1 Omo uje Muna Mpanga uashokoluele kasateso ka mucitanu na tuvali, muilu muaholokele kuluu ha mutambela umo ua ola. 2 Ambahoni njamuene tungelo vatanu na vavali vaje vakakuimana kulutue lua Njambi, kaha vavahanene vitolombita vitanu na vivali.

3 Kangelo mukuavo uezile nakuimana ku mutula na lilonga lia ngolinde lia ngongosi ya luengo luacili. Kaha vamuhanene ngongosi ya luengo luacili yaingi ngeci alambuile hamo na malombelo a vantu va kulela va Njambi voshe ha mutula ua ngolinde kulutue lua litanda. 4 Vuisi vua ngongosi ya luengo luacili na malombelo a vakakulela vua kakumukile kuhuma mu livoko lia kangelo halutue lua Njambi. 5 Ambahoni kangelo uambatele lije lilonga lia ngolinde lia ngongosi ya luengo luacili na kulishulisa na manungu a tuhia a ha mutula, kaha ualiumbilile ha mavu. Kaha kuakele kumbalanganda kua cililimo, na mezi, na milengi ya mihiato na mandunduma.

6 Honi vaje tungelo vatanu na vavali vaje vakele na matolombita atanu na avali valivuaheselele linga va asike.

7 Kangelo uakulivanga uasikile tolombita yendi. Kaha kuanokele kalunga ua civue na tuhia vije via litsinganesele na maninga viauililile ha mavu. Kaha mavu a mucitatu auemene na mutambela ua mucitatu ua miti uauemene, kaha na muila uoshe ua vuntsompo uauemene.

8 Kaha kangelo ua mucivali uasikile tolombita yendi. Kaha vimo viakulifua ngue munkinda uakama oku u uema na tuhia va viumbilile mu cisali, 9 kaha mutambela uamucitatu ua cisali uempukile maninga. Kaha mutambela uamucitatu ua tusitu vakuyoya mu cisali vatsile, na mutambela ua mucitatu ua mato uanongele.

10 Kangelo ua mucitatu uasikile tolombita yendi. Kaha ntanga ntanga yakama ya kuviakuma ngue mutetengo yauile kuhuma muilu, kaha yauililile ha mutambela ua mucitatu ua vindonga na ha mavuelu vuelu a mema. 11 Lizina lia ije ntanga ntanga liapuile Kushasha. Mema a mucitatu empukile Kushasha, kaha vantu vavengi vaje vanuine mema aje, vatsile muomu ashashele.

12 Kangelo uamu ciuana uasikile tolombita yendi. Kaha mutambela ua mucitatu ua litangua, na mutambela ua mucitatu ua ngonde, na mutambela ua mucitatu ua vintanga ntanga vavipupile linga mutambela ua mucitatu ua ceke cavio uzivale, mutambela ua mucitatu ua mutania kuuatuile muacili ceke, mucifua cimovene na mutambela ua mucitatu ua vutsiki kuuatuile muacili ceke.

13 Ambahoni njatalele, kaha njovuile ngonga uje uakele nakupululuka oku ohia ha vukambuila nguendi, "Kayando! Kayando! Kayando kakama kuli vaje vakala hano ha mavu, muomu yakuohia ca matolombita vikuavo vije tungelo vatatu vakemba."