ãbi wɛ.

16 Kɛn a bia-byɛ eyɛɛ wɛn mbuul k’akoo k’akal dzu m’okiaal o Ngel a Moyize wɛ, eli kɛn a m’okiool me Yeso Mãsia. Obobɔ, bia-byɛ hɛ̃ elɔ okiool onse Yeso Mãsia me ndɔɔ yɛn Nziã asuul bia-byɛ dzu me nkuul a okiool me Mãsia, ke me ndɔɔ olweel o Ngel wɛ. Ke ngwel wɛ, mbuul si ngɔmɔ̃ k’akoo k’akal dzu m’okiaal o Ngel wɛ. 17 Kɛn a ŋ’ebii bia-byɛ k’ekal dzu onse Mãsia, ŋɛn bia-byam hɛ̃ éli anga-ãbi. Ŋ’edzii k’eyɛɛn ndiri Mãsia oli ɔ̃sal a obi? K’obobɔ bam wɛ! 18 Okɛɛn mɛ̃ bvool efaal ãndɔɔ ã Ngel m’étsal mɛ̃, ŋ’esuo kwɛn mɛ̃ ndi mbuul wu efel Ngel. 19 Ke ngwel wɛ, mɛ̃, me nkuul a Ngel, mɛ̃ emeekwa me ndɔɔ a yɔ, kwɛn oŋɔ̃ mɛ̃ nkal y’elaã me ndɔɔ a Nziã. Ábɛɛl mɛ̃ m’enkulusu ye Mãsia: 20 Mɛ̃ ke ndi bvool mwiĩ wɛ, wu oli mwiĩ onse mɛ̃ eli Mãsia. Elaã li ndi a mɛ̃ meba onse nzuru, mɛ̃ ndi ye lɔ me nkuul a okiool me Muaan a Nziã wu ádzii mɛ̃ bvool áwi elaã e ndɛ me ndyam me ndɔɔ a mɛ̃. 21 Mɛ̃ k’ebee nyiĩ a Nziã wɛ. Ke ngwel wɛ, okɛɛn mbuul akal dzu m’okiaal o Ngel, ŋɛn epfu li ékwi Mãsia k’eli y’otsɛn wɛ.