1 एय इस्राएली, ज्य वचन होमलो जो बोगवान तुमरे बाराम मतलब ता आखा गेराणान बाराम कियेल हे; जाह मी मिस्र देसा माय रेन लायेल हे। 2 "देरतीन आखा गेराणाम रेन मी फोक्‍तो तार पोरच मोन लागाड़ेल हे, केरीन मी तुमरा आखा गुनान देन्ड आपुह।"

3 केदी दुय एदमी पेलुच सहमत नाय एती; काय ता एकठास चाल सेकती?

4 काय सिंहवाग सिकार सापड्या सावाय जेंगला माय डांगारी? काय पाटड़ो सिंहवाग बुखले पेटे देराम रेन गुंगरेह?

5 काय चिड़ा बिगेर फांदो लागाड़ेल फोसती? काय बिगेर काह फुसेल सिरजाल बुयी पोर उचेकणे?

6 काय एगदा गावाम बिरो वाजाड़े एने माणहे नाय थुर थुर कापती? काय बोगवान मोकल्या सावाय एगदा गावाम एगदी पिड़ा आव सिकेह?

7 इहीच केरीन मालीक बोगवान तान सेवक जाणाव केरनारा पोर, तान लिकायेल वातु देखाड्या सावाय काय काम नाह किरेत।

8 जेवी सिंहवाग डांगारी, कुण नाय बिय? मालीक बोगवान केयो, कुण हे, जो जाणाव नाय केरी?

9 अश्दोद देसान किल्लाम एने मिस्र देसान किल्लाम ज्य पारचार किरो : "सामरीन बोयड़ा पोर एकठा टोलवाएन दिखो, एने सामरी राज ने मायता कोहली गेरबेड़ एने अत्याचार एणे बाजरेनाह!"

10 बोगवानान ज्यो बोल हे, "जा माणहे तान गेराम तेकलीत देन एने लुटेल मालदेन टुलो केरीन मेल रेतेह, ता हास केरीन काम केरने जाणतेस नाह। 11 केरीन बोगवान किथे, दुसमोन ज्या देसाह कोंड लेय; एने तो तारी ताकेतीह तोड़ी, एने तारा किल्‍ला लुटाय जाती।"

12 बोगवान इह केरीन किथे, "जीह केरीन गोवाल सिंहवागान मुयाम रेन तान मेंड्रान दुय पाय, नाहते कानान एक टुकड़ो ओलोस वोचाड़ सिकेह, तीहीच केरीन मालीक सामरी राज्याम रेणारे फोक्ता थोड़ाक इस्राएली माणहे इह केरीन वोचाड़ाय जाती, जीह केरीन पोलांगान कोपरो एने आथरोणान एक टुकड़ो।" 13 यहोवा बोगवान, मालीक बोगवान इह केरीन किथे, "होमलो, एने याकुब ने गेराणान विरूद गोवाय दिवो। 14 ✝जे दिह मी इस्राएलाह तान गुनान देन्ड आपुह, ते दिह मी बेतेल ने वेद्युह बी देन्ड आपुह; एने मी वेद्युन चुटाह तोड़ीन बुई पोर टाक देह। 15 मी सामरी गावान हियालान गेराह एने उनालान गेराह, दुयूह ओदारूह; एने आथीन दाता केरीन होबाड़ेल गेराह बी ओदार देह, एने मोट मोटला गेरे बी नास एय जाती।" बोगवान ज्यु वातु कियेल हे।