एस्तेर 9

यहूदी माणहान तान दुसमोनाह खेतेम केरनो

1 अदार नावान बारावा मोयनान तेरावी दिह्याह, जेदिह राजान उकुम एने नेम पुरा एणेन एतो, एने यहुदिन दुसमोन ताह जिकणेन आसा मेलताला, पुण तान उल्टा यहूदी तान दुसमोनाह जिक गीया। 2 ते दिह यहूदी माणहे राजा क्षयर्षान आखा ईलाका माय जिव जिवान हेयरा माय टोलवाना, काय जा तान नुकसानी केरनेन कोसीत केरी, ता पोर आथ विसे। कुण तान सामनो नाह केर सेकनो, काहाकाय तान बिय देस देसान माणहान मोना माय रिग जाईल इतो।

3 पुण ईलाकान सोब आदिकारी एने डायडाया, एने मुखी एने राजान काम केरनारे यहुदिन मुदेक केऱ्या, काहाकाय तान मोना माय मोर्देकान बिय रिग जाईल इतो। 4 मोर्देके ते राजा फाय जुलूम नाव गाजेल इतो, एने तान बाहदुरी आखा ईलाका माय पोसरी गियी; पुण ता एदमी मोर्देकान बोड़ाय वोड़ती गियी। 5 केरीन यहूदी तान सोब दुसमोनाह तालवारी केरीन मारीन खेतेम केर टाक्या, एने तान दुसमोनाह तान मोरजी पारमाणे वेवारो केऱ्या।

6 शूशन राजगेढ़ा माय यहूदी पाच होव माणहाह मारीन खेतेम केर देना। 7 ता पर्शन्दाता, दल्पोन, अस्पाता, 8 पोराता, अदल्या, अरीदाता, 9 पर्मशता, अरीसे, अरीदे, एने वेजाता, 10 मतलब हम्मदात ने सोरो यहुदिन विरोदी हामानान दोह सोराह बी माऱ्या; पुण तान मालदेनाह नाह लुट्या।

11 ते दिह शूशन गेढ़ माय मारायेल तान गेणती राजाह होमलाड़ाय गियी। 12 तेवी राजा एस्तेर राणीह केयो, "यहूदी शूशन राजगेढ़ाच माय पाच होव माणहाह एने हामानान दोह सोराह मारीन खेतेम किरेल हेते; पोशा राज ने दिहरा ईलाका माय ता काय जाणू काय काय केऱ्या एती! एवी ज्याह रेन वोदार तारी विन्ता काय हे? तो बी पुरो केराय जाय। तु काय मांगेह? तो बी तुवाह आपाय जाय।"

13 एस्तेर केयी, "केदी राजान मोरजी एय ते शूशन गेड़ान यहुदिह आजीन गेत हेकाले बी केरनेन उकुम आपाय जाय, एने हामानान दोह सोराह फासीन खांबा पोर टांगाड़ाय जाय।" 14 राजा केयो, "ओहलोच केराय जाय;" ज्यो उकुम शूशन गेढ़ा माय आपाय गियी, एने हामानान दोह सोरा टांगाड़ाय गीया। 15 शूशन वाला यहूदी अदार मोयनान चौदावा दिह्याह बी एकठा टोलवायीन शूशन माय तीन होव एदम्याह माऱ्या एने मालदेन नाह लुट्या।

16 राज ने दिहरा ईलाकान यहुदि एकठा टोलवायीन जान तान जीव वोचाड़नेन केरता उब रेना, एने तान दुसमोना माय रेन पंच्याहत्तर एजार माणहाह मारीन तान दुसमोना हेऱ्या रेन आराम सापड़ाया, पुण मालदेन नाह लुट्या। 17 ज्य अदार मोयनान तेरावा दिह्या माय केराय गीयो, एने चौदावा दिह्या माय ता आराम केरीन खाणो खादा एने खुसीन दिह ठेराया। 18 पुण शूशन हेयरान यहुदि अदार मोयनान तेरावा दिह्याह एने ताच मोयनान चौदावे दिह्याह एकठा एना, एने ताच मोयनान पोन्दरावा दिह्याह ता आराम केरीन खाणान एने खुसीन दिह ठेराया। 19 केरीन गावावाला यहुदि जा बिगेर बितड़ान वोहती माय रेताला, ता अदार मोयनान चोवदावा दिह्याह खुसी, खाणो, सुट्‍टी एने आपसाम खाणेन वोस्तु मोकेलनेन दिह ठेरावीन मानतेह।

पुरीम नावान तिवार ठेरवाय जाणो

20 ज्यु वात्यु लेखीन मोर्देके राजा क्षयर्षान आखा ईलाका माय, काय आहने काय सेटा रेणारे आखा यहूदी फाय चिट्ठयु मोकल्यु, 21 एने ज्यो उकुम आप्यो, काय अदार मोयनान चौदावा एने ताच मोयनान पोन्दरावा दिह्याह देर वोरीह तिवार मोणाया केरी। 22 जा माय यहूदी तान दुसमोना हेऱ्या रेन आराम सापड़ाया, एने ज्य मोयनो जा माय दुख खुसी माय एने रेड़नो खुसी माय बोदली गीयो; मान्या केरी एने ताह खाणो एने खुसी एने एक दिहरा फाय खाणेन वोस्तु मोकेलने एने गेरब्याह दान आपणेन दिह माने। 23 तेवी यहूदी जिह केरीन सुरवात किरेल एता, एने जीहे मोर्देके ताह लिख्यो, तिहेच चालु मेलनेन हुमच्यो केर लेदा।

24 ✝ 9:24 एस्तेर 3:7 काहाकाय हम्मदात अगागीन सुरो हामान जो सोब यहुदिन विरोदी इतो, तो यहुदिह खेतेम केरनेन हुमच्यो किऱ्यो, एने ताह मिटाड़ टाकणेन पुरीम मतलब चिट्ठ्यु निकालेल इतो। 25 पुण जेवी राजा ज्य जाण लिदो, तेवी तो उकुम आप्यो एने लेखाय किऱ्यो ज्यो खाराब हुमच्यो हामान यहुदिन विरूद किरेल इतो, तो ताच ने मुंडी पोर पोलटी आवो, तेवी तो एने तान सोरो फासीन खांबा पोर टांगाड़ाय गीयो। 26 तान कारेण ता दिह्यान नाव पुर सोब्दा पोर रेन पुरीम मेलाय गीयो। ज्यी चिट्‍ठयुन सोब वातुन केरता, एने काय ता ज्या बारा माय देख्या एने जो काय ता पोर वितेल एतो, तान कारेण बी। 27 यहूदी जान तान केरता एने तान सोरान केरता, एने ता सोबान केरता बी जा ता माय बेचकाय जाईल एता, ज्य नाह टेलनार वायदो केऱ्या, काय ता लेखान गेत देर वोरीह तान ठेरायेल टेम माय ज्या दुय दिह माने; 28 एने पिढ़ी पिढ़ी, गेराणा गेराणान, ईलाका ईलाकान, हेयरा हेयरा माय ज्या दिह इर केऱ्या एने मानाय जाती, एने पुरीम नावान दिह यहूदी माय केदी नाय खेतेम एय, एने तान नाव एर तान वोसी माय रेन नाय जाय।

29 पोशी अबीहेलान सोरी एस्तेर राणी, एने मोर्देक यहूदी, पुरीमान बारा माय ज्यी दुसरी चिट्ठी मोटला आदिकार माय लेखी। 30 ज्यान नेकेल मोर्देके क्षयर्षान राज ने एक होव सत्तावीस ईलाकान सोब यहूदी फाय सान्ती आपणार एने खेरली वातु हेरी ज्यी आसा माय चिट्ठयु ले मोकली, 31 काय पुरीमान ता दिह्यान खास ठेरायेल टेमी माय मोर्देक यहूदी एने एस्तेर राणीन उकुमान गेत, एने जा यहूदी तान एने तान सोरान केरता ठाण लियेल एता, तान गेत बी उपास एने दुख केराय जाय। 32 पुरीमान बारा माय ज्यो नेम एस्तेरीन उकुमा माय उबो केराय गीयो, एने तान चेरचा पुस्तेक माय लेखाय गियी।