1 आमोस तकोआ गावान एक गोवाल इतो। तान ज्य वचन हे, बुकेम एणेन दुय वोरह्या पेल तो इस्राएल देसान बाराम देरसेन दिखेल इतो, जेवी यहुदा पोर उजीयान एने इस्राएल पोर यहोआशान बिटोख यारोबाम ने राज इतो।

2 तो केयो,

"बोगवान सियोन पोर रेन गाजी,

एने यरूशलेम रेन तान बोल होमलाड़ी;

तेवी गोवालान चाराय दुख मोणावी,

एने कर्मेल बोयड़ान चुटो हुक जाय।"

3 बोगवान इहकेरीन किथे, "दमिश्क ने जाहार ताहार गुनान वोजेसे तान देन्ड नाय सोडु; काहाकाय ता गीलाद गावाह, मोलन्या लोड़ान आथ्यारा केरीन मोहंदेलेल हेते। 4 केरीन मी राजा हजाएल ने राज गेराणाम आक्‍ठो पेटाडुह, आक्‍ठो तान सोरान बेन्हद्द ने राज किल्‍ला बी हेलगी जाती। 5 मी दमिश्क ने रिगण्या बायणाह तोड़ देह, एने आवेन नावान गाटाम रेणाराह, एने बेतएदेन ने गेराम रेणारा आदिकार केरनाराह खेतेम केरूह; एने सिरीया देसान माणहे आरापी बोणीन कीर गावा माय जाती, बोगवानान ज्योस वचन हे।"

6 बोगवान इह केरीन किथे, "मी गाजा हेयरान एजार ताहार किरेल गुनान वोजेसे मी तान देन्ड नाय सोडु; काहाकाय ता आखा माणहाह बोंदी बाणावीन ली गीया काय ताह एदोम देसान ताबाम केर देय। 7 मी गाजा हेयरान बितड़ा पोर आक्‍ठो पेटाडुह, तान वोजेसे तान किल्‍ला हेलगी जाती। 8 मी अश्दोद हेयराम रेणारा माणहाह एने अश्कलोन हेयरान राज आदिकाराह खेतेम केर देह, मी मारो आथ एक्रोन राज्या पोर विसुह; एने वोचेल पलिश्‍ती माणहे बी खेतेम एय जाती," बोगवानान ज्योस वचन हे।

9 बोगवान इह केरीन किथे : "मी सोर हेयरान एजार ताहार गुनान वोजेसे मी तान देन्ड नाय सोडु; काहाकाय ता आखा माणहाह बोंदी बाणावीन एदोम राज ने आथाम होपेल एता; एने बायह्याख ने वाचाह विहरी जायेल एता। 10 केरीन मी सोर हेयरान बितड़ा पोर आक्‍ठो पेटाडुह, तान वोजेसे तान किल्‍ला बी हेलगी जाती।"

11 बोगवान इह केरीन किथे : "एदोम राज ने एजार ताहार गुनान वोजेसे मी तान देन्ड नाय सोडु; काहाकाय तो आथाम तालवार लेन तान बायाख ने पासाण पुड़ेल इतो, एने कायच किव नाह किऱ्यो, पुण राग केरीन ताह कायेम फाड़तेस रिनो, एने तान रागाह ओलाणे नाह दिनो। 12 केरीन मी तेमान हेयरा पोर आक्‍ठो पेटाडुह, एने तान वोजेसे बोस्रा हेयरान किल्‍ला हेलगी जाती।"

13 बोगवान इह केरीन किथे : "मी अम्मोन देसान एजार ताहार गुनान वोजेसे मी तान देन्ड नाय सोडु; काहाकाय तो गीलाद ईलाकाम वोर तान राज ने एद्दी वोड़ावणेन केरता लेड़ाय माय पेटावाल्यु बायकुन पेट चिरेल इतो। 14 केरीन मी तान राजदानी रब्बान बितड़ा पोर आक्‍ठो पेटाडुह, एने तान वोजेसे बोस्रा हेयरान किल्‍ला हेलगी जाती। ता लेड़ायीन दिह्या माय बोबखारनो एय, ता वादोण एने बुत्यान दिह रेती। 15 तान राजा एने तान आदिकारी बी बोंदी माय जाती," बोगवानान ज्योस वचन हे।