एस्तेर 5

एस्तेर राजा एने हामानाह खाणान नेवता आपणे

1 तिसरी दिह एस्तेर तीन राणीन फाड़का पेरीन राजवाड़ान माय खोली माय जाईन, राजवाड़ान सोमोर उबरेय गियी। राजा ते राजवाड़ा माय राजगादी पोर गेरान बायणान सोमोर बोह रियेल इतो; 2 एने जेवी राजा एस्तेर राणीह खोली माय उबरियेल दिख्यो, तेवी तो ती पोर खुस इन राजदेन्डाह जो तान आथा माय एतो, ती उगे ओंगाण किऱ्यो। तेवी एस्तेर आहने आवीन राजदेन्डीन टोक सापली। 3 तेवी राजा तिह फुशो, "एय एस्तेर राणी, तुवाह काय जुवे? एने तु काय मांगेह? मांग एने तुवाह आदो राज वोर आपाय जाय।"

4 एस्तेर केयी, "केदी राजाह पुटे, ते आज हामानाह आरही लेन ता खाणा माय आवी, जो मी राजान केरता तियार किरेल हे।"

5 तेवी राजा उकुम आप्यो, "हामानाह जेल्दीच लेन आवो, काय एस्तेरीन नेवता मान लेवाय जाय।" तेवी राजा एने हामान एस्तेर तियार किरेल खाणा माय आवा। 6 खाणेन टेम माय जेवी अंगुरान रूह पिवाय जाणे बाज रियेल एतो, तेवी राजा एस्तेरीह केयो, "तारी काय विन्ता हे? तु काय मांगेह? मांग एने आदो राज वोर तुवाह आपाय जाय।"

7 एस्तेर जापाप आपी, "मारी विन्ता एने जो मी मांगथु तो ज्य हे, 8 केदी राजा मार पोर खुस हे, ते मारी विन्ता हुमेलज्ये एने जी मांग मी मांगुह तोच आपज्ये राजाह स्वीकार एय, ते राजा एने हामान हेकाले ता खाणा माय आवी जाह मी तान केरता तियार केरूह, एने हेकाले मी राजान ज्या वचनान गेत केरूह।"

हामान मोर्देकाह मारनेन हुमच्यो केरने

9 ते दिह हामान खुस एने मोना माय खुस इन बाहेर गीयो। पुण जेवी तो मोर्देकाह राजवाड़ान फाटेक पोर दिख्यो, काय तो तान सोमोर नाह ते उबरिनो, एने नाह ते सिटो इनो, तेवी तो मोर्देकान विरूद रागा माय बोराय गीयो। 10 तीबी हामान सोताह रोकीन तान गेर गीयो; एने तान जोड़ीदाराह एने तान बायकु जेरेशाह हादाड्यो। 11 तेवी हामान ताह तान मालदेनान होवटाय, एने तान बाल बोचान वोड़ती एने राजा ताह किहीक किहीक वोदाड्यो, एने दिहरा सोब आदिकाऱ्याह एने तान सोब काम केरनाराह रेन उचो पोद आपेल इतो, त्यु सोब वात्यु किय होमलायो। 12 हामान ज्य बी केयो, "एस्तेर राणी माहु सोड़ीन पोशी कुणीह राजान आरही, तीन तियार किरेल खाणा माय आवणे नाह देनी; एने हेकालेन केरता राजा हेरी ती माहु नेवता आपेल हे। 13 काहाकाय जेवी जेवी माहु तो यहूदी मोर्देके राजवाड़ान फाटेक पोर बोह रियेल देखाह, तेवी ज्य सोब आदार सम्‍मान मारी नेजरी माय वायबार लागेह।"

14 तान बायकु जेरेश एने तान आखा जोड़ीदार ताह केया, "पाचाह आथ उचो फासीन एक खांब बाणावाय जाय, एने उठ्यान राजाह किज्ये काय ता पोर मोर्देकाह टांगाड़ाय जाय; तेवी राजा हिऱ्यो खुसी माय खाणा माय जाज्ये।"

ज्यी वाती पोर खुस इन हामान तोहलोच फासीन एक खांब बाणवाड्यो।