अमोस 7

नास ने तीन देरसेन

टिड्या

1 बोगवान माहु ज्य देखाड्यो, एने मी काय देखथु काय तो पासाणल्यो खेड़ उगणेन पेल टिड्या पायदा किऱ्यो; एने तो राजान कामाय काटणेन बाद पासाणल्यो खेड़ एतो। 2 जेवी ता बुयीन आखो खेड़ खाय गीया, तेवी मी केयो, "एय बोगवान, माफ केर! ज्यान बाद याकुब किहीक उब रेय सेकी? तो आतल्यो एने कोमजोर हे।"

3 तेवी बोगवान ज्यान बाराम तान विचाराह बोदेल दिनो, एने तो केयो, "एवी ओहलो नाय एय।"

आक्‍ठान देरसेन

4 बोगवान माहु ज्य देखाड्यो, मी दिख्यो काय मालीक नियाव केरनेन केरता आक्ठाह हादणे बाजरिनोह; एने ता आक्‍ठा केरीन मोटलो देरीयो हुक गीयो, एने बुयीह बी खेतेम केरने बाज गीयो। 5 तेवी मी केयो, "एय बोगवान, देन्ड आपणेन बोंद केर! ज्यान बाद याकुब किहीक उब रेय सेकी? तो जुलूम आतल्यो एने कोमजोर हे।"

6 तेवी बोगवान ज्यान बाराम तान विचाराह बोदेल दिनो, एने तो केयो, "ओहली वात पोशी नाय एय।"

वोड़ांबान देरसेन

7 मालीक माहु ज्य बी देखाड्यो, मी दिख्यो काय बोगवान एक उचाच बितड़ा पोर तान आथाम वोडांबो लेन उबरिनोह। 8 बोगवान माहु केयो, "एय आमोस, तुवाह काय देखाह?" मी केयो, "एक वोडांबो।" तेवी बोगवान केयो, "देख, मी मारा सोतान माणहे इस्राएल ने विचीम वोडांबो लागाडुह। एवी मी ताह देन्ड देया सावाय नाय सोडु। 9 इसहाक ने उचालो जागो उजाड़ एय जाय, एने इस्राएल ने चोखाला जागा सुनसान एय जाती; एने मी आथाम तालवार लेन यारोबाम ने गेराणान विरूद उब रेह।"

आमोस एने अमस्या

10 बेतेल ने चाकऱ्यो अमस्या, इस्राएल ने राजा यारोबाम फाय ज्यी खुबेर ली मुकल्यो, "आमोस तार विरूद इस्राएल ने गेराणान विचीम किदेर काड़ने बाजरिनोह, एवी देस तान सोबदाह उंजु वोदार वेठ नाह सिकेत। 11 काहाकाय आमोस इह केरीन किथे, ‘यारोबाम तालवार केरीन माराय जाय, एने इस्राएली माणहे तान देसाम रेन खेरीच निकालाय जाती।’ "

12 तेवी अमस्या आमोसाह केयो, "एय देरसेन देखणार, तारो जीव वोचाड़ीन यहुदा देसाम नाह जा, एने तास रूटो खाज्ये एने तास जाणाव किरज्ये। 13 पुण बेतेल माय पुशो केदी जाणाव मा किरहे, काहाकाय ज्यो राजान चोखालो जागो एने राज हियोर हे।"

14 आमोस अमस्या ज्य जापाप आप्यो, "मी नाहते जाणाव केरनार इतो, एने नाह जाणाव केरनारान बिटोख; मी फोक्‍तो गोवाल इतो, एने उमरान जाड़ान राखवाल इतो। 15 पुण बोगवान माहु मेंड्रा बोकड्यान पासाण पासाण चालतालोन हादिन केयो, ‘जा, मारा माणहे इस्राएलीन केरता जाणाव केर।’ " 16 केरीन एवी तु बोगवानान वचन होमेल, तु किथे, "इस्राएल ने विरूद जाणाव मा किरे; एने इसहाक ने गेराणान विरूद जाहार ताहार वचन मा होमलाड़े।" 17 केरीन बोगवान इह केरीन किथे, "तारी बायकु ज्या गावाम वेश्या बोण जाय, एने तारा सोरा सोऱ्यु तालवार केरीन माराय जाती, एने तारा जागाह दोयड़ी केरीन मापीन आपसाम वाटाय जाय; एने तु सोता एठा देसाम मोरहे, एने इस्राएल माणहे तान देसाम रेन खेरीच निकालाय जाती।"