1 Meba ŋã, byɛ b'apfel, eyoo mɛ̃! Elel bvool eluɔɔl me ndɔɔ a fool li èyeyiool nkal a byɛ! 2 Opfel o byɛ obwel, bvool ekɔ e byɛ asieel adzi. 3 Ɔɔl ye nzi e byɛ eburu nkoo, bvool nkoo oyɔ èfɛn byɛ, yɔ èdza ãnzuru ã byɛ onge mbaa. Byɛ ál'ebvool opfel m'ãtsoo mã ntɔ. 4 Byɛ ebee k'ewa furu li asal b'asal onse ãnguun ã byɛ. Furu olɔ ebeta ɛ̃baan. Ɛ̃nduɔɔl mi asal obɔ ɛ̃tɔ tiil m'ãtswi ã Mfam Sabahote. 5 Byɛ ekal me nsie onse opfel y'efua. Byɛ eyii tiaal-tiaal onge anyam b'akiaal tsoo li atiɛɛn bɔ ãbwel. 6 Byɛ ewi etumbu bvool ebam mbuul wa dzu. Ndɛ oyɔɔl byɛ esi b'edzii byɛ.

7 Andoo, oŋɔ̃ ekal y'osɛ-mwiĩ tiil k'eya Mfam. Emeetal ɔ̃sal a ãnguun: Ndɛ oli y'osɛ-mwiĩ bibi b'akiaal ekwɛn e nsie bvi ngesɛ, bɛɛn bvi ɛ̃kwel tiil bvi ãmbee. 8 Byɛ hɛ̃ ekal y'osɛ-mwiĩ! Ekal ye mpɛn, ke ngwel wɛ oya o Mfam oyii tsotsoo. 9 Andoo a mɛ̃, ebee obeluɔɔl onse byam-a-byam, kwɛn Nziã abee byɛ etumbu owa. Etal, wu atsiil ãndɔɔ ã baal otɛɛn ke kwel edzoo. 10 Andoo, me ndɔɔ yi etal fool y'osɛ-mwiĩ, eluɛɛn kuul li aliaal-ɛ̃kiɛɛn a Nziã b'áyɛɛn me nkuũ a Mfam. 11 Etal! Bia-byɛ ebetuɛɛn baal b'ákuru mwiĩ onse fool. Byɛ eyoo ɔ̃sam wu osɛ-mwiĩ o Dzob, bvool byɛ emwɛn ki éwi Mfam ndɛ ke ntɔ, ke ngwel wɛ Mfam oluul me dzii ye nyiĩ. 12 Andoo, ŋ'ɛ̃kwel, ebee ɛ̃sob obedza, ekal me nkuũ a ywel, ekal me nkuũ a nsie, wuo ebee ɔ̃sob ndyam ɔ̃bi pyɛ odza. Eyɛɛn kɛn a wɛn «hɛɛ̃» okɛɛn eli hɛɛ̃, bvool wɛn «hɛɛ̃-hɛ̃» okɛɛn eli hɛɛ̃-hɛ̃, me ndɔɔ yɛn byɛ ebee onse etumbu e Nziã obva.

13 Ngɔmɔ̃ onse byɛ oli onse fool? Yɔɔl ndɛ abuɛɛn. Ngɔmɔ̃ onse byɛ oli onse esɛ? Yɔɔl ndɛ ayam ãnziĩ. 14 Ngɔmɔ̃ onse byɛ oli y'ãluu? Yɔɔl ndɛ ata akuul-kuul b'Ebvɔɔn mbel, kwɛn bɔ abuɛɛn me ndɔɔ a ndɛ, bvool asɛɛn ndɛ mbaal me nkuũ a Mfam. 15 Ebuɛɛn li y'okiool èbvuul nga-ãluu bvool Mfam àtɛɛl ndɛ. Okɛɛn ndɛ asi ãbi, àdzeel ndɛ mɔ̃. 16 Oŋɔ̃ esɔɔ odzeel b'ãbi onse byam-a-byam, bvool ebuɛɛn me ndɔɔ a bakyɛ, kwɛn oŋɔ̃ byɛ ebvuul. Ebuɛɛn li mbuul wa dzu esal ye mpɛn ngamfɛn. 17 Eli wu ɔ̃liaal-ɛ̃kiɛɛn a Nziã áli mbuul wu emfa emɔ̃ ye bia-byɛ: Ndɛ ábuɛɛn y'ɔ̃tɛɛ̃ kwɛn mvel abee ondwɔɔ, bvool mvel k'andwɔɔ me nsie wɛ tiil mvel tyel y'etswel. 18 Ndɛ bvool ábuɛɛn, obobɔ ywel ewi mvel bvool nsie eburu ekwɛn e yɔ. 19 Andoo a mɛ̃, okɛɛn ngɔmɔ̃ onse byɛ amaadziɔɔn lala y'otaa-taa, ŋɛn wukyɛ oyebveel ndɛ, 20 eyɛɛ wɛn mbuul wu abiri nga-ãbi me nkuul yi edziɔɔn ndɛ me yɔ, ŋ'abvuul ndɛ onse lepfu bvool osi kwɛn adzeel ɔ̃bobɔ wu ãbi ã ndɛ.