1 Mukanda uakuhuma kuli mukuluntu ua cikungulukilo,

Kuli kavusamba uange Ngayase, uje injazanga muavusunga.

2 Uacizango cange njilombela nguange vioshe vikuendele muacili nakukala na cihindu cacili, njazivuka nguange uli muacili mu muono uove. 3 Kaha njavuahelele cikuma omo vamuanetu vahetele nakunjileka vukaleho vua vusunga vua vuyoye vuove, muje vene muka kavangeya vusunga. 4 Kukuesi kuvuahelela cipulakana eci cinjilinaco, kuivua ngeci vana vange vaka kavangeya vusunga.

5 Uacizango, cinapu cuma cakasingimiko kucilinga omo ulinga cipangi cove kuvakueni, ngeci vene cikuma kuli vangenzi, 6 muomu cinahana vukaleho vua cizango cove ku cikungulukilo. Ukalinga muacili omo ukavatuma mu vungezi vuavo vua kupangela Njambi. 7 Vayile omo yendi kaha nacimo cahi civanatambula ku vaka mavu. 8 Kaha tunapande kukuasa vantu ava, linga tukapue vaka kupanga vamo mu vusunga.

9 Njasoneka vimo ku cikungulukilo, vuno honi Ndiyotelefese uje uatonda kulihaka ikeye vavenia ha kulivanga, uje kazivuka nzili yange yakama. 10 Nga njija njikaneha vioshe vije viali nakulinga, viuma vije vianakunu kuluisa yange na mezi amapi. Vuno honi kasimpile navio, ikeye akaviana kutambula vakuavo, na kuvindika vaje vatonda kuvatambula na kuvasheka mu cikungulukilo.

11 Uacizango, ngeci keti utemunuise vupi vuno honi temunuisa vucili, uje alinga vucili napu ua Njambi, vuno honi uje alinga via vipi kamuene Njambi.

12 Ndemeteliase ali navukaleho kuhuminina kuli muntu uoshe, kaha kuhuminina kuvusunga vuaho, nange njihana vukaleho hali ikeye, kaha muzivuka vukaleho vuange vuapua vua vusunga.

13 Cipue vene njili na viavingi via kumisonekela, vuno honi kunjasa kusoneka na cisonekeso na tinta. 14 Vuno honi njatsiliela kuija nakumimona vuavuno vene, nakusimutuiya hamo neni mesho na mesho.

15 Ciyulo cikale neni.

Vavusamba veni vamimeneka, kaha menekeni vavusamba voshe.