1 Etal be nzii mɛ̃ oyɛɛn: Ŋ'eli mbuul wu awal ɔ̃swal kɛn muaan wu ɔ̃bwee, ndɛ k'ali y'okam y'ɔ̃nkyal wɛ, onkyam ŋɛn ndɛ oli mfam a eluɔ e tal a ndɛ bvieel. 2 Ndɛ oli me mviɔɔl mi asal b'atal ndɛ ye b'akiaal opfel o ndɛ, tiil k'ekoo lio li éyɛɛl tal. 3 Eli emfa kiki hɛ̃ me bia-byɛ. Ŋ'éli bia-byɛ kɛn baan b'abwee, ɛ̃kiri y'ãngel m'ɔ̃kiri ã́kenyam bia-byɛ. 4 Kɛn a ŋ'ékoo lio li éwɛɛ Nziã, ndɛ áyuɔɔl Muaan a ndɛ wu áburu m'ɔ̃kaal. Muaan ondɛ ákal ke nsɛn okwɛn o Ngel. 5 Nziã áyuɔɔl ndɛ, me ndɔɔ yi abvuul baal b'áli ke nsɛn a okwɛn o Ngel. Ndɛ osi obobɔ, kwɛn ndɛ asuul bia-byɛ ekal baan a ndyam. 6 Me ndɔɔ yɛn byɛ eyii baan a ndɛ, Nziã oyuɔɔl Ɔ̃fel a Muaan a ndɛ onse ɛ̃kwal ɛ̃ bia-byɛ. Ɔ̃fel ondɛ abebiool ndiri: «Aba*! Taal!» 7 Yɛ bvool ke li ɔ̃nkyal wɛ, yɛ muaan li. Okɛɛn yɛ li muaan, Nziã hɛ̃ àwa yɛ ɔ̃swal wu élieel ndɛ me ndɔɔ a baan a ndɛ.

8 Byɛ tsɔɔn k'éyɛɛ Nziã wɛ, obɔ otsɛn bɛn byɛ éli ankyal b'etiɔ bvɛn, ke yam, k'eli anziã wɛ. 9 Kɛn a meba, byɛ emeeyɛɛ Nziã, wuo mɛ̃ ngyɛɛn wɛn ndɛ amaayɛɛ byɛ. K'otsɛn omã b'ekɔɔl byɛ me ndɔɔ yi elweel ɛ̃fel, mi ɛ̃ywɛn a waan bvool mi ngwel-a-ngwel? Byɛ bvool edzii k'ekɔɔl ankyal a myɛ̃? 10 Byɛ ebekiaal ãtsoo m'ãpfuun, y'answii, y'ɛ̃bvu, y'amvel! 11 Mɛ̃ ekɛɛ nguo me byɛ, owɛɛl ɔ̃sal wu mwɛn mɛ̃ fool me ndɔɔ a byɛ oyeyi ngwel.

12 Andoo a mɛ̃, mɛ̃ nduɔɔn byɛ wɛn esa onge mɛ̃, me ndɔɔ yɛn mɛ̃ hɛ̃ ngyii onge byɛ. Byɛ k'esi mɛ̃ ndɔɔ yi mbi si ngamɔ̃ wɛ. 13 Byɛ eyɛɛ ãndɔɔ m'ãbwel. Mɔ̃ m'ãsi kwɛn mɛ̃ yentee byɛ Nsia yi Ngesɛ sa yi ɛ̃kwel. Mɛ̃ éli y'oluu, 14 nzuru a mɛ̃ k'éli ngesɛ m'otal wɛ. Byɛ k'eyiri mɛ̃ wɛ, k'ebyel mɛ̃ hɛ̃ wɛ. Kɛn a byɛ eyɔɔ mɛ̃ onge ãnzwel ã Nziã, bam onge Yeso Mãsia ndyam. 15 Oŋɔ̃ esɛ ki éli a byɛ kwɛn? Ke ngwel wɛ, mɛ̃ eyɛɛn me ndɔɔ a byɛ wɛn, okɛɛn byɛ ekeepeel mviil ã byɛ me ndɔɔ yi ewa mɛ̃ mɔ̃, byɛ al'ekoo m'osa obobɔ! 16 Meba ŋã, mɛ̃ ngyii ɔ̃taal a byɛ me ndɔɔ yi eliaal mɛ̃ byɛ otaa-taa?

17 Ebal ki esuo andoo ba pfuru obɔ byɛ k'eli kyɛ-a-kyɛ wɛ. Bɔ adzii kɛn a k'akab byɛ ye mɛ̃, kwɛn byɛ ekuru nzuru me bɔ. 18 Me b'otal byɛ, eli ngesɛ kwɛn byɛ esuo ebal me ndɔɔ yi mvɛ-mvɛ lio lam lueel, ke kɛn a ŋe ndi mɛ̃ onse byɛ wɛ. 19 Baan a mɛ̃, mɛ̃ mwiĩ bvool abaan me ndɔɔ a byɛ, onge ɔ̃kaal wu oyii ayi oburu, tiil lio li etuu Mãsia nzuru onse elaã e byɛ. 20 Meba ŋã, mɛ̃ nzii bam k'ekal ye byɛ me ndɔɔ yi eswɛɛl emfa ki eyɛɛn ye byɛ. Ke ngwel wɛ, mɛ̃ ãyal ãmaãfa me ndɔɔ a byɛ.

21 Byɛ b'edzii k'ekal ke nsɛn okwɛn o Ngel, eyɛɛn mɛ̃, byɛ k'eyoo k'eyɛɛn yɔ wɛ? 22 Ke ngwel wɛ, ákel ndiri Abalayam áli ye baan b'abɔɔl buaal, wɛn ndɛ oburu y'ɔ̃kaal wu ɔ̃nkyal, wɛn ndɛ oburu y'ɔ̃kaal wɛn k'ɔ̃nkyal wɛ. 23 Muaan wu éburu ndɛ y'ɔ̃kaal wu ɔ̃nkyal, wu áburu m'emfa ki ombuul. Kɛn a wu éburu ndɛ y'ɔ̃kaal wɛn k'ɔ̃nkyal wɛ, wu áburu m'emfa e lɔɔ li éwi Nziã.

24 Ndɔɔ oyɔ eli mboo. Akaal obɔ asuo emfa bviaal bvi ondoo. Agaal, eli ondoo b'átɛn ke nkio yi Sinayi. Baal bueel b'aburu onse yam e ndɛ ali ankyal. 25 Agaal hɛ̃, eli nkio yi Sinayi k'ɔ̃kiri wu Alabi. Ndɛ bvool asuo bviil li Yelusalem li meba, ke ngwel wɛ baal a bviil olɔ ali onse onkyal ye baan a bɔ. 26 Kɛn a Yelusalem wa ywel k'ali m'onkyal wɛ, ndɛ wu oli ngoo a bia-byɛ wa taa-taa. 27 Ke ngwel wɛ, ákel ndiri:

«Sia mpaa, yɛ wu ɔ̃kaal wu empi,

yɛ wɛn ke li ye muaan wɛ!

Sia mpaa bibi bvool kuaal ɛ̃sɔɔl,

yɛ wɛn ke yɛɛ mpuru a k'ebaan mwiĩ me ndɔɔ oburu wɛ!

Ke ngwel wɛ, baan b'ɔ̃kaal wu áyiri akieel anduru b'ɔ̃kaal wa y'ɔ̃lam✝.»

28 Andoo, me b'otal byɛ, emfa ngemɔ̃ onge Isak, byɛ eli baan b'aburu m'emfa e lɔɔ li éwi Nziã. 29 Kɛn emfa kiki kyɛn tsɔɔn muaan wu áburu m'emfa ki ombuul áketuaal muaan wu áburu m'Ɔ̃fel mpal, nonɔ̃ ŋã hɛ̃ eli kɛn obobɔ. 30 K'Ɔ̃nkaan omã ayɛɛn? Ndɛ ayɛɛn bubu: «Tswɛɛl ɔ̃kaal wu ɔ̃nkyal ye muaan a ndɛ, ke ngwel wɛ muaan ondɛ kieel k'akab ɔ̃swal ye wu ɔ̃kaal wɛn k'ɔ̃nkyal wɛ wɛ✝.» 31 Obobɔ, andoo, bia-byɛ k'eli baan b'ɔ̃kaal wu ɔ̃nkyal wɛ, bia-byɛ eli baan b'ɔ̃kaal wɛn k'ɔ̃nkyal wɛ.