1 Yange Yunda ngamba ya Yesu Kilistu, yange naua munaina ya Yakomba. Kuli vaje vacizango vanasana Njambi, vaje vayoya muli Njambi Tate na mukuniunga ca Yesu Kilistu.

2 Njambi amihane cikeketima na ciyulo na cizango museteko yakushula.

3 Vamuanetu, njalingile munjaselelemo muoshe kumisonekela ha kuovoka cije citulinaco tuva voshe, omo njauanene nzili yakumisonekela ha kumisimpisa mukuluisa lutsilielo luje Njambi uahanene laja ku vantu vendi voshe. 4 Muomu vantu vamo vakakuhona kutsiliela vanakovela muvushueke hakati ketu, vantu vaje vakakutengulula kavumbi ka Njambi linga valisambuese vakevo vavenia ku mashungu avo amapi, kaha vanaviana Yesu Kilistu, Muene uetu. Kuntsenkulu visoneka viambuluile cihiso cije civanatambula.

5 Cipue vene muazivuka viuma vioshe evi, vuno honi njitonda kumianukisa muje vati Muene uovuele vantu Vaisaleli kuhuma mu cifuti ca Ingito, vuno honi munima yevi uanongesele vaje kuvatsilielele. 6 Vulukeni tungelo vaje kuvaniungile mihela yavo na nzili yavo yakama, vuno honi vasezele mihela yavo, vavakutile na malienge a yaye mu milima ya kuintsi, kuje Njambi alinakuvaniungila noho ha Litangua liakama lia cisompelo. 7 Vulukeni Sondoma na Ngomola, na vinganda vije viahateleko, vije vantu vamuo valingile ngue muje muvalingile vaje tungelo mukulikundika ku vilinga via vupangala na mashungu amapi, vakayanda kashitiko ka tuhia tua yaye linga cipue cimueso kuli voshe.

8 Mu ngila eyi vene, vantu ava naua vakala na vimona vije vika vatuamenena linga valinge vupi ku mivila yavo vavenia, vakayengula nzili ya Njambi yakama, kaha vakashaula vaka vumpau vaje vali helu. 9 Cipue uje kangelo ua mukuluntu Mingeli kacilingile eci mukulicokota cendi na Satana, omo valizungilile muvila ua Mosesa, Mingeli kalikuasesele kuhisa Satana na mezi akumushaula, vuno honi uahandekele kuli ikeye nguendi, "Muene akutenukile!" 10 Vuno honi vantu ava vakaluisa na mezi akushaula viuma vije kuvazivuka, na viuma vije vivazivuka na mana avo, ngue tusitu vamu musenge, vikevio viuma vije vikavanongesa. 11 Cilivene, tuyando kuli vakevo! Muomu vana kavangeya ngila ya Kaine. Ha mulonga ua vimbongo vanalihana vakevo vavenia ku mulonga uje ualingile Mbalame. Vanatenguluka ngue muatengulukile Kola, muje muvanongesele ikeye mukemo vene muvana vanongesa na vakevo. 12 Ava vantu vakevo vanapu ngue vitsuntsuiso mu viuano vieni via cizango, omo valia neni kuakuhona shuamua. Vakaliniungu lika vakevo vavenia. Vanapu ngue mashelua akupekumuka lika na mpunzi aje kekuneha kalunga. Vanapu ngue miti ije kuyekuima vushuka cipue mu ntsimbu ya luinza, miti ije ivanatukula na mizi yayo cilivene inatsi. 13 Vanapu ngue mankimba a cisali, kaha vilinga viavo via shuamua vili na kusholoka ngue lifulu lia mema. Vanapu ngue vintanga ntanga viakuendangana ngoco, vantu ava Njambi navatulikila cihela mu milima ya kuzivala vuii muje vakakala ya yaye.

14 Inoke ikeye uapuile ua mucitanu na vavali kuvatekuilila va Andama, uje kuntsenkulu uambuluile vunanguizi hali vakevo nguendi, "Taleni! Muene akeja na makulukazi amengi a tungelo vendi vakulela 15 mukusompa vantu voshe, na kuhisa ha vilinga viavo via kushaula Njambi na mezi akupihia aje vakakuhona kuvuila Njambi liova vakalikuasesa hali ikeye,"

16 Vantu ava ntsimbu yoshe vapua vaka kununguta nakupaya vakuavo, vaka kavangeya mashungu avo a mapi, vaka kulipamba na kuhandeka mezi a kulihalesa kuli vakuavo linga vapange vizango viavo.

17 Vuno honi yeni vamuanetu munapande kuvuluka vije vamilekele tunganda va Muene uetu Yesu Kilistu ha ntsimbu yakunima. 18 Vahandekele kuli yeni nguavo, "Omo matangua akumanusuila akeja, vantu vaje vaka mishendumuna vakasholoka, vaje vakakukavangeya mashungu aje katondo Njambi." 19 Ava vakevo vantu vaje vakakuneha mahangununo, vaje mashungu avo angoco akeo akavendesa, vakevo kuvesi na Cimbembesi ua Njambi. 20 Vuno honi yeni vavusamba vange yeni tualeleleniho kukolesa lutsilielo lueni luakulela. Lombeleni muli Cimbembesi Uakulela, 21 nakulitulika yeni vavenia mu cizango ca Njambi, omo mu vandamena Muene uetu Yesu Kilistu mu cikeketima linga amihane muono ua yaye.

22 Mueseni cikeketima kuli vaje vali na mitima ivali ha lutsilielo, 23 ovoleni vakueni mukuva humisa ku tuhia, kaha kuvamo naua mueseni cikeketima cakulipandakana na liova, vuno honi zindeni vuzalo vuavo vuje vuli natutoma tua mashungu a mapi.

24 Kuli ikeye uje asa kuminiunga linga keti muue nakumineha ku mesho endi a vumpau kuakuhona kapayo, vuaheleleni cikuma. 25 Kuli Njambi umolika ikeye Muyoyesi uetu, kuhitila muli Yesu Kilistu Muene uetu, kukale vumpau, na vumuene, na nzili na nzili yakama, na kuyula, kuhuma kulaja nakuheta ku ntsimbu ino, na ku miaka yoshe ya yaye! Ameni.