1 Kusholola ca Yesu Kilistu cije camuhanene Njambi linga amuese vangamba vendi hali vije vikalingiua vuavuno. Uazivukisile eci hakutuma kangelo uendi kuli ngamba yendi Yiuano, 2 uje uambuluile vioshe vije viamuene vije viapuile lizi lia Njambi na vukaleho vua Yesu Kilistu. 3 Uakukuisula uje atanda mukutambeka mezi a vunanguizi, kaha naua vakukuisula vaje vevua nakutulika vije vivana sonekamo muomu ntsimbu ili muyehi.

4 Yange Yiuano njisonekela ku vikungulukilo vitanu na vivali via mu nganda ya Asiya,

Kavumbi na ciyulo kuli yeni vije vihuma kuli uje aliko, uje uakeleko naua ikeye akeja, naua vihindu vieni vije vinahumu ku Vimbembesi vitanu na vivali vije viakala ku litanda liendi, 5 na kuli Yesu Kilistu, mukaleho uakulongua uje ntuatua uavaka kusanguka ku vatsi kaha naua ikeye muka kuyula ua vimiene va ha mavu.

Kuli ikeye uje uatuzanga naua uatupatuile ku vipi vietu na maninga endi, 6 nakutupuisa vumuene, na vasasendote kuli Njambi yendi na Tate, kuli ikeye kukale vumpau na kuyula ca yaye! Ameni.

7 Taleni, alinakuija mu mashelua! Muntu na muntu uoshe akamumona cipue vene uje uamutuvile likunga akamumona. Miyati yoshe ha mavu vakalila muomu yendi. Omu mukemuo mucikafua! Ameni!

8 "Yange Alufa na Omenga," muanahandeka Muene Njambi, "uje aliko, ikeye uakeleko, naua ikeye akeja, Uanzili yoshe."

9 Yange Yiuano, muanoko uje imulina kulipangela nendi mapakeso muli Yesu na vumuene na tuyando tuje tulinakuija tutuli nakuvandamena. Vanjihakele mu nkundu ya Patimose muomu ya lizi lia Njambi na vukaleho vua Yesu. 10 Njakele mu Cimbembesi ha litangua lia Muene, kaha njovuile lizi kunima yange lije liatambekele ngue tolombita 11 ngualio "Soneka mu livulu vije viumona kaha litume ku vikungulukilo vitanu na vivali, vikevio via mu Efeso na Simina na Pelengamu na Tiyatila na Salendisiya na Filandelufiya na Laondisiya."

12 Ambahoni njatengulukile linga njimone lizi lieya lije liahandekele kuli yange, kaha omo njatengulukile njamuene vitumbiko via vindeya via ngolinde vitanu na vivali, 13 kaha hakati ka vitumbiko via vindeya njamuenemo umo uakulifua ngue Muna Muntu, uje uazalele kazaku kalaha na muiva ua ngolinde uazengeleka mu ntulo yendi. 14 Vinkambu via ku mutue uendi viatokele too ngue vuanda vua kutoka, naua ngue mpemba, na mesho endi afuile ngue mulengi ua tuhia, 15 viliato viendi viafuile ngue vunengu vuakukuita mufuitilo na lizi liendi liapuile ngue cikukuta ca mema amengi. 16 Mu livoko liendi lia cilio uakuatele vintanga ntanga vitanu na vivali, na mu kanua kendi muahumine mukuale uavutuesi kuvali. Kaha na cihanga cendi caviakumine ngue misha ya litangua lili hakati ka mutue. 17 Omo njamumuene, njauililile ku viliato viendi ngue muntu natsi. Vuno honi uanjisalekele livoko liendi lia cilio nakuhandeka nguendi, "Keti uvue liova! Yange Uakuputukila na Kumanusuila. 18 Kaha yange uakuyoya! Njatsile, kaha honi tala, njilina kuyoya miaka yoshe ya yaye. Yange njakuata masapi a kutsa na Vukalo vua vatsi. 19 Kaha honi soneka viuma vije vi unamono, na vije viliko, na vije vikakalako hanima yevi. 20 Ngue ku cisinkiko ca vintanga ntanga vitanu na vivali vije viuamuene mu livoko liange lia cilio, na vije vitumbiko via vindeya via ngolinde vitanu na vivali: vije vintanga ntanga vitanu na vivali vinapu tungelo va kuje ku vikungulukilo vitanu na vivali, kaha na vije vitumbiko via vindeya via ngolinde vitanu na vivali vinapu vije vikungulukilo vitanu na vivali.