अमोस 6

इस्राएल ने नास

1 "हाय ता पोर जा सियोन माय हुकेह रेतेह, एने ता पोर जा सामरीयान बोयड़ा पोर बी फिकऱ्या रेतेह; ता जा देसा माय नावगाज्या हेते, जा फाय इस्राएल ने गेराणो आवेह! 2 कलने हेयराम जाएन दिखो, एने ता रेन हमात नावान मोटला हेयराम जावो; ओवता पलिश्तीन गत गावाम जावो, काय ज्या दुय राज्या, तुमरा राज्याह रेन हाजा हेते काय? काय तान एद्दी तुमरी एद्दीह रेन मोठी हे काय?"

3 तुमू खाराब दिह्याह सेटा केर देतेह, एने राड़ीन गादीह आहने लावतेह।

4 तुमू आथीन दातान पोलांगा पोर लोटतेह, एने तुमरा आथरोणा पोर पाय पोसारीन हुवतेह; तुमू पुटे ओहला मेंड्रा एने माताला वासड़ाह खातेह।

5 तुमू रेणथा हेऱ्या गीत गावतेह, एने दाऊदान गेत बात बातीन वाजो वाजाड़तेह। 6 तुमू गीलासा पोर गीलास अंगुरान रोह पितेह, हाज हाजो तेल लागाड़तेह; पुण युसूफा पोर आवण्यी पिड़ान हाल होमलीन दुखी नाह एते। 7 केरीन ता आखान पेल तान देसा माय रेन निकालाय जाती, एने जा पाय पोसारीन खाराब काम केरताला; तान खाराब काम केरनो बोंद एय जाय।

8 सेनान यहोवा बोगवान इह केरीन किथे, बोगवान सोताच ने सुगोण खाएन कियेल हे, "जा पोर याकुब मोठाय किरेह, ताह मी नफरत केरथु; एने तान किल्लाह दुसमोनाय मेलथु, मी सामरी गाव एने तान आखो काय दुसमोनान आथाम होप देह।"

9 केदी एगदा कुटूमा माय दोह एदमी वोच रेती, तीबी ता मोर जाती। 10 मोरनार एदम्यान काकोख जो ताह हेलगाड़न्यो हे, तान देड़ाह गेराम रेन बाहेर निकालनेन केरता उखली; एने बुजणेन केरता गेरान बाहेर ली जाती। ता गेरान सिवण्याम लिकायेल माणहाह फुसती, "काय तार हेऱ्यो इखेह उंजु हे?" तेवी तो केय, "कुण नाह,"

तेवी तो केय, "ठावको रे! आपुह बोगवानान नाव नाय लेणे जुवे।"

11 काहाकाय बोगवानान उकुमा केरीन मोटला गेरान टुकड़ा, एने आतल्या गेरान चिह पोड़ जाय। 12 काय गोड़ा देगड़ा पोर दोवेड़नु? काय बोयला केरीन देरीया पोर एल जुपतेह? पुण तुमू नियावाह जेहेर, एने नियावान फोलाह कोड़वो बाणाव दियेल हेते।

13 तुमू ओहली वोस्तुन वोजेसे खुस हेते, एने रागाम बोरायीन ज्य केणे बाजरेनाह; "आमु आमरी ताकेत केरीन कारनाईम गाव जिकेल हेते।"

14 केरीन सेनान यहोवा बोगवान इह केरीन किथे, "एय इस्राएल ने गेराणा, देख, मी तार विरूद एक देसाह उबो केरूह, जो हमात गाटाम रेन अराबान नेदी वोर तुमूह विताड़ी।"