1 Ambahoni umo ua tungelo vatanu na vavali uje uakele na malonga atanu na avali uezile na kuhandeka kuli yange nguendi, "Ija, njikakumuese kusompa kua uje cikoyi uakama uakutsimana uje natumama helu lia mema amengi, 2 uje ikeye vimiene va ha mavu vanalingi nendi vupangala, kaha vaje vaka kulinga nendi vupangala vanapende viniu via vukoyi vuendi." 3 Kaha uje kangelo uanjambatele mu Cimbembesi na kunjituala mu mpambo, kaha njamuene mpuevo natumama ha cikashama ua kuvenga, cije cashulile na mazina a kushaula, kaha cakele na mitue itanu na ivali na mambinga likumi. 4 Uje mpuevo uazalele ntanga ya kuvenguluka neyi yakuvenga, kaha ualicakeyeye na ngolinde na mavue a seho na vusanga vuaseho, oku nakuata nganja ya ngolinde mu livoko liendi ya kushula na viuma via kasauntu, na viuma via mazilo, via ku vupangala vuendi. 5 Kaha ha luholo luendi vasonekeleho lizina lia cisinkiko nguavo, "Mbambilone uakama vaina ya vikoyi na kasauntu ka hano ha mavu." 6 Kaha njamuene mpuevo uje uapendele maninga a vantu vakulela va Njambi na maninga a vaje vavatsihile muomu ya Yesu.

Omo njamuene uje mpuevo njalikomokelele cikuma. 7 Vuno honi uje kangelo uahandekele kuli yange nguendi, "Nkuma vika ualikomokela? Njikakuleka cisinkiko cou mpuevo, na ca cikashama uje ali na mitue itanu na avali na mambinga likumi aje akala nauo. 8 Cikashama uje iuamuene, keti ikeye, kaha akahuma mu cina cakuhona masima nakuya kukunonga, na vaje vantu vakala ha mavu vaje mazina avo kuvasonekele mu livulu lia muono hume hakutanga ca mavu, vakakomoka omo vakamona cikashama, muomu uakeleko, kaha uahiko, kaha naua akeja.

9 "Aha hakeho hakala mana nakuvuisisa, ije mitue itanu na ivali inapu minkinda itanu na ivali ije uje mpuevo uatumamene, 10 kuli naua vimiene vatanu na vavali, vatanu vanau, umo kuali, mukuavo acili nakuija, omo akeja akakala lika mu kantsimbu kandende. 11 Cikashama uje uakeleko, uje honi uahiko, uje uamu citanu na vatatu vuno honi na kundama kuli vaje vatanu na vavali, kaha vaya mukunonga.

12 "Kaha aje mambinga likumi aje uamuene vanapu vimiene likumi vaje kanda vatambule nzili ya kusuana, vuno honi vatambula nzili yakama kupua ngue vimiene ha ntsimbu imo lika, hamo na cikashama. 13 Ava valina visinganieka vimo nakuhana nzili yavo na nzili yakama kuli cikashama, 14 vakalinga nzita na Muna Mpanga, kaha Muna Mpanga akavahiana, muomu ikeye uapua Muene ua vimiene na Shukulu ua vashukulu, kaha vaje vali hamo nendi vakevo vaje vavasanene na kuvahangula vaje vakulongua."

15 Kaha uahandekele kuli yange nguendi, "Mema aje uamuene, aje cikoyi uatumamene, apua vantu na vivunga na mafuti na vindaka. 16 Kaha mambinga likumi aje uamuene na uje cikashama vakazinda uje cikoyi, vakamunieka vioshe vije viali navio na kumuseza kuakuhona vuzalo, na kulia ntsitu yendi na kutsimika muvila uendi na tuhia, 17 muomu Njambi nacihaka mu mitima yavo linga valinge visinganieka viendi, mukukala na mana amo na kuhana nzili yavo ya kusuana kuli cikashama kuvanga noho mezi a Njambi akalishulisisa.

18 "Kaha uje mpuevo uamuene napu nganda yakama ije iyula vimiene va ha mavu."