1 Andoo a mɛ̃ a dzii, ebee odzii kwɛn byɛ bueel ekal baal b'ayiool, ke ngwel wɛ byɛ eyɛɛ wɛn bia-byɛ b'eyiool, akieel atsiil ãndɔɔ ã bia-byɛ ye kyal lueel. 2 Nzal-a-ŋɛn, bia-byɛ bueel ebetsɛɛl m'emfa bibi. Mbuul wɛn k'abetsɛɛl onse ãyɛɛn wɛ, ŋ'ali mbuul wu ɔ̃koo, wu okoo k'akal y'omfam hɛ̃ nkal a nzuru a ndɛ yueel. 3 Emeetal, okɛɛn bia-byɛ ebelɔ bvieel onse ɛ̃nywã mi aswebval kwɛn bɔ ayoo bia-byɛ, ŋɛn bia-byɛ ekoo hɛ̃ k'ekal y'omfam nkal nzuru a bɔ yueel. 4 Bvool emeetal ãsua, nkyam ŋɛn mɔ̃ ãli m'ãnɛn-m'ãnɛn bvool mfel wa kokɔ abetsɛɛn mɔ̃, abedzoo mɔ̃ m'eluɔ kyam ki etsi-tsiri, bvool mɔ̃ ãbeyi mboo yi edzii ɔ̃dzoo a mɔ̃. 5 Eli emfa kiki me lelam: Lɔ eli elyam ki etsi-tsiri onse nzuru a mbuul, kɛn a lɔ ebendɛɛl nzuru m'ãndɔɔ m'ãnɛn. Emeetal emfa kyɛn mbaa yi nsi-nsiri ekoo k'edziool edzwa ki enɛn! 6 Lelam hɛ̃ eli onge mbaa. Lɔ eli ɔ̃kiri ɔ̃tsiin wu ãbi. Lɔ ebebiil nzuru a mbuul yam yueel. Lɔ eli elyam e nzuru a bia-byɛ. Lɔ ebedziool omwiĩ bueel yi efi onse ywɛn e mbaa lam. 7 Ke ngwel wɛ, anyam bueel b'edzwa, y'anywɛn, y'antaal y'answi, ali ke nsɛn okwɛn o mbuul, bvool ál'ali ke nsɛn okwɛn o ndɛ. 8 Kɛn a lelam, mbuul wu okoo k'asuul lɔ ke nsɛn okwɛn o ndɛ k'ali wɛ. Lɔ eli eluɔ ki ebi-ebi kyɛn k'ebekal bam pi wɛ, bvool lɔ eluul tɔ m'ɔ̃twɔɔ wu abebam baal. 9 Me lɔ, bia-byɛ ebelweel ndɛ ondɛ wu oli Mfam bvool oli Tal a bia-byɛ. Me lɔ hɛ̃ bia-byɛ ebedza baal b'ébuo Nziã m'emfa e ndɛ mpaan. 10 M'ɔ̃nywã wuwu, ãyɛɛn m'ondɔɔl o kuɔɔl ye m'odza o mpaan ãbepal. Andoo a mɛ̃ a dzii, eyɔɔl kwɛn ebee obobɔ okal. 11 Ɔ̃tswɛ a mvieel ngɔmɔ̃ abepaal ãdza mã ngesɛ y'ãdza mã ye nkaa nkuul ngamɔ̃? 12 Andoo a mɛ̃ a dzii, ɔ̃ti wa fig okoo k'aburu nsia yi olibve? Ɔ̃ti wa bvine hɛ̃ okoo k'aburu nsia yi fig? Ɔ̃tswɛ a mvieel wɛn ãdza ãli y'ɔ̃ngwa k'akoo k'ani ãdza mã ngesɛ wɛ.

13 Onse byɛ eli ye mbuul wu y'ɔ̃nyiã bvool y'ãyal? Yɔɔl kwɛn ndɛ asuo mɔ̃ m'emfa ki ngesɛ ki ekal ndɛ, m'ãndɔɔ m'esa ndɛ onse efyɛ y'ɔ̃nyiã. 14 Kɛn okɛɛn ɛ̃kwal ɛ̃ byɛ ɛ̃luul me nsɔɔ yi enduru ɔ̃ndel, okɛɛn byɛ eli ye nzal-a-nsia, ebee ntwel obɛɛl. Ebee otaa-taa obiil me mfya a byɛ. 15 Ãyal m'obobɔ ke m'ãfi ywel wɛ, mɔ̃ ãli m'ɔ̃kiri, m'ombuul bvool m'ɔ̃pfu. 16 Ke ngwel wɛ, mboo yi eli ɔ̃kwal nsɔɔ ye nzal-a-nsia, ku eli ɛ̃tsab y'ɛ̃sal mi ɛ̃bi-ɛ̃bi mi emfa bwɛn emfa. 17 Kɛn ãyal m'ãfa ywel ãwa, ŋ'ɛ̃kwel kɛn, ɔ̃kwal wa tsɛtsɛ, ke mbee oŋɔ̃, mɔ̃ ãwa opi y'efyɛ. Mɔ̃ ãdzii k'ãbvool baal, ãluul me nyiĩ bvool y'ãndɔɔ mã ngesɛ. Mɔ̃ k'ãli y'ɔ̃bɛɛ wɛ, k'ãli hɛ̃ ye pfuru wɛ. 18 B'abelɔ opi onse bɔ abekwɛn onse opi, bvool nsia yi ebɔɔ bɔ eli omwiĩ bo dzu.