प्रकाशितवाक्य 21

10 तेवी जीवान द्‍वारे मी ताबाम एनो, एने हेरोगदुत माहु एक मोटला एने उचाच बोयड़ा पोर ली गीयो। तो माहु चोखालो हियोर यरूशलेमाह देखाड्यो, तो बोगवाना फाय रेन हेरगाम रेन नेचो उतेरने बाजरियेल एतो। 11 एने बोगवानान बोड़ाय हेऱ्यो तो चोमेकणे बाजरियेल एतो। हियोर जुलूम मोंगालो देगड़ान, मतलब यशब ने गेत एने बिल्लोर ने गेत साप सुतरो चोमेकतालो। 12 ज्या हेयरान बितड़ा उचा एता एने बारा बायणा एता, एने ता बारा बायणा हेऱ्या राखवाली केरनेन केरता बारा हेरोगदुत एता। एने ता बायणा पोर इस्राएल ने बारा गेराणान नाव लिखेल एतो। 13 न्या माय रेन तीन बायणा दिह उगता उगे: उत्तर दिशान उगे तीन बायणा, दक्शिण दिशान उगे तीन बायणा, दिह बुड़ता उगे तीन बायणा एता। 14 ज्या हेयरान बितड़ा बारा पायान देगड़ा पोर बाणायेल एतो, एने एकेक पोर मेंड्रान बारा प्रेरितान नाव बारा लिखेल एतो।